| جميع الحقوق محفوظة © |

"لا تعطِ سرك امرأة ولا تخاوِ أمير"

"لا تعطِ سرك امرأة ولا تخاوِ أمير"


فيه واحد سمع الحكمة هذي من أبوه فكان يبغى يثبتها,



المهم إنه راح وخاوى أمير في ديرته وصار خويه الروح بالروح ...



و الأمير ما يطيب له المجلس إلا إذا كان هالشاب فيه .. صار نديمه بـ اختصار ...



الأمير عنده مزرعة نعام وكانت عنده نعامة غالية



راح الولد وأخذ النعامة ودسها في مكان في المزرعة



وراح لسوق الغنم وشرى خروف وذبحه وقطعه وجابه في خيشه آخر الليل لأمه



وقال لها هذا لحم نعامة الأمير يمه ..



جايبه لك يالغالية..بس تكفين لا تعلمين أحــــد ..


عشان لو درى أحد بيوصل الكلام للأمير ويقطع راسي.



الأم قالت : و لايهمك ياولدي .. مجنونه أنا أفضح سرك واموتك بيدي؟

من اليوم الثاني عزمت أمه جارتهم على اللحم ..وسألتها وش هذا اللحم الزين يا فلانة؟



قالت الأم أقولك بس سري في بير؟



ردت الجاره سرك في بير يا وخيتي افا عليك ...





"لا تعطي سرك امرأة ولا تخاوي أمير"
قالت الأم لجارتها السالفة وحلفتها ما تقول لأحد عشان


ما ينذبح ولدها



طبعا الأم يوم علمت الجارة كان قصدها مفاخرة بولدها ...



يوم بعد يوم السالفة انتشرت بين الحريم في الديرة.


ووصلت للرجال وفي الأخير وصلت للأمير اللي عصب


و طلب من الحرس إنهم يجيبون الولد ويحطونه في السجن لين يجي يوم ويقيمون عليه الحد.






الولد طلب من الحارس إنه يروح للأمير ويقول له إن النعامة لـ الحين موجوده في مزرعته



بس خاشها في حوش بعيد عن باقي النعام وإنها بخير.



الأمير طلع الولد و اعتذر منه وحاول يعوضه بس الولد رفض وقال أبوي صدق في حكمته.



وهذي بس نعامه أجل لو كانت شي أكبر من كذا


وش كان بيصير فيني ...!!!!!

