ابي الفكه من ها الاستغلالي

اللهم من كان مهمومآ بدين او كربه اوضيقه من امة محمدصلى الله عليه وسلم ان تفرج عنه يارب العالمين وان تقضي دينه وان تجعله سعيدآ مسرورآ في دنياه واخرته

كلمة لاتهاجمني بهاالطريقه وش الي تبيني ان شاءالله اكلمك بها وكلمة اني اقسط احب اقولك ان على دبل دينك هذا ثلاث مرات والحمدالله متحمل وصابر وعلى مايقولون من بغى الدح مقال اح وكلن حلاله عنده غالي اما ناخذ حلال الناس وبعدها اذا حصل معنى شي نصير انماطل ونلف وندور هذا غير صحيح ولايجوز الله يجزاك خير حتى ولو مت فهو في عنقك وتسئل بكره عنه عند رب العباد ماراح يشفعلك مرضك الي تعذر فيه ولا ظروفك

بدل منت قاعد تشكوا هنا مثل الحريم رح شفلك رزقه تعينك على قضاء حاجتك وخل منى التشكوي على البشر الشكوا لله وحده والرجل العاقل يوكل امره لربه ويجتهد وربه بيسرله قضاء دينه على كلن انت والله اعلم عندي احساس انك تدور ماعند الناس لاكن بطريقه غير مباشره وان كنت كذالك فتق الله في نفسك ولاتسئل الحاجه من عند الناس اسئل الله ان لايبلانا اما كلمة الدين فااغلب البشر لديها ديون واقساط ومنهم المريض والمعاق وغيره واغلبهم ماشيه اموره لأنهم اوكلو امرهم لله سبحانه ونوو السداد وأعانهم ربهم على ذالك

ونسيت اقولك ايضن انا مصاب بداء السكر شفنا الله وأياك وكل مسلم ولاكن لايصح ان يكون حجه لنا لكي لاندفع ماعلينا لناس والحمدلله نعمل بقدر المستطاع كي نسدد حقوق الأخرين ولن يموت احد قبل يومه ابدا فجتهد ودور رزقك ولا تكن بهذا الشكل نصيحه لوجه الله

شف ياعلي اسلوبك اسلوب مريض ماهو بالسكر بس وعرفت هذا من ردودك على الناس والفاظك الغير محترمه في اكثر الردود علي وعلى غيري وكل مشاركاتك كلها ردود انا ماشكيت لا احد انا طلبت المشوره وافهم ياقفل وكلامك حريم وماحريم هذا اسلوب المرضى الي مثلك واقسم بالله اني ماابي من احد حاجه الا من ربي ولاطرحت الموضوع الا ابي النصح ولا اشكالك الحقودين والحساد ماراح ربي بيوفقهم انت تحلل الناس بعين طبعك وياليت لاتدخل موضوعي
وانا كنت اشكر كل الي شارو علي والدليل ان رايح بكره ان شاء لوزارة التجاره حتى اقول للاخوان وافيدهم واخليك انت واشكالك الي تدافعون وتستغلون خلق الله في هالاقساط ولو انحدينا على الاقساط ماهي بها الطريقه تتكسبون لكن بالشي المعقول
افهم مره ثانيه الحمدلله اعرف ناس واقارب وعندهم خير لكن مااحب احتاج لاحد ابي حل يخفف علي اقساطي ودين الرجال في رقبتي ماانكرته ولا اباكل حقه بس ودي انه يقلل القسط عشاني ماشي معه في الاقساط هذا هدفي
رح شف لك موضوع غير موضوعي مايشرفني الي مثلك يشارك فيه وتعلم الادب مع الناس احسن لك

خلاص روح قدم عليه واكل حلال هاالمسلم باالباطل وماطل فيه واشرط عليه يخلي القسط 100 ريال والله لو انه حلالك ماتقول هاالكلام
ماقول الى الله يشفيك والي مثلك ماراح يفلح ابد

فرج الله همك اخي الكريم وكل مسلم.

