عندك محل وترحلو عمالك ؟ تعال أقولك إيش تسوي

أول شيء ... السلام عليكم و رحمة الله و بركاته

ثاني شيء قولو لا إله إلإ الله و ما شاء الله تبارك الرحمن علي و على عقلي النظيف ترى كل يوم أفركة بكلوركس ههههههه أمزح

أذكروا الله عشان تهدو شوية قال تعالى بسم الله الرحمن الرحيم ((الا بذكر الله تطمئن القلوب)) .

ندري أنكم زعلانين و مقهورين و مولعين و شايلين هم الخساير لا يجي على بالكم أن ماحد حاس بيكم .. لأ حاسين و ندعي لكم كمان .

أسمعوني يا أخواني

خذوني على قد عقلي الصغير و جربوا الخطوات هاذي ...

1- سوي لك ورقة على الوورد و أكتب فيها الآتي أو أنسخه بنفس الأسلوب و كبر الخط و لا تنسى تضيف عليها

تعديلاتك و معلوماتك ...

مطلوب موظف سعودي ( بائع ، مرفف أو على حسب اللي تحتاجه ) في ( تكتب هنا نوع النشاط بقالة أو سوبر ماركت أو كافتيريا ) بس لا تكتب أسمه فقط النوع ..َ

بدوام كامل 8 ساعات أو جزئي 4 ساعات ) و نرحب بطلاب المدارس و الجامعات
يتم أستقبال الطلبات في اليوم (...) الساعة ( من ... إلى ... )
و حط وسيلة أتصال و أسمك أبو فلان

2- صور الورقة عشرة أو عشرين ورقة و حطها على أبواب المساجد و أبواب مدراس الأولاد الثانوية و المتوسط و في الجدران خصوصاً الحواري الصغيرة اللي يكثر فيها الفقر

شوف كم متقدم للوظايف هاذي راح يجوك و سعوديين كمان ..!

أتوكل على الله تعالى و أوقف على حلالك بنفسك و علم الشباب اللي راح يجوك و الشغل ماهو صعب كل شيء الآن بالأجهزة و البرامج و على الكمبيوترات إلإ ما يجوك أثنين شاطرين يمسكو المخازن و يرتبو كل شيء و يجيك واحد شاطر بالرياضيات و الحسابات و يحب الكمبيوتر و يمسك شيء ثاني ..
سؤال / العامل اللي جبته من بلده و ترحل الآن ،،، هل جاء و هو يعرف كل شيء ؟ و لا أخذ فترة عشان يتعلم ؟ حتى السعوديين اللي راح يجوك حيكون التعامل معهم و تعليمهم أسهل لأن لغتهم نفس لغتك ..!

أعطي فرصة لشباب بلدك .. يامه في بيوت مليانه شباب من سن 15 إلى 25 سنه و أصغر و أكبر كمان محتاج الشغل ..!

كل شيء في البداية صعب و راح تتعب كثير أحتسبها عند الله عزوجل و أعتبرها لنفسك عقاب لأنك من البداية ما بدأت صح

لا تفكر أنه ماعندهم خبرة و راح أخسر فلوسي .. فكر في الفوائد اللي راح تجنيها لك و لغيرك بسبب خطواتك هاذي

1- يا ما في في شباب وده لو يساعد خواته أو يساعد أمه أو يساعد أبوه أو يحتاج مصاريف لنفسه و يستحي يطلب من أبوه ذو الدخل المحدود أو يكون يتيم و عنده مسؤولية أو .... أو ... أو ... إلخ
2- حتساعد شباب بلدك على التعود على حمل المسؤولية و أستغلال الوقت بشكل صحيح و السعي وراء الرزق الحلال .
3- حتساعد أنهم ينحفظو بعد الله عزوجل من الشوارع و المخدرات و البلاوي .
4- حتساهم في بناء مجتمع راقي في تعاملة و في كلامة الزبون السعودي لما يرى البائع أو العامل سعودي و صغير في السن غصباً عنه راح يحترمو ..!
5- الأهم من هذا كله ... الأجر و الثواب اللي راح تنالو من رب العالمين ، تخيل كم أم و كم أخت راح تدعي لك ..!

حتى الأهالي اللي في الحي عندك بيطمنو لك و يدعو لك و يمكن يبطلو يشترو من المحلات الثانية و يشترو من عندك عشان اللي يشتغلوا عندك كلهم سعوديين و الأهم أنهم عيالهم و جيرانهم و قرايبهم و غيره...!
يمكن ربي يجعله سبب لزيادة رزقك و يطرح البركة فيه ..!

هدية صغيرة في الرابط هذا http://www.m5zn.com/d/?14617355

هذا الرابط يحتوي على ورقه وورد فيها نموذج بسيط لطلب توظيف سعوديين حملوه ( أضغط على كلمة التحميل العادي ثم أنتظر عداد الثواني ثم أدخل كود التحقق ثم أضغط على كلمة تحميل ملف و إذا طفشك الأعلان حق الضمان الذهبي أرفع الصفحة لفوق )

استفيدو منه و ضيفو عليه تعديلاتكم و بعد كذا أطبعوه لعدة نسخ و لما يجوكم المتقدمين للوظايف خلوهم يعبوه .. و بعد كذا أنتو تختارو توظفو مين و تخلو مين .

حاولت أساعدكم باللي أقدر عليه و أتمنى أكون أفدتكم و أحتسب أجري و ثوابي عند الله عزوجل

هذا ما عندي فإن أحسنت فمن الله تعالى ، وإن أسأت أو أخطأت فمن نفسي والشيطان

الموضوع من مجهودي الشخصي .. أختكم : شطوره
.
لا أحلل و لا أبيح ولا أسامح من ينقل موضوعي بدون ذكر المصدر : منتدى مستعمل - العضوة : شطوره
.