تجربتك مع مطعم لم تكن جيدة ؟ تفضل اذكرها

كان لي تجربة في الاكل من مطعم تاكو بل بالخبر بالواجهه البحريه
اوافقك فيما تقول فهو أسوء مطعم قد اكلت منه

مطعم كوبرشندني المختص بالاكلات الهنديه بالخبر
اول شي قد اكلت منه بالصدفه وماعجبني واسمع الناس كلها تمدحه وبقوة واستغربت
وبعد ماتزوجت رحت له من جديد لان قلت الناس كلها تمدح الا انا خلني اعطيه فرصه ثانية
وللأسف اسعار غاليه على شي عادي وفيه مطاعم بديلة وبإسعار أقل وطعم أفضل

الله يعين ..
ذكرتني بمطعم ماني فاكر اسمه .. ولكن هو في حي المصيف ..
بجوار مطعم عمان ..

المطعم بسيط ولكن يبيع جميع انواع الساندوتشات والاكلات الخفيفة
شاورما بروست بيتزا فطاير ..
قلت خليني اخذ ساندوتش شاورما ف طلبت 2 شاورما دجاج وحريص انه ما يحط شي معاه غير البطاطس .. ولكن الله وكيلك .. لقمه وحده ورمت الساندوتشين في الزبالة والله العظيم لدرجة اني قلت حرام اتصدق فيه لاحد ياكله من قرفه اعوذ بالله ..

ومرة ثانية ماتبت .. قلت ياولد المطعم شكله مشهور بالبتزا لاني لقيت الناس كلها تطلب بيتزا من عنده ... قلت خليني اخذ وحده بيتزا ..

والله نفس الشي .. لقمة وحده ورميتها بالزبالة والله ... وعليها الان لو يقولوا ايش ما اكل فيه

الله يعز النعمة بس

مطعم هرفي بجده شارع الستين بعد ما اكلت فيه أنا وأولادي جانا كلنا تسمم غذائي وعملنا غسيل معده ومن ضمننا طفله عمرها 4 سنوات الحمدلله ربنا لطف

تاكو بل مطعم عالمي (فاست فود)

وكل مطاعم الفاست فود تعبانه

ويقولون ان فروعه كلها اللي برا السعوديه اجود

وقرص التاكو كذا نظامه يجي هش ويتكسر بنظامهم

واضح اللي اخذ وكالتهم ما عنده خيره

ـــــــــــــــــــــــــــــــــــــــــــــــــــــــــــــــ

تجربتي السيئه بالفتره الأخيره بعد ما اهلي انقص عليهم بسالفة مطعم (ايطالي)

دور لنا مطعم ايطالي... يحسبون انهم بإيطاليا

المهم رحت فيهم بالخبر ولقيت مطعم اسمه الجندولا... او (لي جندولا) بالايطالي

متوسط اسعار الباستا (المكرونه) بين 40 و 50 ريال

الى الحين مسجل اللي طلبت بالنوت

طلبنا فيوتشيني (مكرونه شرايط)... حاطينها بقاع صحن ما تكفي نصف نفر... وكاتبين انهم هم صانعين العجينه والنصابين شكلها جاهزه

وغير ان طعمها مش حالك... مكرونه جاهزه وصوص ب 55 ريال يا ناس

وطلبنا شغله ثانيه الله لا يوريكم اسمها مانيولي ال فورنو ب 55 ريال

جاب الطلب قطعتين صغار من صغرهم اقدر اغبيهم بيد وحده.. قلت ما عليه شكله فخم.. ذقت لقمه الا طعم زفر مو لحم مو بيض مادري وش الطعم

والله ما كملته ولا تهنينا... لو خليناها فول قلابه والله افخم واحسن

تقييمي للمطعم 1 من 10

انا جربت ثلاثه مطاعم روعه الاول كوتشي باتشي بشارع التحليه لحمهم وشويهم لذيذ جدا وفطائر الحم جنان وعندك مطعم لوسين بسنتيريا روعه بس غالي وجملهم مطعم باب اليمن بشارع التحليه. جهه التخصصي روعه خبز الملوح مع فخاار الدجاج نسيت اسمه وايضا المظبي روعه واكلاتهم كله جديد ومنوع انصح به

^^^

حور فاهمه غلط

نتكلم عن اسوء مطاعم :) هههههههههههههه

أعزائي

M1900M
وسيط 2007
mohmmedn22
yfz

أختي الكريمة حور

شرفني مروركم العطر

الطازج
اصبح حرامي كبير ووجباته كل يوم تزيد ريال وغير كذا اخر مره املت نن عنده الدجاج كان محمي وماهو مازه وصار شغله ردئ الحمدلله

وبيتزا هت عروضهم مغريه لكن تختلف المكونات وناهي بنفس جودة اللي بدون عرض

عندك الرومانسيه احس شغلهم جدا عادي موعلى الدعايه اللي الناس تقول

اما اسأ تجربه في الرياض كانت عند الكندي للمندي بصراحه انخميت فيه ابدا موب على مدح الناس له

