هل أجد مفتاح إنارة للبيت .. كل ساعة يطفي !!

ولا تشتري شي ولا تتعب نفسك ..

استعمل اداة التحفيز ..

يعني اذا هم صغار ..

قل :

اللي بيطلع من دورة المياه ويسكر اللمبه معه لمدة اسبوع بعطيه مكافأه
وكذلك التكييف

وحط جدول في سبوره صغيره وعلقها في الجدار
وكل يوم اي واحد يسوي اللي قلت عليه حط عند اسمه نجمه

والله مع الوقت بيتعودون ..

طريقه مجربه
^_^

السلام عليكم و رحمة الله و بركاته

الأخ ابو فهد اول شيء الله يصلح ابنائك وابناء المسلمين
نعم يوجد مفاتيح تبرمج على حسب طلبك بس بالنسبة لنور الحمام اجلك الله بيكون غالي مقارنة بالتوفير الحاصل اما بالنسبة للمكيف فيوجد مفاتيح تبرمج وبتكلفة تقترب من 300-400 ريال


اذا حاب تستزيد ازيدك واتوسع لك

في حساس بيركب مثلا عندك ممر بس تجي اول الممر تشتغل الانارة لفترة معينة حسب تحديدك لها و بعدين يفصل و هو معتمد في الفنادق بالمنطقة المركزية شفته بالمدينة المنورة بس تخرج من الصعد تشتغل الانوار لفترة زمنية تكفيك توصل لغرفتك و زود
و في التايمر ممكن تركبه بس هذا بالذات لا تسترخص فيه و خذ نوع بريطاني او شي مماثل له لشركة معروفة لان بيكون عليه حمل و سعره فعلا بحدود 400 ريال

و الافضل شوي شوي غير المكيفات لنوع مثل ال جي مثلا (اغلب الي بالسوق صار في الميزة هذه)

اذا كان مطفي تبرمجه يشتغل بعد كذا دقيقة و اذا كان شغال تبرمجه يطفي بعد كذا دقيقة

او يشتغل نص ساعة و يطفي نص ساعة ...

هو المشكلة بمعامل الضرب يعني لو استهلكت اكثر من 115 ريال مثلا تروح للشريحة الثانية مباشرة و انته ماشي

أخوي منصور .. شاكر لك مرورك .. والتحفيز ابشرك موجود بقوة .. لكن ما تقدر تتابعهم الله يصلحهم .. يعني كل واحد بيقول مهوب انا .. ولا ودي أكذبهم ولا أدفعهم انهم يتهمون بعض قدامي .. او ممكن توصل للكذب دام الدعوة فيها جائزة .. لكن لو حطيت هالمفاتيح ممكن تفيدنا كلنا صغار وكبار خخخخخـ

-----------------------------

أخوي بسام هلابك ومرحبا .. ويا ليت تزيدنا لنستفيد .. أذكر أنا مرة مريت على شارع الريل بس نسيت المحل وكاني شفته حاط اعلان ان عنده مفاتيح تشغل المكيف وتطفيه حسب الحرارة المطلوبة .. لكن على هالحال أبخلي كل المكيفات تشتغل ..

وما فهمت عليك بالنسبة لمفاتيح المكيف .. يعني الواحد بيكلف 300-400 ريال وكيف عمله !!


-----------------------------------

أخوي BMW شفت الحساس اللي تقول عليه عند ساكو وسعره رخيص ثلاث أو أربع لمبات على بطاريات تحطها على الدرج .. وفيه حساس بأول الدرج وحساس ثاني بآخر الدرج .. لما يمر الواحد من عند الحساس الأول تولع اللمبات ولما يمر من عند الثاني تطفي .. لكن المشكلة بدورات المياه أعزكم الله .. والمكيفات ..

حطينا جهاز التوفير وكانت الفاتورة من 160 - 300 ريال جتني هالمرة 450 ريال :(

لا غير هذا طال عمرك

فكرته زي الحساس عند الابواب الاوتوماتيكية و ينشبك على علبة الكهرباء ليتم ربط الانارة فيه ويجي معاه تايمر

روح اي سوق كهرباء و بتلقاه و موغالي

يعني ممكن يكون توقيت لوقت التشغيل بالدقائق !

وهو بس مع الباب وإلا لازم مفتاح .. لأن شغلة الباب شغلانة :)

والروحة لمحلات الكهرباء رايح رايح ..بس ودي اروح وأعرف اسألهم عن أيش ..

وراح اوافيكم بما أصل إليه :)

ماشاء الله عليك يادوسري حافظ الريال

اقول والله تتعب
احسن طريقه حطلك شمعات
خلنا نحسب انا وياك ونشوف الفائده
نجي للحمام
لو يفتحون النور ويخلونه شغال طوال اليوم يمكن يحسب 4 ريال وهكذا كل يوم
رح لمحلات ابو ريالين وخذلك شمعات بقيمة 10 ريال وشغلها طوال الشهر احسلك
اقووووووووووووووووووووووووووووووووووول

احسبها لوجه الله حاول تنبهم بالكلام الحلو
خل عنك المعززات والهدايا مالها اي داعي
نبهم وانت على السفره معاهم
عاقبهم
طريقة العقاب
بعلمك على الخاص

