| جميع الحقوق محفوظة © |

الشريطي لص ام تاجر

بسم الله الرحمن الرحيم
والصلاة والسلام على النبي الامين ،،، اما بعد
من النادر جداً أن لا يمر يوم او يومين وانا اتصفح مواقع بيع وشراء السيارات
دون ان أشاهد اعلان لسيارة وقد ذكر بها المعلن ،،،
عبارة ( شريطي ) او ( الشريطية ) ك أشارة منه لتذمرة من هذه الفئة من البشر
وقد كنت اتصفح احد هذه الاعلانات قبل قليل
لأكتشف ان الامر قد تطور الى ان يستحدث الناس مثلاً جديداً
يتعلق بالشريطية وهو المثل الذي يجعلك تستغرب منه
( جنة الشريطية معارضهم )
لن اتحدث عن هذا المثل فهو غير مهم بالنسبة لي
ولكن المهم لدي ان تصل الفكرة التي تدور في رأسي اليكم
واترك لكم حق المناقشة وتقديم وجهات النظر فيما اقول ..
دعونا نبداءً معاً في تعريف كلمة ( الشريطي )
الشريطي
هو مصطلح شعبي يطلق على تاجر السيارات .
ولكن بمجرد ان يسمع العامة عبارة شريطي سيارات
يذهب تفكيرهم مباشرة الى ان هذه الشخص
سارق لأموال الناس ويجب الحذر منه وليس كأشارة صحيحة الى أنه تاجر سيارات .


لكن دعوني اعترف لكم بأمراً
انا لست شريطي واشهد الله على ما اقول
ولكني ابيع واشتري بالسيارات كمستخدم فقط

والشريطي هو تاجر يبيع ويشتري بالسيارات كما ذكرت قبل قليل لكم
يشتري بنظرةً مستقبلية على امل ان يكسب بهذه السيارة ( الربح )

كذلك المضارب بسوق الاسهم يشتري الاسهم بنظرة مستقبلية
على امل ان يرتفع سعر السهم لقيمة معينه ( ربح ايضاً )
لاحظ ان التوجه واحد ( الربح )
والفكر واحد ( النظرة المستقبلية )
رغم اختلاف الاسواق (سوق المال ومعارض السيارات)

السؤال / لماذا كل هذا الهجوم على الشريطية !

بالرغم ان الشريطي بلغة الاعمال / هو زبون مؤكد وليس زبون محتمل
وهو شخص اكثر جدية بالشراء من المستخدم العادي
كذلك الشريطي هو الشخص الذي يلجئ له الجميع عند رغبتهم في شراء
سيارة ليقدم لهم النصائح والاستشارات !!
فكيف نعيب الشريطية ونتذمر منهم ونقدم لهم الشتائم
وبنفس الوقت نلجئ لهم عند الرغبة في الشراء ..
انه تناقض عجيب ..

اذا كان الجواب منك يا صديقي ان الشريطي (شخص يقوم بتكسير اسعار السيارات ) :
- فالجميع يستخدم سياسة التفاوض وهي حق مشروع للجميع وكذلك الجميع يرغب
بأن يحصل على سلعة بسعر غير مكلف ورخيص جداً وانا وانت منهم .

والاهم ان السلعه لن تابع الا بموافقة المالك
فالمالك هو من يقرر البيع او الاحتفاظ بسيارته .

واذا كان الجواب
( بسبب تصرفات البعض منهم المعيبه مثل تعمد تكسير السلع او بخسها أو وضع عيب فيها ) :
- كذلك يحدث بسوق الاسهم من تنفيذ اوامر مخالفة لسياسة السوق وليست فقط بسوق الاسهم الذي
ذكرته كمثال بل في جميع الاسواق هناك تصرفات غير اخلاقية ( الاخطاء في كل الاسواق)

اذاّ اين المشكلة !!
المشكلة من وجهة نظري الشخصية ان الجميع
اصبح يستخدم اسم الشريطي كتسويق لسلعته ولرفع قيمتها السوقيه .
حيث ان تشويه سمعة الشريطية المتراكم من سنين جعلت الناس تنفرمنهم
وتهرب منهم الأمر الذي استغله البعض لتسويق سيارته كأشارة منه لنظافتها
وبأن هذا الشريطي القذر لا يصلح أن يركبها او أن يشتريها مع العلم ان الشريطي قد يشتري
سيارة افخم منها واجمل منها وقد تصل قيمتها لملايين الريالات بعكس سياراتك تماماً .

فا بمجرد ان يسمع الزبون او زائر موقع حراج لكلمة السياره ليست للشريطية
يتبادر في ذهنه ان هذه السياره نظيفة بسبب عدم رغبة مالك السيارة في بيعها لتجار السيارات .
والدليل ان هناك من الاخوة المقيمين يعملون بمعارض السيارات لم يقال عنهم كلمة شريطي
ك أشارة الى أنه لص يريد ان ينهب سيارتك منك
بينما ما تزال تطلق على الشريطي ( السعودي ) .
الاخوه الشريطية المقيمين
هم الان في منافسة شرسه مع السعوديين ( تجارياً )
بسبب ضعف القوانين الرقابية على معارض السيارات لدينا
لذلك يلجئ الشريطي المقيم للاستيراد من الخارج والظرب بأرباح خيالية
ومع هذا لم نسمع كلمة ( شريطي ) كأشرةً لقذارة هذا الشخص للشريطي المقيم .