كل ما حصل لكم شيء جميل
لكن مثلي لالالا رحت مطعم بحري بالدمام بالكورنيش الخبر المهم ما اعرف اسمه الا انه الا ن مغلق ما ادري وين هجو
المهم صاحبكم يحب الجرائد وطلبت شربه بحريه بثمار البحر ياعيني
وانتظر الطلب الثاني يجي ومتابع صاحبكم في الجريده
اخذ كذا ملعقه حليوه وفي هاللحظه في فمي شبه الضفدع ابو ذنيبه
لا لا مش مصدق يوم طلعتها ياعيني بثمار البحر
ههههههههههههههههههههههههه ضفدعه بشحمها ولحمه ابو ذنيبه
واناديهم وارفع الصوت عليهم حاولو يهدوني قلت الشرطه اعتذرو ياخوي ياعمي قلت الشرطه والبلديه التفو الناس والله ضفدع المهم بلعت العافيه وهجو الزباين كلهم معي وتووووووووووووبه جيته بعد فتره مقفل

عزيزي السنايدي. شرفني مرورك وتجربتك واتفق معك تماماً فيما كتبت وأشوف ان الرومانسية مجتهدين ويحاولون يطورون من أساليب الطبخ وتقديم الوجبات .

عزيزي ابو فيصل 2

شرفني مرورك وبصراحة هذي مهيب تجربة سيئة هذا فلم ، أشكرك على المشاركة والطرح والله يلوم اللي يلومك
لكن زين ان المطعم قفل وهجوا الزبائن

تجربيتين سيئتين الاولى: الناضج ( لحم غير مستوي واحشاء الخروف عالقة فية )
الثاني: الرومانسية: رائحة الأكل غير مستساغة إطلاقا للحم فقط

تدري يارخيص وكويس
اني احب اكل من مطاعم القطيف وصفوى اضمن
اكيد بتستغرب وبتضحك
لان الشيعه عندهم حرام ياكلون اللحم او الدجاج مجمد
فتلقى المطاعم كل اللحم والدجاج اللي فيها بلدي

اسوأ مطعم اكلت فيه بالحمراء اسمه حرارة الخفة على اساس بحري مغربي تعبااااااااااااااان بكل ماتعني الكلمة سيء غالي غش واضح حسبي الله عليهم

الافضل

مكاني بالرياض التوب في الهندي

القرية النجديه اكثر من رائع

باب اليمن بالرياض كذلك ممتاز الفخار هو اسمه عقدة عندهم

النافورة بوفيه مفتوح ممتاز كذلك ب 120 نفر

كرم بيروت بالرياض جربته لكن ماهو مثل فرع دبي من حيث التعدد لكن لا باس فيه

الاسوأ

الشرفة مع الدعايه الي عليه لكن ما اعجبني بالرياض طبعا

ستيك هاوس بالياري مخرج 6 اتوقع جابو لي ستيك حق نفر الله يديم النعمه ماكان مستوي تقول مطاط

والقائمة تطول لكن ناسي بعضها

أعزائي

Mahdi 1981
شرفني مرورك العطر

المجالي
حرارة الخفة أمر من جنبه أحسبه محل مساج :) نكته ان طلع مطعم

A96a
اتفق معك فيما ذكرت وخصوصا ستيك هاوس طلبت سلمون يكون مستوي
جاب لي السلمون محرررررررررروق كني اكل فحم وناديت الجرسون ورؤيته السلمون وقام بدله لي بعد انتظار 25دقيقة. وجاب لي شريحة سلمون نية !!! ناديت مدير المطعم وقلت له ترى انا جاي استأنس وهذا شكله مأخذ الموضوع معابط ،قام المدير قالي بطلب لك واحد ثالث !!!!!لكن تنتظر 25دقيقة قلت له إلا مشكور وماراح أجي هنيا ثاني وأعطني الحساب حتى الشباب اللي كانوا معي قضوا من العشاء من زمان ،هنا المدير جاب الفاتورة وخصم قيمة السلمون وقدم اعتذاره وطبق حلى مجانا ، شكرته وطلعت طابت النفس من المطعم ولاذقت الحلى

وسرى الليل وأنا والسلمون ماسرينا

ستيك هاوس ماشي على الطريقة التقليديه الامريكيه medium rare

بيجيك شبه ني بالداخل

اذا تبيه مطبوخ ناشف قل له well done (ويل دن)

يعتبرون ال (ويل دن) محروق وما يصلح

انت خلك مبتسم دائماً في وجه الكاشير
و خله يبتسم معك و كلمه بطريقه حلوه
مو بطريقه تباهي ولا ترافع ولا غيره
وجرب وشوف كيف الاكل الي بيجيك
قبل كنت اشتغل في مطعم كاشير
كان الي يكشر و يترافع علي اغمز للعمال و هم يتفاهمون مع الاكل حقه
خلك بشوش الوجه تعيش باقي الدهر محبوب

و السلام عليكم...

أخوي yfz

من خلال الردود يتضح بان ستيك هاوس رديء

أخوي الإخبارية

وجهة نظرك احترمها لكني الحمد لله احترم الآخرين ولا اتعالى على احد وكلنا بشر لكن نتوقع دائماً عندما نحل ضيف على أي مطعم بان يكون المحاسب وطاقم المطعم بشوشين او إيجابيين على الأقل وغير مكشرين .

وسامحني لم افهم قصدك بانك تغمر للعمال ويتفاهمون مع الأكل حقه !!!!!!
أتمنى ما تكون سبب في إعانة الشيطان على إخوانك المسلمين خصوصا في الأكل فهي أمانة حتى لو أخطا الشخص بحقك

لك كل ودي واحترامي