| جميع الحقوق محفوظة © |

ينفع اركب مولد كهرباء للبيت واستغني عن شركة الكهرباء

ابي احول بيتي او جزء من بيتي لمولد كهرباء

مادري وش رايكم

هل هي كويسه
يعني هل استطيع اشغل اربع مكيفات مع اناره ودينمو كهرب من مولد


اعرف ان اسعار المولدات بالعشرين والثلاثين الف

بس هل هي عمليه ولا كل شوي انقطع وعب ديزل ومادري وشو

الردود (12)
الكل: 12
1.
16:14:02 2013.12.10 [مكة]
ما انصحك اقل مولد كهربائي يشغل فوق الاربعه مكيفات بالاضافه الا الاجهزه الاخرى سعره فوق الاربعين الف جديد بالاضافه الى تجهزات الموقع وبنا غرفه منع الازعاج واحتمال الجيران يشتكو من الازعاج واضف الى الصيانه الدوريه ولازم نعطيه فتره استراحه ساعتين كل 10 ساعات هذي الفكره ما انصحك بها داخل المدينه اذا عندك مزرعه او استراحه فكره ممتازه ولكن ممكن تشتري الواح على الطاقه الشمسيه تكلفتها رخيصه وبتشغل عليها الانوار والمراوح
2.
17:47:54 2013.12.10 [مكة]
ما ينفع ولا تفكر فيه نهائي ؟ لأسباب عده وأهمها ؟؟؟؟ إزعاج الجيران المستمر + الصيانه اليوميه المتعبه والمكلفه + ولا يمكن أن يستمر 24 متواصله = الناتج لايمكن الإستغناء عن الشركه الأم مهما كانت الظروف
3.
19:05:04 2013.12.10 [مكة]
طيب وش رايكم في فكره خزان البياره الحين بعد الصرف الصحي ماعاد له فايده لو اسقط فيه مولد واطلع له شكمان تتوقع ينجح ؟ في كتم الصوت وتحمل الغلق الحراري ؟ وهل يتحمل العمل 24 ساعه عند العليان مولدات ضخمه اتوقع تتحمل الجهد الاربع وعشرين ساعه لو فرضنا ان اسعارها في الخمسين مقارنه مع فاتورة الكهرب الخمسميه شهرياً تقريباً مع دور ارضي واحد
4.
19:08:00 2013.12.10 [مكة]
عند شركة البابطين كنتينر خاص بالمولدت كاتم للصوت ومنقي من الابخره عادتاً يركب على الابرج التي تقع خارج النطاق العمراني مرفق معاه خزان ديزل 300 لتر مدفون
5.
21:03:44 2013.12.10 [مكة]
كان عندي مشروع قدمته ك اختراع لا حد المختصين ب انتاج الطاقه البديله لملم اوراق المشروع وقلي ي ولدي ... ايش تخصصك قلتله محاسب قلي استمر في المحاسبه ولا عاد تفكر تخترع في الجبهه صح :( تدرون وش فكرة المشروع ابقولكم ان رغبتم مشروع فنان بس اهو نظرياً ممكن بس عملياً صعب قلتله يادكتور خلنا نعتبره بذرة مشروع ناجح غمض عينه وابتسم وعرفت من علامات وجهه ان لو اقول شي زياده ممكن يزهم علي السكورتيه :) وطلعت وهو مازال مغمض عيونه
6.
00:07:22 2013.12.11 [مكة]
يعطيكم العافيه على ردودكم بس انا شركه الكهرب رفضت تعطيني انبيرات زيادده ولا عداد زياده وابي اضيف مكيفات ولاينفع معها الا مولدات غير كذا المولد لما ابيعه بعد سنه مراح ينزل سعره بعدين لقيت مولادات بدون صوت يجي معها كاتم بس هي مكلفه ولا ابي اجرب واكتشف انها صعبه ابيها حق مكيفين مركزي مع غطاس فقط فاتروتي بالصيف ثلاث الاف تقريبا
7.
07:31:08 2013.12.11 [مكة]
يسعد صباحك يالغالي صارت لنا مشكلة مع البلدية في بناء ملاحق مخالفة وكبرت السالفة الى قطع التيار واخذنا السالفة عناد وجبنا مولد كهربائي 180 كيلو وات مع كاتم صوت الجديد تقريبا اخذناه بحول المية الف ياباني تجميع صيني ضمان سنة المولد اذا جديد بيخدم معاك اقل شي سنتيين لو شغال 24 ساعة مو مشكلة لكن تحتاج من فترة لفترة تطفيه ( تغيير فلاتر ديزل . تغيير زيت مكينة . تشيك الحرارة والموية ) هذي لازم تطفيه اسوأ احتمال لو طفى الماطور لأي سبب ( مشكلة ميكانيكية او كهربائية ) بتعاني الأمريين للصيانته واصلاحه واقل بتقعد 3 ايام من دون كهرب