الردود (20)
الكل: 20
1.
13:47:49 2012.02.19 [مكة]
هذه اثنين من النصائح وين الباقي السالفة طويلة
2.
عضو قديم رقم 295578
13:55:09 2012.02.19 [مكة]
ماكملت لنا المثل "لاتعط سرك إمرأه ولا تزوج صلبي ولا تخاوي أمير" لأن الشاب قال إنه يعرف للصقور لدرجة انه فضح زوجتة الأمير والأمير بغى يتأكد منه وكل ما تأكد من سالفة الشاب عطاه لحم وقربه منه وآخرتها قال الشاب للأمير إنك ولد صلبي كلما علمتك اهديتني لحم هههههه
3.
16:42:32 2012.02.19 [مكة]
والله صدق من قال هالحكمة ..
4.
عضو قديم رقم 127463
02:14:47 2012.02.20 [مكة]
القصه موجوده بكتاب ( الأساطير الشعبيه في شبه الجزيره العربيه ) للكاتب / عبدالكريم الجهيمان .. الله يعطيك العافيه أخوي مدحت ..
5.
10:27:34 2012.02.20 [مكة]
القصة طويلة لاتعطي سرك لمره ولاتزوج بخيل ولا تخاوي امير والامير درى عنه انه ذبح النعام وهو ماذبحها بس عطاه مهلة يعطية عوض كم ناقة الرجال فكر قال مالي غير الله ثم نسايبي كان عنده نسيبين واحد غني وبخيل وواحد فقير بس كريم واجودي راح لنسيبة الغني وقام يحلف ان معنده شي وبعد الحاح على نسيبة جاب له معزة يقودها قدامه وتذكر كلام ابوه يوم قال لاتزوج بخيل ثم راح لنسيبه الثاني الفقير وقاله قصتة راح نسيبة الفقير يستفزع جماعتة لين جمعله ذود واجد من النياق وقال الرجال ياطيب نسيبي هذا نسيب السعد ومشى الرجال وراح للامير يسوق النياق قدامه والمعزة معها اللين دخل على الامير وقال هذا بدل النعام ولكن ياطويل العمر النعامة موجودة ماذبحتها وقالله لية سويت كذا قاله ابشوف وصية ابوي واجربها وطلعت صح قاله الامير ترا النعام لك وعطاه مال كثير اخذ الرجال النياق والمال اللي معه وعطاها نسيبة الفقير والمعزة لبسها شيلة حرمة ووداها على نسيبة الغني وهكذا خلصت القصة كما اعرفها واحفظها من الصغر توته توته خلصت الحدوته
6.
11:07:06 2012.02.20 [مكة]
مشكور على القصة
7.
عضو قديم رقم 293431
12:07:55 2012.02.20 [مكة]
خربتوا على مدحت !
8.
عضو قديم رقم 265815
13:22:12 2012.02.20 [مكة]
حجايا بدو فاضيين الناس طلعو للقمر وانتو للحين ترددون الخربطة - اكيد الواحد بيخاوي امير لازم يجي يوم يسحب فية الواحد يقول اعلومة للمرة تمسك التلفون وتقعد تبربر شهر عاد البخيل عندنا بالجملة - اعوذ بالله من البخل خاصة المدرسين - الواحد يشتغل صار لة 20 سنة مدرس وسيارتة ددسن 93 غمارة !!!
9.
13:39:52 2012.02.20 [مكة]
من جد حكمة صحيحة 100% مشكور على القصة .
10.
عضو قديم رقم 283444
14:01:43 2012.02.20 [مكة]
اما يا رامي المدرسين لاتقربهم صحيح سياراتهم مقربعه وموديلات قديمه بس السبب مهو البخل السبب الفقر نعم الفقر . ترا المدرس اول واحد يطامر للاقساط ,قبل البنوك كان المدرس يتقسط سيارتين وثلاثه يفك فيها زنقته ثم جاته البنوك وشفطت اللي وراه واللي قدامه بحجز راتبه لايقدر يروح يمين او يسار ياخذ ميتين الف يسدد ديونه ويحسبونها عليه اربعميه نص راتبه محجوز لعشر سنين واذا بغى تمويل جديد قصو اظهره , وترا المدرس لا يرشي ولا يرتشي لانه اصلا مجال عمله ما ينفع اي واسطه والطالب بينجح غصبن عليه ناهيك عن الامانه الملقاه على عاتقه وهو قدوه للجميع .صدقني اعرف مراقب بلديه راتبه 3500 ومعاه افالون 2011 كاااااااااش والله كاش وانت تفهم ويش معنى كلامي .
11.
15:15:36 2012.02.20 [مكة]
كتكوت 11 الصحيح بعد ما علم الامير بالحقيقة اكرم خوية وامر بتحميل المائة ناقة بما تستطع ان تحمل من اكل و ملبس كذلك التيس .فذهب خوي الامير الي قوم نسيبة الكريم وطلب منة ان يعيد النياق الي اصحبها مع الخير الي عليها . كذلك اعاد التيس لنسيبة البخيل محمل بما استطاع حملة .
12.
عضو قديم رقم 127463
06:07:03 2012.02.21 [مكة]
ولما علم الأمير بالخبر جاء للبخيل وقال له .. يابخيل ماتعزمني .. هع هع هع
13.
عضو قديم رقم 143545
22:26:21 2012.03.25 [مكة]
يازين البدو وسوالفهم كلها حكم مهوب الحين حتى الشايب معاد يتكلم ماسك ايفون الله لايبلانا
14.
19:23:38 2012.07.08 [مكة]
ياشيخ زحفو لي بجلس معكم كل هذي قصص ولا نفس القصه ههههههههههههههههاي بس والله الولد ذكي وحكيم ورد رقم 13 الله يقطع ابليسك والله ضحكتني
15.
عضو قديم رقم 227898
20:18:42 2013.06.22 [مكة]
يازين حكم الأولين عز الله انها تجمد على الشارب الله يرحم أباءنا وأجدادنا أخذوا الحياه بحذافيرها رغم معاناتهم مع الفقر والمرض والصحراء اما جيلنا ياالله لك الحمد ثقافتنا بطريقة أكلنا ومطاردة الايفون الفور اس ماخلفنا حكم ولاخلفنا قصص ماغير فاتحين حلوقنا قدام التيفي والشبكه
16.
عضو قديم رقم 141998
21:25:57 2013.06.22 [مكة]
الامير يكفر العشير والمره ما تحفظ السر
17.
22:55:25 2014.02.28 [مكة]
افاااااا يارامي وش الحجايا عساك تحج على قرونك هههههههههههههههههههه راحت اللعه وين سيبويه
18.
عضو قديم رقم 194440
00:10:50 2014.03.01 [مكة]
لا يوجد افضل من صداقة الفقراء ومجالسة المساكين سواء للدين او الدنيا وبالنسبه للسر , بس يطلع من اثنين , خلاص بعد ما يوقف , والحريم يحبون الفضايح , وما نقول الكل بس الاكثريه بس تدرون , على طاري الحريم قبل شهر طفيت الكهرب على حريم جايين البيت الساعه 11 ونصف في الليل , طبعا انا اعرف هالطقه من الحريم , كله حش وحسد وفتنه ونميمه وغيبه وما يطلعون الا الساعه 1 قمت للعداد الرئيس خارج المنزل وطفيته , ورب الكعبه ما طلعوا من البيت الا الساعه 1 , وبقوا جالسين على لمبة جوال وحده منهم يا غث هالنوعيه من الحريم , لكن العتب على رجالهم اللي تاركينهم يهيتون
19.
14:50:42 2014.03.01 [مكة]
: axax ههههههههههههههههههههههههههه الله يرج شيطانك
20.
08:14:39 2014.03.02 [مكة]
اكسا اكس ههههه انت فللللة الله يسعدك
أضف رداً
نقاشات مشابهة