شوف توجه لأقرب محكمة أو محامي واشرح له الموضوع وجيب ما يثبت أقساطك لجميع من يطلبونك واتوقع راح يرفع لك قضية ويوزع اقساطك بشكل لا يؤثر على معيشتك إن شاء الله

جزاك خير اخوي ابوفيصل وهذا فكره جدآ ممتازه ان شاء الله ابطبقها
اعيد واكرر ياجماعة الخير ماابي اماطل او اكل حق الرجال انا ماابي الان الا انه يخفظ القسط علي لان وضعي المادي ماهو مثل اول هذا كل السالفه وكيف اباكل حقه وهو معه مايديني فيه انت مدري وش تبي الله يهديك ويصلح قلبك

جزاك خير اخوي ابوفيصل وشكرآ من كل قلبي لدعائك لي وربي يفتح لك كل باب ويرحم والديك ووالدي والمسلمين اجمعين وهذا فكره جدآ ممتازه ان شاء الله ابطبقها

اعيد واكرر ماابي اكل حق الرجال او اماطل فيه وهو معه مايديني فيه ولاتاخرت عليه باي قسط .. ابيه يخفظ لي القسط والنسبه لان دخلي ماهو مثل اول هذا الي ابي ماادري بعض الناس مايفهم ولا كلامي ماهو واضح الله يهدي بعض الناس

اليوم رحت لفرع الوزاره الي في منطقتنا وقالي الموظف ماتقدري تشتكيه الا اذا هو قدم الشيكات واشتكاك ساعته نقدر نحاسبه وقالي الموظف حق التجاره رح للمحكمه وشف القاضي وش يقول لك رحت للمحكمه وطلبت اقابل الشيخ وقابلته وسالته قلت ياشيخ انا سالفتي وقلت له قصتي قال مالك طريقه الا انك تسدد الرجال وغبن وماغبن حبالها طويله ويبي لك سنه يالله يبتون فيها ولا انت طالع بشي قلت طيب انا ظروفي كذا وشرحت له وضعي قال مالك الا تمشي مع الرجال بااقساطها زي مااتفقتو وقام يقص لي قصته وشف انا ماخذ سياره بكذا ومن هالكلام المهم يأسني وقال رح لراعي الاقساط وحاول معه يخفظ لك مالك الا هالحل ولاترى بيحولها للتنفيذ وبتوقف خدماتك
طلعت من الشيخ وشكرته ودخلت عند واحد من هالموظفين الي عليهم سمى الخير الله يجعلها في جنات النعيم ووالدينا ووالديه والمسلمين اجمعين وقلت ياخوي انا وضعي كذا وشرايك شر علي قال الي قسط عليك هو فرد عنده سجل قلت له لا قال اذا ماعنده سجل نظامنآ مايقدر يشتكي من الي قسط عليهم الا شخص واحد فقط قلت عسى يارب مااكون انا 😀😀
ونصحني جزاه الله خير ووجهني بكلمات طيبه استفدت منها وقالي رح كلم الي قسط عليك يخفظ لك القسط وان شاء الله بييسرها لك ربي والله بعث في قلبي الامل وتشجعت وقلت لازم اكلم الي قسط علي واحاول معه علمآ اني والله كنت متوقع مليون بالميه ماراح يوافق يخفظ لي القسط لكن قلت لعلى وعسى ربك يهديه ويحنن قلبه ولو ان قلوب راعين الاقساط الا من رحم الله قاسيه جدآ
الحين ابوقف عند راعي الاقساط ويوم نويت اكلمه ووش صار معي انا وياه
وكل هذا السالفه الي ذكرتها لكم كلها في يوم واحد فقط
الى لقاء

الله يهديك ياعلي


الرجال ماسأل المال من احد


سأل اذا فيه طريقه تخليه يعطي الرجال حقه بالكامل بس بدفعات اقل ..... ترى الدين دين يسر اذا الواحد مرض ماقال الله صل وانت واقف .فيه اللي يصلي قاعد واللي يصلي على جنب...لازم نتعلم من ديننا

ومن فرج على مسلم كربه فرج الله عنه كربة من كرب يوم القيامه.

لازم نفكر ان الوحد عنده بيت وعيال ...اذا غلط الواحد لا تنسى عياله وتنغص عيشهم....

