| جميع الحقوق محفوظة © |

مشروع تجاري صغير أم شراء منزل بالتقسيط؟ #رأيكم وتجاربكم يا اخوان

السلام عليكم ورحة الله وبركاته
أسعد الله أوقاتكم بالمسرات والبركات ،،،

إخواني الكرام خلوني في البداية أعطيكم نبذة بسيطة عن وضعي ، وأريد أن أسمع تجاربكم وآراءكم بعدها من فضلكم :)

#انا موظف قطاع خاص
#أسكن بمدينة الرياض
#راتبي أكثر من 9000 ريال
#وعندي مديونيات وأقساط أدفعها شهرياً حوالي 6500 ريال
#عندي سيارة متوسطة الحال، لكنها تكفيني حاليأً
#مستأجر شقة بمبلغ 26000 سنوياً

والآن أمامي فرصة اني آخذ قرض إضافي من البنك قدره 70 ألف ريال (القرض 160 ألف لكن الصافي 70000 بعد تسديد بعض الديون + القرض السابق من نفس البنك) والقسط راح يكون 3000 ريال

وبصراحة محتااااار

هل أجعل هذا المبلغ (70000) في مشروع تجاري صغير أو أشتري منزل عن طريق البنك بالتقسيط على مدى 15-20 سنة !!

#المشروع اللي أفكر فيه هو ( مطعم فوال وتميس ) وغالباً راح يكون دخله شهرياً 3000 - 4000 ريال
يعني يادوبك حق تسديد قسط البنك ولمدة خمس سنوات !!
وبعدها راح يصفي لي دخل المشروع

أو

انتظر سنة ونصف تقريباً حتى أنهي كل الالتزامات اللي عندي
وأشتري بيت بالتضامن مع زوجتي..؟!

لكن البيت راح يكون قسطه عالي جداً مابين 6000 إلى 9000 شهرياً ولمدة طووووووووولة مثلما قلت 15-20 سنة !!

فكرت في شراء فيلا مكونة من ( دور + ثلاث شقق ) واستفيد من إيجار الشقق..

لكن إذا حسبتها بتكون تدفع سنوياً أكثر من 120 ألف ريال ولن تملك الفيلا إلا بعد 15 سنة على الاقل !!
وأيضاً الغش في البناء كثير وما تدري هل الفيلا راح تقاوم الزمن حتى تمتلكها أو تتفجر عليك مشاكل البناء بعد سنتين أو ثلاث سنوات وتضطر تدفع وترمم وتصلح !!


#حيرة

أنا محتار بين الأمرين

المشروع بعد خمس سنوات راح يصفي لي دخله وممكن أفتح منه مشاريع ثانية إذا ربي وفقني

والبيت أمان خصوصا انه عندي ولله الحمد 3 أطفال


------

ما رأيكم؟
أرجو من أهل التجارب والخبرة مشاركتنا لنستفيد كلنا ، وأكيد فيه ناس محتارين مثلي.


تقبلوا تحياتي :)

