استشارة يا اخوان الأمور مخربطة شوي ونبي رايكم

المتبقي لك خلال سنة ونصف كمدخول 5750 ( هذا دخل الايجار / 12 + المتبقي من راتبك بعد خصم باقي الالتزامات ) وحتى الانتهاء من قسط السيارة بعد السنة ونصف يصبح مدخولك 7150 بعدها بسنة مدخولك 12450 وذلك بعد الانتهاء من القرض الشخصي ، تبقى على هذا المدخول حتى تنتهي من صندوق التنمية وتستمر بمدخول 14150 .

هذا يعني لو العين التي قمت بتأجيرها لم تستلم قيمتها في إحدى السنوات ستؤثر عليك سلباً لأن دخلها بعد قسمته على 12 شهر = 3750 .

إن شاء الله تضيط أمورك بس تضغط على نفسك شوي حتى سنتهي قرضك الشخصي والسيارة وربك يسهلها وهذا ما يمنع تسمع رأي الناس فقد يكون لهم رأي أسلم لك وأفضل .

بارك الله فيك أخي ياسر فعلا كلام منطقي جدا

انصح انك تاجر البيت زايد مدخول البيت المؤجر وتستأجر شقه افضل لك وتحاول تدور لك ارض افضل من الشقه وتبني عليها شوي شوي على حسب الاستطاعه وحتى لو شريت الشقه فمدخولك من الايجار بيغطي القسط لكن الافضل الارض بنظري من الشقه والله الموفق

ما حولنا نشتري ارض اقل شي الأرض مساحة 500م بمليون ريال!!!
وممكن تحصل ب 700 الف ريال في مخططات بعيدة أكثرها ما وصله كهرب!!!

نصيحة لا تزيد الديون عليك و استأجر بيت في منطقتك الجديدة ووفي الديون يلي عليك

مالك الا الاجار لمدة كم سنه الى انتهاء بعض الاقساط
واذا انتهت اقساط السياره حاول تقسط لك ارض واضغط على نفسك وخلك بالاجار
صدقني اغلب البيوت الجاهزه فيها مشاكل فمابالك الشقق
الجاهز التشطيب ديلوكس ومن جوا الله اعلم بالحال

من الإجار استأجر وكذا تكون ريحت نفسك وراتبك

وفقك الله ووفق الله الجميع
لا تشتري الآن ... استأجر الآن حتى السنة القادمة لتتضح الأمور بشكل عام ... لا تشتري الآن ، انتظر ... وفقك الله والجميع

اضف 300الف لل700الف واشتر بيت كامل بدال الشقه لانك ماتضمن اللي معك بالعماره

تبي الشور الصحيح انت مخربط خاااااالص
لا انصح اطلاقا
وهنا افضل من فكرتك الف مره فانتظر شوي وسانورك
القصد 6000 اولاف بلاش الاف اولاف ياعمده ركز ومخمخ وخل السته قسط و6 للمصروف و6 للصلاح و6 لمن تحب خذ شوري
17 الف تدخل شهري لا ترهن رقبتك في عش حمام

ابوفيصل2 ممكن توضح والله خربطتني زيادة!!

شقة بذا المبلغ انتبه غالي جدا

العقار مدحدر وانت مالك عقار ولله الحمد خذها ببساطة وضيق على نفسك شوي فترة بسيطة لين تتضح الأمور وتخف الديون عليك وتاخذ لك عقار على قد ميزانيتك بعد انخفاضه.

انا رأي اذا انت في أطراف المدن تشتري لك دور جديد جاهز تحصلها بحدود 500 الف او 600 افضلك من شقه صراحه وأوسع واذا رجعت لمنطقتك. تأجره او تبيعه.

الى الآن ما فهمني احد أنا اسابق الزمن إذا ما أخذت خلال سنتين تكون فترة التقاعد قربت وما راح تعطيني البنوك أي مديونيات إلا بقسط عالي جدا وفترة زمنية بسيطة وبكذا ما راح اقدر!!!

من وين ما نطقها عوجا الله يعين.

والأدوار في اطراف المدن حصلت لكن أحياء تعبانة ودك تبقى مستاجر طول عمرك ولا تسكنها ابدا وانا بصراحة يهمني الحي لأن في الحي راح يدرسون عيالي وبناتي وراح يتأثرون بطبيعة السكان وأنا ادور الحي المعقول وليس التعبان ولا الراقي يعني المتوسط واهم شي طبيعة السكان!

الله يهديك تسابق الزمن على القروض

اجمع اللي تقدر عليه خلال خدمتك واذا تقاعدت اشتر اللي تبي
والإيجار خذ في حي مناسب لك ولا تتوسع عشان يكون الايجار معقول.

كم بقي عليك تتقاعد ووين قطاع عملك ننورك وكم راتبك بعد التقاعد وباي مدينة انت اذا بالرياض
ابشر بعزك نبني لك عظم وبلك بطريقه ميسره لن تندم تاكد

ابوفيصل ممكن توضح لي كيف تبني لي عظم بطريقة ميسرة!
المشكلة في الأرض كيف نوفر ارض نبني عليها والا العظم ما أظن بناءه مشكلة كبيرة وحسب علمي ما يكلف كثير!
الوظيفة مدنية مثل مثل اي وظيفة مدنية التظام واحد!
التقاعد باقي 10 سنوات
لكن البيت وش ابي فيه بعد التقاعد!!

الله يسعدك انت بالرياض اولا
ثم 10 سنوات حليوه
العظم يبي له خبره وصبر
اذا بالرياض ابشر من المخطط لنهاية العظم وممكن اللياسه كمان
انا اشرف لك عليها بعمالي انا لا تقلقل
جماعتي الان كل ابوهم مالكين وساكنين وبعضهم بديت له ب1000 ريال اهم شيء عندي العزيمه والامور الباقيه تتسهل باذن الله
كيف وش تبي بعماره دخلها 200 الف بعد التقاعد انت تحكي صحيح
الارض خذها اقساط من الراجحي نسبة ثابته انصحك ابعد عن النسبه المتحركه مثل البقره ترضع نفسها ما تقدر تتخلص من دينها مستمر النسبة الثابته هي الافضل

طيب أخذت الأرض عن طريق الراجحي بمبلغ فلكي مع الفوائد الله اعلم حسب تقديراتي لن تقل الأرض عن مليون كاش مع الفوائد بتكون قيمة الارض في حدود مليون وست أو مليون وسبعمية يعني قسط شهري 14 الف ريال لمدة 10 سنوات طبعا البنك ما يعطيني هذا المبلغ!!
طبعا اتكلم عن الأحياء المتوسطة او أقل من متوسطة اللي قيمة المتر 2000 ريال أما الأحياء فوق المتوسطة فسعر المتر يتعدى 4000 ريال .
وعليك الحساب!
طبعا ما أظن فيه حل سحري.