وترى في كل ذي كبد رطبة صدقه....ترى كلمة افلا يتفكرون في القرءان لها الكثير من المعاني

عالعموم اللهم يارب سدد عنا ديوننا وفرج كربتنا ياكريم

اخوي الغالي malkiee
كل الي قلته في ردك هو بالضبط الي ابحث عنه
اسال الله ان يجزيك خير الجزاء وان يجعلك في عليين انت ووالديك ومن تحب واخواني المسلمين اجمعين
وشكرآ على اسلوبك الراقي الجميل ودعواتك الطيبه ولك بمثلها
اللهم امين

الْسَلآْإم عَلْيُكّمٌ وٍرٍحَمُةّ الله وٍبُرٍكآإتُهْ
كل الحلول موجودة والنَّاس فيهم الخير الكثير انا اتمني انك تأخذ اي احد عاقل وفاهم من ربعك او امام المسجد وتروح للرجال تقول لة وظعك وتشوف وش ردة اذا وافق بارك الله
وإذا رفض يكون عندة علم انك قدرتة وجيتة ومنت منكر حقة وأنك محافظ ع دفع اقساطة
اقل شي تشوف وش رد فعل الرجال وبعدين تبدأ تعطية حلول
مثلا
دفعات كل ستة أشهر
او دفعتين كل سنة دفعة
او اذا ماقبل عاد شي راجع لة اذا تأخرت بالأقساط شهر او شهرين يكون عندة خبر
او فية طريقة
شهر تعطية وشهر لا
فية حلول ولكن شف ردة فعل الرجال اول

وعليكم السلام ورحمة الله وبركاته
جزاك الله خير اخوي الامبراطور وحسن ظنك وتفائلك الطيب بالناس وهذا هو المفروض علينا دايم اننا نظن الخير بالناس
ورائيك جدآ جميل الله يوفقك دنيا واخره وانشاء الله اباخذ فيه

يلا ياشباب تكفون
نبي قطه
وكل واحد يمد كفه وعلى جبهة كل متلاعب
بأموال الناس
المسأله صارت طراره مع قصه حزينه ياابو سكر

الله بفك كربك اخى الكريم

brozaak
جعل الي حدني على الدين يحدك ويجعلك تتكفف الناس في المساجد والطرقات ياالهي يارب العالمين
انت اعمى بصيره واعمى قلب يوم انك تحكم علي وتستهزيئ فيني اني ابي اكل او اتلاعب بحق الرجال ارجع للردود وشف الي فاهمين قصدي لكن الظاهر الجشعين والي تاكلون حق الناس بداعي الاقساط اتحاولون تغيرون فكرة القصد من موضوعي
حسبي الله عليك وعلى كل جشع طماع وكل مستهتر بحال الناس ان الله يريك ايها في نفسك وهو حسبي ونعم الوكيل
والقطه تروح تدفعها اذا جاء الويكند حقك وشلتك

cloudwingo
جزاك الله خير اخي الحبيب واسال الله ان كما دعيت لي ان يعطيك الله بالمثل واخواني المسلمين اجمعين وان يفرج كربتك و كل مكروب ومهموم

