اليوم بنقل لكم سالفة واحد من اصدقائي يقول امي تزوجت قبل 33سنه من واحد برا القبيله وجلست معه سنه ونص وتطلقت ونتيجة الزواج ولد اخذوه من امي وراحو وتركو امي عند اهلها طبعا ولدها صار في مدينه تبعد عنها الف كيلو لاتلفونات ولا تعرف تجيب اخباره تزوجت امي بعدها وجابتني انا واربع خوات ولاعمرها قالتلنا السالفه ولا احد في البيت يدري عنها الا الكبار فقط نسمع كلام بس اذا سالناها ماتجاوبنا تقول سالفه قديمه ونحس غصه في قلبها ولا ودنا نكدر خاطرها بعد ماصار عمري فوق السبعه وعشرين اتصل علي خالي وقال تعال بيتي طبعا انا وخالي نشتغل في الرياض رحت لبيته ولاقي عنده واحد في المجلس تقهوينا واحس خالي وده يقول شي بس مايقدر مادري الموقف صعب عليه ولا ماراح يتحمل الموقف وقف وقال هذا اخوك من امك الي لنا سنين ماندري وين مكانه وجابه الله لنا وبعدها طلع وخلاني معه ماتوقعت بيوم في حياتي ولا فكرت يصير لي كذا ماقدرت اتكلم ولا هو تكلم اول ماجيت بقول اي شي لقيت نفسي ابكي مثل الاطفال ماقدرت امسك نفسي اصيح وقول والله ثم والله ثم والله محتاجك ماعندي اخوان ابي اخو يسندني ابي اخو يكتم سري ابي اخو وبس موقف مستحيل انساه بعد ماهدت انفسنا وكبرت فرحتنا جا وقت المرحله الصعبه كيف اقول لامي دقيت على خواتي وحده وحده وقلت انتبهو تقولون لامي بعد ماعلمتهن الي تبكي والي مو مصدقه المهم سافرت انا وخالي واخوي ماتتصورون وانا داخل قريتنا وخوي جنبي احس ان مافيه احد مثلي لان الاخو مايتعوض مثل الاخت مستحيل احد ياخذ مكانها عند اختها دخلت انا وخالي وجلسنا عند امي واخوي قلناله انتظر خايفين عليها من الموقف لانه صعب وصعب احد يتخيله جالس جنبها واستهبل عليها مدري كيف افاتحها واحس انها مو مرتاحه لجيتنا قلت جنتي بسالك من اغلا واحد في عيالك انا ولا خواتي وخواتي عندي ونضحك ومرتبكين قالت اخوك خالد اغلى منكم كلكم الي ماشافته عيني وهو يكبر وتقوم وتقول وينه جيبوه لي والله ماقدرنا نوقف انا وخواتي وخالي صدق من قال قلب الام دليلها طلعت من عندنا وتناديه وهو في الحوش يسمع نداها مادري كيف عرفت ولا ادري وش صار وكيف تواجهو البيت قلب فرح ودموع وغصه وحده من خواتي انهارت من الموقف ماقدرت تتحمل امي سحبت علينا مجلسته جنبها وضامته صح جتنا الغيره منه بس ياحلوها غيره خواتي سحبو علي الي تقول خلاص مانحتاجك والي تقول صابرين عليك وجانا العوض ونضحك نبي نغير جو الدموع اخوي لا ضاق الفضا والدهر شان يبقي علي سود الليالي عضيدي