اذا ما عندك ماطور احتياطي المشكلة اللي بتعانيها اكثر شي الديزل ( التعبئة ) اصعب شي عانيناه كيف نعبي ديزل التانكي صغير وما يكفيك حق يوميين ولازم تعبي والصيف تتبهذل نقص بالديزل ونقعد نفتر من محطة لمحطة علشان نعبي الخزان الإضافي ( 1000 لتر ) بالأخير رضخنا للأمر الواقع وازلنا البناء الزائد علشان ترجع لنا الكهرب من سكيكو بعدين التكلفة بيطلع عليك اغلى من سكيكو ( اذا بتدور التوفير باغسل يدك مرة مرة غالية السالفة ) مالك الى تشوف لك واسطة او معرفة وتسلك البلد هنا عايشة على كذا بالتوفيق
8.
09:12:39 2013.12.11 [مكة]
طيب ماينفع اركب مولد لجزء من البيت عندي منطقه مسكرها لاني مابي اشغل مكيفاتها خوف من فاتوره ولا يقفل الكهرب بسبب الضغط ابي فيها مكيفين مركزيه كم يحتاج مولد وهل هو اوفر من شركه الكهرب ولا لا
9.
09:55:23 2013.12.11 [مكة]
يالغالي .. لاغنى عن شركة الكهرب وهي نعمة انعم الله بها علينا واسعارها ليست غاليه فقط مبلغ التاسيس لمرة واحدة .. انا اسدد شهريا ما بين 100 و120 ميلغ زهيد جدا مقابل خدمة عظيمة . ولك التقدير
10.
07:46:49 2013.12.12 [مكة]
تقدر تركب بس تحتاج تمديدات كهربائية جديدة. ما تقدر تشبكه بطبلون البيت حاول انك تزيد الشريحة. شوف لك واسطة ولا ارخي الريال نصيحة لا تفكر بالماطور اذا استخدامك يومي 24 ساعة والله بتتعب بالتوفيق
11.
16:20:55 2013.12.12 [مكة]
خلايا الطاقه الشمسيه اقضل واوفر
12.
17:36:20 2014.01.06 [مكة]
السلام عليكم إذا عندك ثقافة التوفير وعودة أهلك وابنائك عليها ما اعتقد فاتورة الكهرباء غالية لهذه الدرجة حتى تضطر إلى ترك شركة الكهرباء ووضع مولد كهرباء خاص. فاتورة الكهرباء أرخص من فاتورة الجوال عند الكثيرين وبالمقابل الفائدة من الكهرباء اكثر من الفائدة في كلام بالجوال وهذرة مالها داعي. عود نفسك وأبنائك بإطفاء لمبة دورة المياه مثلا عندما تخرج منها. الغرفة عندما تكون خالية ما لزوم الإنارة. الاسياب والممرات التي لا تستخدم بعض الاحيان تغفل عن غرفة او مستودع ولا تعود إليه إلا بعد 4 ساعات والاضاءة شغالة وكلها ضغطة زر تولع النور إذا احتجته فيه اماكن مهمة يحتاج النور شغال ليلا ونهارا حسب وضع المكان الانارة المنخفضة في الليل صحيا افضل من الانارة القوية. انا عندي اماكن في البيت اساسية اترك النور شغال حتى لو كنت خارج البيت لعشرة أيام اولا مكان اساسي النور فيه يغطي مساحة كبيرة ثانيا امنيا يشير إلى وجود ناس في البيت. واشياء كثيرة. البعض يشغل المكيف يقول حتى يكون المكان بارد إذا جيت. وهذا غلط حتى صحيا تجي من الشارع حار وتدخل مكان بارد لكن لما تشغل المكيف ويبدا التبريد بالتدريج افضل صحيا. الحمد لله ليس بخل ولكن هي ثقافة تعود نفسك عليها ويمكن تصرف في مجال معين اموال كثير وتوفر بالكهرباء << يعني نفسه.. لكن هي ثقافة محموده والدين حثنا على عدم الاسراف. سكنت عند عوائل خارج المملكة السخان يكون رئيسي ويعمل على الخلايا الشمسية وعند وجود غيوم او فترة الليل يفصل ويشبك على تيار الشبكة العامة (شركة الكهرباء) أوفر كهرباء وأوفر بالماء لانه يحد من هدر الماء البارد حتى يصلك الحار لانه فيه عملية تدوير الماء كل ثلاث دقائق وبالتالي الماء الحار متوفر بأي لحظة من تفتح الحنفية يجيك ماء حار. الحقيقة فكرة عجبتني حنا عندنا شمس ما شاء الله اتوقع بنصف تكلف الخلايا الشمية عندهم عندنا توفي بالغرض. وعندهم امطار والجوا غالبا غيوم ومع هذا مستفيدين من الطاقة الشمسية.
أضف رداً
نقاشات مشابهة