الحمدلله والفضل لله ابشركم كلمة الرجال راعي الاقساط وقلت له ياخي انا ماعاد اقدر اكمل معك بهذا القسط المرتفع الي هو 2500 ريال وانا لي سنتين وزياده وانا ماتأخرت عليك يوم واحد بالقسط سو خير انا ظروفي ماهي مثل اول وكان عندي دخل ثاني والان انا خسرت مشروعي سو خير خل القسط 1500 ريال . وماله داعي اننا ندخل في مشاكل ومحاكم انا ياخي ماانكرت حقك ولاابي اماطل بشي
قال لي لاوالله مااقدر اعذرني انا معي شركاء ولا اقدر قلت .. قلت له اجل اذا ماتبغى تخفظ القسط اعذري انا والله ماعاد استطيع ادفع هالقسط العالي واذا تبي تشتكين حتى لو فيها سجن انا جاهز وربي بيعييني والوقت الي تبين احضر فيه عند الشيخ انا جاهز شاف طريقتي واني خلاص بايعها 😁😁😁 وانا والله بعتها خلاص مليت والهم ذبحني ومحتار بين ان هذا حقه ولاابي اماطل معه وبين عدم استطاعتي اسدد له القسط الي يبيني ادفعه كل شهر
بعدها قالي ياخي مااستطيع الا اخلي القسط الا 2000 ريال قلت له تبغاني اوعدك واخلف معك اقولك ابدفعها ولااوفي معك وحلفت له بالله مااستطيع الا اقسط 1500 فقط راتبي مايبقى منه شي قالي يكون خير ابكلم شركائي وارد لك بعدها بكم ساعه كلمني وقال ابشرك وافقو الجماعه وخلينا القسط 1500 لكن رجاء التزم معنا ولا تطلب تخفيظ القسط اكثر من كذا قلت له ان شاء الله اني ابوفي معك وحقك دين في رقبتي والله بيعيني عليه وجزاك الله خير ماقصرت وهذا نعمه من ربي وفضل
والحقيقه انا طمعت شوي وقلت ياليتني قلت له الف ريال 😊😊😊😊😊 لانه الظاهر الرجال مايبي الشكاوى لان طريقته في البيع واخذه شيكات بالاقساط غير نظاميه والموظف الي في المحكمه قالي انه اذا ماكان عنده سجل تجاري ماله حق يشتكي من الي باع عليهم بالاقساط الاشخص واحد ودعوى وحده وعدم نظاميت اخذ ه شيكات بالاقساط لكن لو كان شركه او مؤسسه كان على طول يشتكيك زي الحلاوه هذا الامور خلت موقفه ضعيف اتجاهي وخلته يوافق على تخفيظ القسط لانه مايملك سجل ولايقدر يقدم الشيكات لانه مذكور في العقد الي بينا انه ماخذ علي شيكات وبتحاسبه كذالك وزارة التجاره
الي احب اقوله بعد تييسر ربي وتخفيظ القسط من 2500 الى 1500 وجزاه الله خير راعي الاقساط
الي مر بنفس ظروفي او مشابهه لها انه مايحاول يضغط على نفسه ويتحمل اكثر من قدره ويستفيد من موضوعي في بعض النقاط المهمه الي اول مره اعرفها وينوي انه يسدد التزاماته وربي بيعينه لكن ماهو معناها اني اخطيت واحتجت للدين واخذته وبعدين تبين لي انه تم استغلالي من ناحية زيادة النسبه ولاقيمة القسط الشهري وبعدين مع الوقت اسلم واقول هذا غلطتي انا الي رحت له برجولي انا مااحد غصبني انا الي استاهل ومن هالكلام الي ييئسك ويحطمك معنوين انت مع مرور الوقت حاول انك ماتضغط على نفسك وتحاول انك تصحح ولو بعض الشي من الغلطه الي غلطته وتبحث لك لو مخرج بسيط لان راعي الاقساط ثق انه كسبان كسبان وهدا حقه لك ماهو يستغل حاجة الناس في رفع قيمة القسط والفائده هذا طمع وجشع انت انسان اخذت الدين وهو في رقبتك الي يوم الدين وحاجتك له هي الي حدتك تسلم عقلك وفكرك للشروط الي املاها عليك هذا الشخص المقسط
طريقتي ماظرته بشي يوم خفظ لي القسط بشي ولو اني ماذهبت للتجاره وللمحكمه واستفدت من بعض المعلومات و من بعض الردود جزاهم االله خير لاني والله كنت قبل اطرح الموضوع كان عندي خوف وتردد ماادري وش اسوي مع هالانسان الي قسط علي كيف اقدر اخليه يخفظ القسط او هل استطيع اخليه يخفظ النسبه لانه ماسك علي شيكات وطرحت الموضوع لكي استفيد من الاخوان المشاركين ويستفيد غيري وبعد ماطرحت الموضوع الحقيقه جت بعض الردود مثل البلسم على القلب وبعظهم فهمني وحلل طرحي للموضوع لامور اخرى الله يعلم ان ماابي شي الا اني ارتاح من همي والقى لي مخرج من هالقضيه الي اتعبتني وخفت ان الرجال مدام معه شيكات علي وموضوع الشيكات من الي نقرا عنها انه من الممكن يسجنك في اي لحظه اذا وداها للشرطه وتبين لي انه هذا الامور بالعكس تجي ضد الشخص الي دينك في بعض الحالات انا ادري اني طولت في موضوعي لكن سامحوني ويسامحني كل من رديت عليه بقسوه لانه ابصراحه بعض الردود ماتقدر وضعك وتفسر الامور على ماتبي والحمدلله مدام انا بصحه وعافيه فهذا اكبر نعمه من ربي وفضل
اسال الله ان كان منا او من اخواني المسلمين مديونن ان تفرج عنه وان تقضي دينه و تيسر امره وتعينه للخلاص منه
ونصيحتي للاخوان ابعد عن الدين ابعد عن الدين والله انه هم بالليل والنهار
والي حاب اي استفسار فاانا حاضر
وشكرآ لكل الي اتحفوني وشاركوني همي جزاهم الله الف خير ورحم الله والديهم ووالدينا والمسلمين اجمعين
والسلام عليكم ورحمة الله وبركاته