كوشات افراح ومداخل قاعات وتنسيق حفلات، ما رأيكم؟

وعليكم السلام ورحمة الله وبركاته

الله يوفقك وييسر امرك ..
اصعب شي في مشروعك في الفترة الحالية .. هو العمالة ..

انا جربت فترة في الموضوع مع شخص متخصص بس ما اشتغلت .. وكان ودي اشتغل فيه ومتحمس كثير له .. ولكن مع التجربة تعرقلت في العامل ... ووقفنا ..
مع ملاحظة هذيك الفترة كانوا العمالة مالين البلد .. اما الان اتوقع انهم عملة نادرة

طبعاً تحتاج محل لإنه بيكون لك مرجع ومحل .. افضل من الشغل من البيت ..
ولازم يكون عندك مستودع تحط فيه الكوشات اللي عملتها سابقاً وكذلك سيارة نقل صغيرة لنقل الكوشات ..

البضاعة امرها هيين تنزل الخاسكية وتقضى منها ..
ولكن المشكلة الاساسية في العمالة ...
لإنك اذا تبي بس تشتغل على التزيين ... زبائنك بيكونوا قليل جداً ... لان الغالبية يبغى عمل متكامل ..
بناء الكوشة من الخشب .. وكراسي .. والتزيين لها وتزيين الصالة كاملة والطاولات و و و و

طبعاً .. كل شغله تعملها تصورها .. وتشيل الاساس حقها عندك واذا احد طلبها من الصورة تنزلها له ... او اذا جاب لك صور لكوش اخرى تصممها له ...
طبعاً .. الشغلة مكلفة في البداية .. ولكن مع الوقت بيكون البضاعه عندك تقريباً وفقط تنتظر العميل ..
وتقدر تنسق مع منسقي الزواجات ... للتعامل معك بدفع عمولة لهم على كل زبون وكذلك قاعات الافراح ... تنسق مع المسؤولين عنها ... واتفق معهم على سعر خاص لهم اذا جاك زبون من عندهم + عمولة لهم ..
بعدها راح تبني زبون محترم .. وقاعات يجوا لين عندك يتعاملوا معاك ...

طبعاً احرص ان المحل يكون كبير ومنسق بشكل احترافي ويكون فوق الرائع في التنسيق والتصاميم لانه يعتبر واجهة لك ... ف اذا جو للمحل ولقوا المحل الله بالخير .. محد بيتعامل معاك ..

بخصوص الميزانية ممكن تبدأ ب 60 الف ريال إلى 80 الف ريال عشان تعمل شغل محترم ..
ولاتنسى العمالة حاول قبل تدق اول مسمار انك تجيب عماله ..

اتذكر في تلك الفترة كانوا العمالة في المحلات يدخل عليهم واحد يقولهم كم تاخذوا راتب يقول العامل 3000 ريال يقوله تعال عندي اعطيك 4000 يخرج العامل في نفس اللحظة ..
والعمالة في هذا المجال عملة نادرة جداً جداَ

اما التصاميم مايحتاج النت مليان تصاميم بالالوفات .. يعني يبغالك عمالة توريهم صورة يطبقوها لك مباشرة ..

طبعاً انا قلت يبغالك سيارة نقل احسن بدال ما تتورط في الاجرة وهذا يجيك وهذا مايجي وهذا يتأخر عن رفع الكوش في الليل وهذا يقولك هات عمالك يشيلوا وهذا يقولك بالفجر اخرج بالسعر الفلاني .. وتبلش ..
ولكن جب لك عاملين ومصمم وسواق .. وخلاص ..

وتقدر تستفيد في الفترة هذه بفكرة كانت عندي ... وهي التعامل مع الموهوبين والموهبات من السعوديين والسعوديات .. بإن يجيب فكرة ويصمم ويشرف على التنفيذ على عمالك ويجيب زباين كمان عشان يستفيد ... ويسوق لك المحل كمان ...
وتقاسم انت وياه المكسب بواقع 25% من الارباح له بعد خصم قيمة التكلفة .. وانت 75% لانه عندك عمال ... ممكن تحط مكافأة تشجيعية مبلغ 500 ريال على نصيبه زيادة ..
وهكذا ...
بتكسب من كذا جهه ..
مسوقين .. وكثرة المنفذين .. وافكار جديدة ومنوعة .. ومشرفين على العمل ..

شكرا جدا جدا اخوي وسيط والله يوفقك ويسعدك

كلامك جميل ورائع واستفدت منه