تجربتي في علاج عمي من سرطان الكبد في الهند

السلام عليكم ورحمة الله وبركاته ...
اسعد الله مساكم بكل خير ....
نسال الله ان لا يريكم مكروه وان يشفي جميع مرضى المسلمين ....
نحن مررنا بتجربه عصيبه مع مرض السرطان والحمدلله بفضله ومنه وكرمه نجحت عملية الاشعاعي صباح هذا اليوم الموافق 26/6/2018.....!!!

واحببت ان انقلها لكم لعل الله ينفع بها المسلمين...


بداية المرض.

قبل قرابة السنتين اصاب عارض صحي عمي سخونه واحيانا لايوجد سخونه لكنه يشعر بسخونه داخليه..
قام بمراجعة احد مستشفات الجنوب بدون ذكر اسماء لمدة 6 اشهر وكان التشخيص مابين التهاب كلى وحمى مالطيه وقولون .وبعد فتره لاحظ المستشفى شي طبيعي موجود في الكبد فقام بتحويله لمستشفى اخر اكبر في الجنوب واستمرت المعاناه سنه ونص مراجعات بدون تشخيص صحيح للمرض وكانت التطمينات ديدنهم طبعا كان يوجد في الكبد اورام صغيره جدا وكان تكبر بصوره بطيئه جدا ومازالوا مستمرين بالتطمين . وقبل 3 اشهر من الان حصل خلاف بينهم وبين ابن عمي حول الموضوع فسألهم هل قمت بعمل فحص لفيروس الكبد . الكلام هذا سبب لهم ربكه وقاموا بعمل فحص فوجدوا النتيجه ايجابيه اكتشفوا النتيجه بعد خراب مالطه . وايضا الورم اصبح كبير جدا ( للعلم عمي كان لديه ورمين ) احد الاورام 7 سم والاخر ربما 3 . قمنا بارسال التقارير لجميع مستشفيات المملكه المتخصصه في الاورام وكان الرد بالاعتذار عن قبول الحاله .


بعد ذلك قمنا بمراسلة احد مستفيات الهند واخبرنا بقدرتهم على العلاج عن طريق المنسق والمترجم عيسى السوداني جزاه الله خيرا وارسل لنا دعوة علاج من المستشفى .

استخراج الفيزا الهنديه ..


بناء على الدعوه المرسله عن طريق المستشفى قمنا باستخراج فيزا علاجيه ب 375 تقريبا من السفاره الهنديه وقمنا بالتبصيم واستخرجنا الفيزه بعد اسبوع تقريبا بداية رمضان .

في هذه الاثناء اتصل بنا احد الاقرباء واخبرنا بوجود واسطه في احد المستشفيات الكبيره بالرياض استخرنا الله وقلنا يمكن خيره وراجعنا في المستشفى الورم اصبح 15 سم وبعد اسبوعين اخبرونا بعدم قدرتهم واللي نقدر نسويه لكم نصرف له حبوب فيروس بي وحبوب بيولوجيه قالوا لنا نجحت في حالتين في العالم اضرارها الجانبيه تخرع قالوا وقعوا هنا اننا شرحنا لكم اثارها الجانبيه وقعنا واخذناها . رجعنا لدكتور الكبد وقلنا له نبغة تقرير بالحاله جديد علشان نرسله للهند قال ان شاء الله وسالناه عن رايه بالموضوع والسفر للهند قال همهم مادي . قتل الامل صراحه عندنا . اخذنا التقرير والاحباط والقهر وانت تشوف المريض يتالم ولا تقدر تسوي له شي .



بداية الامل .

ارسلنا التقرير الجديد لعيسى في مستشفى بي جي اس جلوبال في بنجلور وقال يوجد علاج وفعال ومدته شهر الى شهرين طبعا جميع مستشفيات المملكه قالوا ماله علاج وهو يقول فيه علاج والدكتور يقول همهم مادي سبب لنا تضارب في الاراء . توكلنا على الله وحجزنا بتاريخ 10 /6 /2018 من جدة الى مدينه بنجلور الهنديه وصلنا هناك تقريبا الساعه 8 مساء بتوقيت بنجلور (فارق التوقيت 2.5 بين بنجلور والسعوديه) طبعا تاخرنا بالمطار والسبب انهم ماشحنوا شنطتي من جده والحمدلله انها شنطي انا الي ماجت لان شنطت عمي فيها الادويه وشنطت ولد عمي فيها التقارير هذا اللي هون الموضوع علينا . استقبلنا سواق المستشفى في المطار واستاجرنا شقه قريب من المستشفى على بعد 300 متر من المستشفى . واخبرنا عيسى ان موعدنا بكره مع الدكتور في تمام الساعه 11 قمت صباح اليوم التالي وذهبنا للمستشفى ..

