السلام عليكم ورحمة الله وبركاته
حبايبي حي الله كلن بإسمه
وصبحكم الله بالخير للي بالصبح
ومساكم الله بالخير للي بالمساء
العلم اني نويت والله يقدرني
اطلع ليموزين ...
ايه ليموزين ...
ابو لمبه
عشان تركب الكلمة صح ياليل ابو لمبة
المهم ياحلوين
رحت لبرنامج عبداللطيف وهو اوفر وافضل من برنامج الملك عبدالله لسيارات الاجرة
والسبب /
ان عبداللطيف مايجبرك تغير المهنة الى سائق اجره عكس برنامج الملك عبدالله اللي يخليك تغير المهنة بالاحوال المدنية
نجي للأهم
انا احترت بين
الكامري 2012 ليموزين
الاينوفا 2012 ليموزين
مدري هذي او هذي
لأن نظام الكد عندي بيكون نهاية الاسبوع فقط وممكن كم مشوار بالايام العادية
الكامري قسطها اعلى من الاينوفا بشوي
الاينوفا عائلية وانا ماعندي عائلة لكنها تشيل 8 - 9 ركاب
الكامري شبابية وحلوة لكنها تشيل بالاقصى 5 ركاب + السائق
ومحتار بين الاثنين
السلام عليكم ورحمة الله وبركاته
اولا: الله يرزقك من حيث لا تحتسب ..
ثانيا : ابعد عن الكامري وخذها نصيحه وبما ان قسطها اعلى من الانوفا فلا تفكر فيها لان الانوفا سيارة مكده وشكلها ممتاز وقسطها على كلامك اقل فما فيه شي من وجهة نظري يخليك تحتار لان الكامري الجديده شكلها صار جدا سئ ..
والله يوفقك لما يحب ويرضى .. تقبل تحياتي ..
بس ياخي كبيرة حقت عائلة وانا ماعندي عائلة
الاينوفا مكينة هايلكس ومكيفين
ومكدة للصغير والكبير
وقطع الغيار ارخص وفي استهلاك الوقود اقل
قبل اسبوع نزلت في مطار الرياض والكداده شيل صراحه فيه كذا سياره
لاكن يوم شفت الانوفا وسيعه وبنفس الوقت صغيره يعني تصلح للعائله الصغيره والكبيره ولا
تزمل إذا العدد اكثر من 5
خذلك انوفا ولا تشاور ..خاصه انك تبي تكد عليه
أول شي الله يرزقك ويوفقك .
ثانياً : القير لابد أن يكون أوتو وأبعد عن القير العادي مادامك في الرياض .
ثلاثاً : كل السيارتين حلوه لكن على سحب استخدامك هل سوف تستخدمها في وسط الاسبوع لأعمالك الخاصة مثلاً ( هنا نقول خذ الكامري أخف وافضل ) لكن اذا كان استخدامك فقط في نهاية الاسبوع خذ الاينوفا افضل وأوسع من الكامري وزباينها أكثر خاصة في الاسواق و قاعات الزواج و الاستراحات ... والمعروف أن اكثر من يستخدم سيارات التاكسي هم النساء ...
رابعاً : في حالة البيع بعد فترة كل السيارتين بيعها سهل ولا تفقد من سعرها الكثر ...
والله يوفقك
آلله حيه ..
الآينوفآ ومآبي ازيد الرجآل مآقصروآ
بالتوفيق ..
الله يحييكم
بس ياخي انا مخطط استخدامي نهاية الاسبوع + خطوط فهو افضل من ناحية الدخل ومن ناحية عدم كرف السيارة بالمطبات بالشوارع الداخلية للمدن
لأن بيكون عندي دوام وسط الاسبوع ونهاية الاسبوع احمل كم واحد وعلى المنطقة الفلانية
وطول الخط مانيب راعي سرعه حدي 150 - 160 اقصى شيء
والاينوفا عند تحميل ركاب بين المناطق تاخذ وقت عكس الكامري بسرعه تحملها
ياخوي
نصيحة ابعد عن الكامري الجديدة لأنها استرالية الصنع والصناعة الأسترالية فشلت عندنا ماهي مرغوبة
الأينوفا أفضل لأن صناعتها يابانية وأقتصادية صحيح انها لك عليها بالخطوط بس صالحة لداخل الديرة
لو انك ماراح تاخذ الأينوفا ماأنصحك بالكامري
وبالتوفيق ان شاء الله .
اذا تبي عن الاسترالية ترى 2002 استرالية
و2003 استرالية
كل الموديلات استرالية
ماعدى 2007 الين 2011 ماليزية
الاينوفا وبس
شكلي بحول على الاينوفا بس
والله شكلها غلط لأن استخدامي لها داخل المدينة قليل
وعليكم السلام
ترا الانوفا اندونيسي مو زي ماقال عتيج ياباني
والصراحه حيرتنا معك
الكامري سواقتها احسن والانوفا حجمها حلو انت حدد وش استخدامك ووش الاماكن الي بتشتغل فيها
استخدامي داخل المدينة شخصي من البيت للعمل وممكن يتخللها مشوار مشوارين على حسب المزاج
ونهاية الاسبوع خط
أخوي اذا صار استخدامك خط خذ الكامري ...
لان على ما أظن أن ماكينة الانوفا ماكينة هايلوكس وهي تصرف بنزين على الخطوط الطويلة ...
بعكس الكامري لا تصرف لا الداخل المدينة ولا على الخطوط الطويلة اذا لم تتجاوز سرعة 140 كيلو ولا انت من نوع اللي يدعس كثير ...
وانا رشحت في رد السابق الانوفا لاني كنت متوقع أن استخدامك داخل المدينة ...
وموفق .....
الانوفا تجميع ( إندونيسي )
الكامري تجميع ( استرالي )
وكلها فيها حقها , الكامري أكثر تحمل وأرسى واصغر
والانوفا أكبر وتتحمل بما إنك بتستخدمها ابو لمز
الله يرزقني ويرزقك من فضله
شوف عزيزي
احنا سيارتين عائليه كيا كارنفال 2008 ماشيه للحين فوق 270 الف استخدام اكثر من شخص
وبعدها جتنا انوفا جائزه 2011 استخدامها سنه دماااار
والله الكيا اريح بكثير واقوى 6 سلندر واكبر وارسى والبودي اقوى وانظمه الامان اكثر
الانوفا خفيفه مره تلعب وصوت المكينه عالي لانها 4 سلندر والبودي وووورق وانظمه الامان معدومه
الكامري افضل
الكامري افضل
مادام تبي الكامري ... خذ الكامري ... لاتاخذ سيارة مالك نفس فيها
السيارتين ممتازة مادامهم تويوتا ... حتى لو وحدة مجمعة في استراليا و الثانية في اندونيسيا
اذا تبيها مكدة خطوط طويلة الكامري زينة والانوفا زينة لكن لاحظ هالملاحظة المهمة جداً وبأمكانك التأكد منها من خلال زيارتك لمواقع التحميل في المدن سوف تجد أن الزبون يبحث دائماً عن الكامري لانها تحمل على طول بينما الانوفا تحميلها ثقيل وما يجيك الا صاحب العائلة وماهم كثيرين
بالنسبة للانوفا فاكثر شغلها في جدة ومكة في المواسم يعني رمضان والحج ماشاء الله ماتوقف بينما راعي الكامري ما حياكل عيش مع راعي الانوفا
في كل الحالتين وخذها نصيحة في الخطوط (للمكدة)ما ينفع الا القير العادي فقط