الردود
نقاشات مشابهة
الكل: 9
1.
12:15:05 2013.03.23 [مكة]
السلام عليكم الامر محير من الجهتين من ناحية السلبيات الطارئه،، ومغري من ناحية الايجابيات،، (( صلاة الاستخاره )) هي الرأي وربنا يبارك لك ويختار لك اللي فيه الخير لدينك ودنياك..
2.
عضو قديم رقم 95963
12:26:53 2013.03.23 [مكة]
خذ الراي وانا اخوك المشروع يبيله وقت ومصرف واهم من ذا وذاك عماله واشراف ومتابعه وبدون ثقه في احد وماتدري ينجح او لا سدد ديونك اول وجمع حق ارض واشترها وخلها امان وبعدين تعمر فيها شوي شوي وخلك من البنوك ترا مافيها بركه وفوائد تقصم من اظهرك وغير هالراي لا تدور اخوك مجرب لين شاب راسه وانت ابخس بعمرك
3.
13:04:58 2013.03.23 [مكة]
نفس الحيره معك ومعي ومع كل مواطن لم يملك بيت ملك ..
4.
عضو قديم رقم 156132
13:23:14 2013.03.23 [مكة]
جميع الخيارات متاحة أمامك لكن حذاري أن تقع في فخ اعادة التمويل , إلا في حالة وحدة: أذا كنت تضمن انك تقدر تعطي مشروعك 25 -30 ساعة عمل اسبوعيا, غير كذا المشروع بيسيطر عليه العامل وانت تصير ممول خسران . عشان كذا انصحك تشوف مشروع انت تحبه وتحب تستثمر وقت فراغك فيه, لكن التميس والفول ما اعتقد انك تحب تشتغل فيه ؛) , او حتى تضيع ساعة من عمرك عند الفرن الكئيب حقهم. هذا رأي الشخصي .
5.
14:27:45 2013.03.24 [مكة]
السلام عليكم ورحمة الله ،، جزاكم الله خير اخواني الكرام على كلامكم الطيب وتفاعلكم معي الخيرة في ما اختاره الله ، وأسأل الله لي ولكم التوفيق ولكل مسلم آمين بانتظار كل ذي رأي سديد يشاركنا الحديث :)
6.
20:33:49 2013.03.30 [مكة]
اذا وجدت سكن بسعر مناسب لامكانياتك فلا تتردد لان المشاريع ومهما كانت فهي قابله للربح والخساره اما السكن فهو مؤمن عليه اي انه وبعد عمر طويل لو توفيت يسقط عن الورثه المديونيه وتكون ظمنت لهم ما يغنيهم عن الناس . ولا تنسى ان تستخير وربنا يكتب اللي فيه الخير لك وللجميع
7.
عضو قديم رقم 334866
05:42:00 2013.06.22 [مكة]
الله يوفقك ويسهل أمرك
8.
10:34:39 2013.06.22 [مكة]
مشروع فيه عماله ونت غير قائم عليه يعني معهم متواجد لايمكن ينجح مصيره للفشل عن تجربه طويله
9.
11:35:22 2013.06.22 [مكة]
السلام عليكم ورحمة الله ... وجهة نظري ورأيي : لاتستعجل وتزيد ديونك وخصوصاً ديون وقروض البنوك تزيد عليك وترهق نفسك ولاتشعر بلذة الدنيا والسبب الدين والدين هم ... والمشروع اللي ذكرت مايوصل الى اسم مشروع إلآ بحالة تسوي محل كبير إستقبال للفول في المحل وتجيب معلم فول مشهور وتسوي فول وقلابه ومعصوب وتميس وتحتاج عمّال ماهو أقل من ثلاثه غير المعلم ومشتريات يومية وطبعاً أتوقع المبلغ اللي بيصفي لك مابيسد المشروع ولو سويته صغير محل فول وتميس سفري مابيصفي لك شي يرضيك مقابل تعبه ... وسلبيات التجاره هاليومين واجد وخصوصاً العمل والعمال الآن مايعطي لأي محل عمّال وأغلب الأحيان عامل ويمكن يقولون لك جب سعودي تمّاس والسعودي علشان يقابل حرارة فرن التميس مابيسدة راتب 5000 ويبغى لك مكيف وعامل يجهّز له العجين والتجارة وانا خوك إذا ماأنت متفرغ لها بينطبق عليك المثل المال السايب يعلّم السرقة أما بخصوص شراء بيت ... العقار طاير والأستثمار مع هالغلآ غير مجدي ولو ودك تسكن بتسدد عمرك كله ... ولابتعيش زي خلق الله من التفكير في الديون والا راتبك من الأقساط بتصير حياتك أنت ومن حولك محكورة في مبلغ بسيط وتشعر بضيق أحياناً ولو سددت ديونك وأرتاح بالك وأنا خوك وأنتظرت نزول العقار وجمعت لك مبلغ تشتري أرض وتبنيها على مستطاعك يكون أفضل وعيش حياتك وراحة بالك راحة بال للي حولك وضحتك ووناستك بدون ديون ونكد تسوى الدنيا والله يوفقك ويرزقك ويسهّل امور المسلمين ... إستخير والله يكتب لنا ولك الخير