صباح اول يوم في المستشفى.

الجو في بنجلور رائع جدا وممطر وبارد . وصلنا المستشفى وقابلنا الدكتور سانديب مختص في موضوع الكبد طبعا هناك يعطون المريض حقه من الفحص المريض يجلس عند الدكتور من نص ساعه الى ساعه احيانا. جلس تقريبا 20 دقيقه يتمعن في التقارير وبدى يشرح لنا الكبد وطريقة التعامل معها والطرق المناسبه للقضاء على السرطان بتفصيل ممل لدرجة اصبحنا نعرف طريقة عمل الكبد . اعطانا اوراق تحاليل دم وقال لازم نسوي منظار للمعده من الداخل نشوف هل تاثرت من الورم . بالنسبه للاشاعات ارسلنا لقسم الاشاعات وقال خلهم يرفعون السي دي على الكمبيوتر وروحوا لدكتور الاشعاعي روهيت شوفوا هل يكتفي فيها والا لا المهم طرف لنا حبوب كثيره لتنظيم وظائف الكبد وللمعده . وقال افضل شي سويتوه انكم ما استخدمتم الحبوب البيولوجيه اللي صرفها لكم المستشفى اللي بالرياض . كان انتظرنا فتره طويله لين نصفيها من جسمه لانها تسبب انكماش للورم وبكذا ماعاد ندري وين عروقه . سوينا التحاليل. وودينا السي دي لقسم الاشاعات .ورحنا الشقه تقريبا الساعه 5.



طريقة TACE و طريقة TARE

الكبد يوجد فيها 3 شرايين رئيسيه مغذيه للكبد . وشرايين فرعيه متصله بالشرايين الرئيسيه .

طريقة TACE : الطريقة هذي فقط تكون كيماوي وتستخدم في حالة كان الورم فقط موجود على احد الشرايين الفرعيه .

طريقة TARE : تستخدم في حالة الورم موجود على احد الشرايين الرئيسيه الثلاثه .


صباح اليوم الثاني .

ذهبنا للمستشفى الساعه 9 لعمل المنظار للمعده تفاجئنا بدكتور الكبد هو من سوف يقوم بعمل المنظار . سالنا عيسى يقول الطبيب هذا لازم يسويها بنفسه علشان يتاكد وزايدة حرص . ويحب يسوي شغله بنفسه . طبعا حطوا لنا خيارين يسوون له بنج وراح يتاخر او انهم بدون بنج وفي خلال 10 دقايق يخلصون . استخرنا الله وقلنا بدون بنج قالوا ترى عادي يطرش بس اهم شي لايسحب المنظار . الحمدلله تيسرت وسويناها بدون بنج . اخذنا فطور لعمي وافطر وذهبا لمقابلة الدكتور روهيت المختص في العلاج الاشعاعي واحد طاقم الطرق اللي شرحتها سابقا . قال الاشعاعه قديمه جدا لها شهر ونص وهذا غلطنا لاننا ما اخذنا السي دي حق اخر اشاعه من الرياض .قال لازم اشاعه جديده لانها هذا سرطان وينتشر ولازم نشوف وين وصل. قال سووا الاشاعه الساعه 5 لان عمي افطر ولازم الاشاعه وهو صايم . سوينا الاشاعه الساعه 5 ورحنا للشقه .


اليوم الثالث.

حجز لنا عيسى موعد مع الدكتور الساعه 11 ونص لكن الدكتور تاخر لوجود حاله طارئه وصل الدكتور الساعه 2 تقريبا وقال لنا التحاليل سليمه وبالنسبه للاشاعه الجديده ماشفتها لكن احتمال على اخر اشاعه نستخدم معه طريقة TACE اللي هي فقط كيماوي . لكن روحوا للدكتور روهيت هو اللي راح يكون عنده خبر في الموضوع . نزلنا للدكتور روهيت ودخلنا للاشاعه وقال للاسف طريقة TACE ماتنفع معه الورم . هناك ورم بطول 17 سم مقفل الشريان الرئيسي الايسر تماما وورم اخر مقفل نصف الشريان الاوسط . يعني شريان ونص مقفل . وقال ماينفع الا طريقة TARE وباذن الله تكون قاضيه على المرض . لكن ارجعوا للدكتور سانديب دكتور الكبد يعطينا الضوء الاخضر لبداية اجراءات TARE .

