قصة

👇👇👇👇👇
هنا هاك الواحد والواحد الله في سماه العالي.
_حرمة ورجلها واخت رجلها عايشين في بيتهم مرتاحين ومتوالفين ولاعليهم الا شكر الله
الزوج راعي سفرات كل ماتنا ماتنا سافر يترزق الله ومرته واخيته في البيت كنهن اخيات
المهم::
بيتهم فيه مثل الفتحه تطل على مزرعه وذا البنيه جذيعه ام 16_15 تطل مع ذا الفتحه وتناظر في هالخضره والفاكهة والشجر والزروع وجايز لها مره
وقبلها تقول لمرة اخوها ياليت من ياكل من ذا الارزاق ويذوق هالفاكهه والخضره
فكرت مرة اخوها قالت عندي فكره وش رايك في صلاة الجمعه ولاهنا احد ابد كل الرجال في المسجد احطك في زبيل وانزلك في ذا المزرعه وعبيها بكل ماتبين همين ابسحبه وانزله اخرى واشيلك انت
قالت البنيه يالله زين وفرحت يوم جت الجمعه وراحوا يصلون والاخي مسافر نفذوا خطتهم ونجحت وبتلن هذا شغلهن كل جمعه الا الجمعه اللي يصير الاخو فيه طبعا يفوتنها
المهم بدا جارهم راعي المزرعه يلاحظ على مزرعته انه يوخذ منها وتنقص وفيه أثر احد يدخلها ودور ودور ولا لقئ شي يدله وترصد وراقب ولا شاف شي قال اجل ماعاد الا الجمعه ابقعد منيب مصلي مع الجماعه وابشوف من اللي يسرق مزرعتي
جت الجمعة وقعد يرقب وهن علئ شغلهن نزلت البنت في الزبيل وخذت قاسمة الله وراحت قال ايه اثره انتم اللي مسوين هالسوات هين اوريكن
وتجي الجمعة الاخرئ ولاه ناويهن نيه
وتنزل البنيه في الزبيل ولاه متحبل لها ويصهدها وتجوز له ويقول بها "......" مشفر😁
المهم ويرقيها وتقعد تصيح وتعلم مرة اخيها وش زين فيها وينهبلن وتضيق صدورهن قالت مرة الأخي ماعليك ان شاء الله واللي صار سر بيني وبينك ولاهوب داري احد ابد حتى اخوك منيب جايبه طاري له ويبي يفرجها الله
مرة الايام وبدت علامات الحمل على البنية والنسات
انا لله وش يبون يسوون والابو وش يبي يقولن له
فكرت مرة الاخو قالت شوفي اذا جا اخوك خليك داخل ولا تطلعين ابد واتفقت معها نبي نقول له ان عيونك ماعاد تشوفين بها ولا تنطحين النور ولا ترتاحين الا في غرفة ظلما
جا الاخي وسلم ووين اختي ما وين اختي قالت عقبه جاها قدر في عيونها ماعاد تبي النور ادخل عليها وسلم وباالك تولع سراج اوي اي شي تراها ماتبي النور ابد
وصار يدخل ويسلم وينشد عن حالها وهه وهه
وقالت المرة تعال عندي لك بشاره وقالت تراي حامل ولاها مبطية ماحملت ويطير من الفرح ويستانس ومشت عليه وقايله له مايجيها ولا يلمسها انه خطر على اللي في بطنها يطيح وهي داحيته خلاقين والأخيه علئ ماهي عليه
يوم انه ذاك وفي الشهر الاخير قال الرجل منيب مسافر وابقعد لين تقومين بالسلامه اخاف تحتاجون شي والا اش
قالت لا ابد رح توني ريضه ولا تخلي اشغالك يبي يسهلها الله
وراح وبعد اسبوع من روحته حاقهم الحواق وجا البنيه الولاد وتالد بالسلامه وتجيب وليد تسنه فقشة قمر
ويجي الاخو ولامرته معها الوليد وتبشره جاك ولد واخيك طابت ذكرت لنا حريمة بنت حلال تعالج وجت وعالجتها وطابت ويتحمد الله ويشكره ويستانس
اييييييه
رجع الاخي لسفراته وروحاته وكبر الوليد في السادس والسابع صارت مرة الاخو تحطه في الزبيل وتنزله علئ راعي المزرعه اللي هو ابوه وهو اللي يدري انه ولده ويحببه ويلعبه ويعبي الزبيل من الارزاق ويرقونه
وبتلوا على هالحال يحولون الوليد لبوه وهو صار ماعاد يستغني عنه ابد ووالفه وحبه مره ماعاد ينطح عنه.
جا الاخو يوم من الايام ويسلم عليه جاره اللي هو ابو الولد عند المسجد قال الجار للاخو "ورا غزال عندكم يرمي جنينه عندنا"
وكل ماشافه سلم عليه وقال له ذا العباره
استلقط قلب الاخو وصار يقلبها في راسه وش يبي ذا وش يقصد ووش ووش
علم مرته قال فلان جارنا كل ماشافني وسلم علي قال لي ذا العباره_ ورا غزال عندكم يرمي جنينه عندنا_
قالت اييييييه بعد بعد اجل اذا قال لك هالجمله فرد عليه بهذي"دق دناديش الذهب تلقى امهاته عندنا"
قال زين
يوم سلم الجار على الجار وقال ماقال ورد عليه الاخو بالرد استانس راعي المزرعه وفهم انهم يبونه قال له ابجي اتقهوا معك في بيتك باتسر عقب العصر قال الله يحييك ويخطب المزارع البنيه وتتم الخطبه ويعرسون رجع الاخو لسفراته على جال العاده يوم جا ويدخل ويسلم ويبي الوليد يسلم عليه ولا لقاه قال يافلانه وين وليدي ما اشوفه قالت الولد راح مع امه قال وش تقولين وش امه ما امه
وهي اللي تعلمه بالسالفه من طأ طأ للسلام عليكم
وينهبل ويفرح ويضيق صدره جميع كلش اجتمع عليه ويعاتبها عتاب محب وهو جايز له شغلها انها سترت على اخيته.
وحملت وكملت وفي اصبيع الصغير دملت