ما اريدة ان يصل للجميع
ان عملية التفاوض هي حق مشروع للجميع
ويجب ان تستخدم هذه العملية في عملياتك التجارية
اياً كانت حيث ان اكبر المنظمات في العالم تقوم بأستحداث إدارة متخصصة
فقط ( بعملية التفاوض )
بل البعض منهم يقوم بجلب خبراء للتفاوض ؟
لذا يجب ان نفرق بين عملية التفاوض وبين عملية بخس السلعه .

كذلك يجب ان يعرف الجميع
ان السيارة لن تباع الا بموافقة المالك
ولن تشتري الا بموافقة المشتري
لذا احرص على ان لا تنطبق عليك مقولة
( القانون لا يحمي المغفلين )

فالقانون قد كفل للجميع حريته الشخصية وحرية فحص السلع والتفاوض عليها
لذا كنصيحة جوهرية اخيره ،،،

احرص من الاعلانات التي يذكر بها
( السيارة ليست للشريطية )
لئن نظافة السيارة هي المسبب الوحيد لأرتفاع قيمتها من وجهة نظري .
وفقني الله واياكم لما يحبه ويرضاه ، والسلام عليكم
اخوكم خالد

وتابعوني على سنابي الخاص
الذي اقدم فيه استشارات تجارية وتسويقية ،،
وكذلك قدم فيه دورات مجانية عن اساسيات الاستثمارات
وكل ما يتعلق بالاقتصاد وسوق المال وريادة الاعمال