رجعنا للدكتور سانديب وقال لازم اول شي ترفعون البروتين لانه في التحليل نازل والشي الاخر البروبلين لازم مايوصل 3 نهائيا . واحنا راح نجتمع واحتمال ننومه الاحد علشان نبدا بالعلاج الكيماوي . بالنسبه للعلاج الاشعاعي لازم نتاكد من التحاليل الاسبوع القادم يقصدون البروتين والبروبين . طبعا وقتها كان يوم الاربعاء . اجتمعوا وفي الاجتماع حضر الدكتور ايتوربا عنده الزماله البريطانيه الامريكيه يقولون هذا مابقي شي يدرسه . المهم اصر انه يتنوم اليوم وياهذ الجرعه اليوم الثاني لان الورم رباعي النواه وينتشر بصوره مخيفه . دقوا علينا وقالوا تنويم وبكره الكيماوي . تنوم عمي طبعا الكيماوي عن طريق القسطره من اليد يدخلون الين الكبد ويضربونها كيماوي ومع الكيماوي ماده ملونه بعدها سوينا اشاعه بمستشفى ثاني علشان يشوفون اذا ضربوه الاشعاعي في المرحله الجايه وين راح يوصل مدى الاشعاعي هل راح يوصل لعضو اخر . النتائج طلعت فوق الممتازه . وطلع الساعه 6 العصر . قالوا تعالوا بعد 6 ايام علشان نسوي التحليل وبناء عليه نقرر الاشعاعي . وماراح نقدر نسوي له طلب الا اذا الحاله مستقر والتحاليل سليمه .قيمة عملية الكيماوي كلفة 2700 دولار




بعد مرور 6 ايام من اخر تحليل سوينا تحليل طلعت نتائج التحليل كويسه لكن البلوربين مرتفع شويات 2.2 كلم الدكتور سانديب الدكتور روهيت واعطاه الضوء الاخضر في طلب الاشعاعي . ومشكلة الاشعاعي يجي من فلوريدا على سنغافوره ومنها على الهند ولازم ترفق معه الاشاعات والتقارير ونتيجة عملية قسطرة الكيماوي علشان يرسلونه لك . المهم قالوا هذا راح ياخ له اسبوع تقريبا . فالدكتور قال الحين لازم تستخدم الحبوب البيلوجيه اللي صرفوها لك بالرياض ليش يادكتور قال لانه الكيماوي راح يوقف الورم 16 يوم واحنا ماندري متى يجي الاشعاهي يمكن يتاخر وبعد 16 يوم راح يرجع يقوى بشكل جنوني خصوصا اللي عنده ورم رباعي النواه . لكن الحبوب هذا بتخليه منكمش لين يقرب موعد الاشعاعي . طبعا اعطيناهم مقدما 25 الف دولار . قيمة العلاج فقط من فلوريدا 21 الف دولار . تكلفة العمليه كامله 30 الف دولار .



استخدام حبوب البايلوجي متعب جدا جدا للمريض لكن الحمدلله قدر انه يتحملها 5 ايام بعدها رحنا للدكتور وكلم الدكتور روهيت وتاكد موعد وصول الاشعاعي يوم الاثنين الي هو امس فقال الدكتور وقفها خلاص وانا راح اعطيك حبوب تنظف الجسم من اثارها . صرف له حبوب والحمدلله يوم عن يوم تحسن .



يوم الاثنين والاثار الجانبيه المحتمله .
طبعا الدكتور اعطانا اوراق تحليل وقال بناء على التحليل راح نعطيكم الاثار الجانبيه المحتمله .
سوينا التحليل الصبح الساعه 9 وقابلنا الدكتور الساعه 4 وقال البلوربين وصل 2.8 وعلى كذا الاثار الجانبيه المتوقعه من العمليه راح ترتفع نسبتها من 10 الى 15 بالميه منها نزيف من الكبد اسهال خمول كسل ويمكن يموت ويمكن يقوم بعد العمليه ماكان صار له شي . قلنا له في حل ثاني قال لا واذا ماسواها ماراح يكمل 4 شهور . قلنا توكلنا على الله ونومناه .



يوم الثلاثاء يوم العمليه .

في الصباح الساعه 9 نزلوه غرفة العمليات وسووا له تخدير موضعي وسووا له قسطره ومن خلالها ضربوه بالاشعاعي في الساعه 11 وربع طلعوا من العمليه وبشرونا الدكاتره بنجاح العمليه بدون اي مضاعفات ولله الحمد .وحوله لقسم التنويم وسجلوا الدكاتره هذه العمليه في السيره الذاتيه لكل دكتور بسبب كبر حجم الورم ونجاحها بدون اعراض جانبيه .. ان شاء الله يومين في التنويم و3 ايام مراجعات ويرجع للسعوديه


حبيت اشارككم تجربتي للفائده . ولعل الله ينفع بها جميع مرضى المسلمين ..


احب اشكر المنسق عيسى اللي والله ماقصر معنا قمه في الاخلاق والتعامل . لولا الله ثم اصراره علينا للمجئ ماكان توفقنا بالعلاج .