الردود
الكل: 8
1.
12:17:40 2016.02.09 [مكة]
بختصار الشريطي لص وبكل تأكيد ومن خلال تجارب كثيرة حتى قلت لاتثق بالشريطي ولو كان اخوك المحب لك
2.
12:24:58 2016.02.09 [مكة]
اذا بنحسب الموضوع بهذه النظره اذا المشتري مغفل !!!!!!
3.
عضو قديم رقم 320572
14:27:44 2016.02.09 [مكة]
موضوعك حلو، يُبين مدى التناقض عند البعض.
4.
14:38:08 2016.02.09 [مكة]
في البداية شكرا لطرحك لهذا الموضوع. الشريطي اخي الكريم بالمفهوم العام هو تاجر السيارات. بالتأكيد كتاجر يحاول ان يشتري السيارة بارخص الأثمان لزيادة ربحه و للمشتري الحق في رفض البيع. كما ذكرت التفاوض حق مشروع للجميع. لكن ما يميز البعض من هذه الفئة ( اكرر هنا قول البعض و ليس الجميع ) هو الحلف الكاذب او تزوير بعض المعلومات عن السيارة اذا كان هو البائع. او التخريب على بقية المشترين. حتى ان البعض يعرض عليك مبلغ مناسب لاجل يسحبك من الحراج و بمجرد ما تروح المعرض لاتمام البيع يغير كلامه و يبدأ ينكر العرض اللي اتفقت معاه اثناء وجودك في الحراج. بالاضافة ان البعض يستغل حاجة الناس للبيع السريع و حاجتهم للسيولة و يستغل الوضع في بخس السيارة و لا يقدر ظرف البائع المحتاج. هذه الافعال هي التي جعلت اغلب الناس لا يحبذوا التعامل مع الشريطية لانعدام الثقة و سوء الخلق. اكرر كلامي في قول البعض. اخيرا البعض الاخر من الشريطية اخلاقهم عالية و صادقين في تعاملهم و يراعون غيرهم لكن للاسف سمعتهم ضائعة لانهم اقلية و حسب خبرتي المتواضعة ما واجهت الا اثنين من النوع الثاني مقابل العشرات من النوع الاول
5.
14:58:52 2016.02.09 [مكة]
شوف المشكلة الأساسية ... هي في الفكرة اللي حاطينها الناس بروسهم على الشريطي او تاجر السيارات .. واليوم احنا نشوف ناس يكتبون مثل ماتفضلت جنة الشريطية معارضهم وهو عارض سيارة وطالب مبلغ اعلى من سعر الوكالة .. :) ولا ويقولك مافي في الوكالة الان .. طيب الوكالة طبيعي مابدفع اليوم واستلم بكرة طبيعي تاخذلها 15 يوم مثلاُ .. لذلك في شريطية بيع وفي شريطية شرا .. طبعاً الشريطي هو اكثر واحد جاهز يشتري سيارتك بحالتها ( المخفية ) لانه هو بالأساس كاسر سعرها عشان يتكسب فيها .. ولكن الشريطي الأصلي اللص هو اللي يبيع لك سيارة وفيها عيوب ويخفيها عنك ويحلف مليون ايمان ان السيارة مافيها ولا شي ... بالنسبة للشريطي اللي يشتري .. هو شخص يحط اسوء الاحتمالات في مكسبه لذلك يحط لك ادنى سعر ممكن ... طبعاً البعض منهم يرمي لك سومه سيئة جداً في البداية والسبب ممكن تبيع انت ف يكسب هو ...
6.
13:35:01 2016.02.10 [مكة]
طيب اللي يبيعون ويشترون في المستعمل مثل الاثاث والجوالات والعقارات وللاسف فيها غش مالله به عليم وش تسمونهم؟ المقصد من كلامي ان كل سوق في غشاشين وفيه ناس تخاف الله في بيعهم ومشتراهم يعني الشخص اللي يخاف ربه ويبيع ويشتري في السيارات يتريقون عليه البعض بالشريطي وهذا يبين في كلامهم انا اعرف شخص يترزق الله في السيارات وشريت منه سيارتين ونظيفه ماشاءالله حسب وصفه بالضبط ويتشكى من البعض في كلامهم واسلوبهم والمشكله تدور الايام ويحتاجون يشترون والا يبيعون سياره ومايطري عليهم الا هالشخص وينصونه ويبدا الاسلوب المحترم معه هههههه علشان مصلحتهم فيقولي هالمصلحجيه تزين علومهم اذا بغوا شي مني خخخخخ المختصر انا اشوف ان المصطلح هذا اذا فيه اساءه يجب ان لانذكره لاحد يترزق الله ( ويخافه) اما المشهور بالنصب فخذ راحتك معه لانه يستاهل (وجهة نظر)
7.
18:51:46 2016.02.21 [مكة]
بختصر لك الموضوع جدا سيارتك تسوا 100 الف وانت عارف والسوم اكيد سمعت او جتك معلومة من الناس انها بالحدود وحطيت في راسك انها بتجيب اقل شي 80 الف واعلى شي 100 الف وتفاجا عند دخول المعارض بشريطي يسومها منك ب 40 الف وش ردة فعلك هل تقول مشكور وتحب راسة او يضيق صدرك وتسب وتلعن هاذا الشي الى يقهر الناس (ولا تبخسو الناس اشيائهم ) هاذا الظلم والبخس لاتقول انت حر بسيارتك او شي من الكلام هاذا هاذا فتح بابها بمبلغ بسيط جدا اذا قلت والله بواصل بالمعارض بيقولون بكم تسام بتقول الصدق 40 بيزودك 40 مثلا ماراح يزود الا الفين او 3 اذا هو جاد هاذا الناس تكرة الشريطية لانهم ليسو مستخدمين اساسا هم بياخذونها من هنا ويصرفونها بلحظتها حتى الفلوس مامعهم من المعرض ياخذونها
8.
عضو قديم رقم 403097
21:51:31 2016.02.21 [مكة]
خلني اعلق على موضوعك وفضح شوي بحقين المعارض خلنا نتكلم على العروض في موقع مستعمل اغلب الي يعرضون السيارات اصحاب معارض بحي النسيم وصالات سيارات ومعلن او معلنين من امريكا تصدير كلهم حراميه للاسف اسعار السيارات مبالغ فيها وبشكل سرقه وليس بشكل بيع عشان نحسم الموضوع ادخل اكثر موقع حراج وشف الاسعار بين الموديلات المعروضه ونظافتها ودخل مستعمل وشف الحراميه في اسعار السيارات والغباء الفاحش ان 99%من المعروض في سيارات مستعمل محلك سر ما ينباع فقط ردود في موقع حراج السيارات تنباع خلال 4 ايام والسبب الاسعار المتفق عليها في سعر السياره والموديل والنظافه الخ يوجد الكثير من الناس مسكين لايعرف اسعار السيارات ممكن يشتري ويكون ضحيه سرقه بحكم انها تعرض مستعمله وملمعه بالنسبه للشريطيين فيهم نوعين النوع الاول مثل الي قالك الامبراطور يكسر السومه عشان يشتريها ويبيها بضعف المبلغ الي اشتراها به والنوع الثاني ينقسم الى قسمين قسم حقاني وقسم يزود الحقاني يبيع السياره على المبلع الي تستحقه ويفاوض البائع او المشتري بحدود ال500 او 1500 لاتمام البيعه وياخذ السعي 500 ريال والي يزود يجي متفق مع البايع مثلا يوصل سعر السياره 50 الف ويجي الي متفق مع البائع ويقول شريت ب51الف فيقوم الي قال ب50 يقول 51500 ويقول البائع بعت الشريطي هنا ياخذ 100 او 700حسب الاتفاق والحقيقه ان المواقع والجرايد حلت بيع السيارات باسعار معقوله لان المعارض غير حقانيين في الشراء لانهم مجرمين اذا جاو يبيعونك وللاسف ان المعلنين في موقع مستعمل قسم السيارات 88% حراميه ونصابين الاسعار ما بينها وبين الجديده الا 25 و30 الف