والله اني ضحكت تدري ليه
انا مثلك واركض وهم يركضون والمشكله في البيت في المزرعه حتى صارت عاده
عندنا لو باستراحه او شقه مفروشه هذاااا حالنا
الحساسات روعه وانا مركبهااا بعدة اماكن ولكنها امنيه عندي
بالحوش (نقليات ومستودع خرده ) وعند الغنم ومدخل المزرعه
اي جسم تلقطه تشتغل الكبوس وجرس ومثل الفلاش فقط بدون التصوير
ومشكلتهااا القطوا وغيره وقيمتهااااا شوي غاليه
المهم اتذكر عندهم اناره بعدة طرق منها الحراريه والباب وفيه منها وطني (مصنع الاناره السعودي ) موقعهم بالملز ولهم فرع بالتخصصي

photocell sensor for lighting

السلام عليكم و رحمة الله و بركاته

الأخ ابو فهد معلومه احب ان ابلغك اياها لربما تريحك من هذا العناء كله
اعلم اخي الحبيب ان اللمبات لا تستهلك شيئا يذكر من الطاقه فعلى سبيل المثال لمبه 60 شمعه تستهلك ما قيمته 5 هللات كل 16 ساعة عمل (( هل تصدق هذا ؟ ))
اخواني الأفاضل كل الأجهزة ما عدا التكييف بنوعيه ( حار و بارد) لا يعد مستهلكا للطاقه لمبات مراوح تلفزيونات ( مكيف على المروحه فقط )

نرجع لأصل الموضوع يابو فهد

يوجد مؤقتات من الثانيه الى 24 ساعه يمكنك التحكم فيها وكل ما تحتاج اليه هو
1- المؤقت ( اظنه 150 ريال )
2- مرحل ( مفتاح ميكانيكي << ريلي >> 15 امبير ) الممتاز بحوالي 70 ريال
3- مفتاح ضغط يركب وين ما تبي حتى تقدر تركبه جنب الباب اذا فتح او صك يرسل نبظه للمؤقت بالكثير 20 ريال
4- واحد يركب لك هالدنيا مع بعض واذا انت تحب تفك وتركب ارسل لك مخطط تمشي عليه

اخوك ابوعبدالعزيز

7. بقلم: mohammd1001

ماشاء الله عليك يادوسري حافظ الريال

فيني عرق حضرمي خخخخخخخـ الله يسلمك وش نسوي مع هالوضع فواتير من كل جهة ومن كل مكان وما فيه إلا قوة نتف بالفواتير وعيونك طايرة ولو تقول شي قالوا لك : سدد وراجعنا نمرمطك ..

في حساس قيمته بريال وتحصله متوفر في كثير اماكن .... اعتقد اسمه (( عصا )) وفي ناس تسميه (( باكور )) أو (( مطرق )) هههههههه

يقال إن بقاء المكيف شغال أفضل من إطفائه خمس مرات في اليوم

لأن

القفل والتشغيل يقلل من عمره

وأيضا يلف عداد الكهرب بقوة وقت التشغيل

والله أعلم

أبو ريناس .. شاكر لك نصيحة وإن شاء الله الوضع يتعدل معهم ..

بما ان تخصصي قوى كهربائيه

فإن النظام الكامل لتوفير الطاقه يتم تركيبه من قبل شركات رائده في مجال الكهرباء مثال عندك شركة ABB تركب لك نظام متكامل للبيت بحيث انك تستطيع تغير كل فيش في البيت وتحدد عمله ووقت عمله

يعني انت بغرفة الجلوس وتبي تشغل مكيف غرفة النوم من غرفة الجلوس عن طريق مفتاح تشغيل الانوار الموجود بغرفة الجلوس فتذهب الى الCONTROL PANEL الموجود لديك بالبيت المركب من قبل الشركه وتختار تغيير مفتاح التشغيل لتشغيل اي قطعه كهربائه بالبيت من اماكن مختلفه وكذلك تحديد الوقت TIMER لاطفاء اي قطعه كهربائيه بعد وقت محدد
مثال حوش البيت تبي اللمبات الي بالحوش تشتغل من الساعه 5 المغرب الى الساعه 3 الفجر تركب تايمر وتوقته ويصير يشتغل لك على كيفك


المكيف حق البيت تبيه يشتغل قبل ماتجي من الدوام بنص ساعه تسوي له توقيت


كل هذا بسعر وقدره يعني غالي بس فيه فوائد كثيره منها

لو اخترب عليك توصيل احد الاسلاك مايتاج تكسر الجدار لا تسحب السلك من الكنترول بنل بطريقه معينه باداه خاصه ويتم تغير السلك كامل

اطول عمر من اي افياش كهربائيه



وحاجات نسيتها كثيره


ان شاء الله افدتكم

ابو خالد

أخوي أبو عمور .. هاللي تقول عندهم غنارة .. شركة امنية وإلا محل !

ويا ليت وصفهم لاهنت .. شاكر ومقدر لك الله يسلمك ..

هناك مصابيح غازية قوية الإضاءة وذات توفير عالي للكهرباء، كما أن عمرها الافتراضي أكثر بكثير من المصابيح العادية.

والله ياابو فهد مااعرف اوصف بالرياض مضبوط (انا ساكن خارج الرياض )
لقيتهااا عند المحلات الامنيه و محلات الابواب ومحلات الاناره بالملز وشارع التخصصي
وانا ركبها لي سوري يتبع محل بابك للابواب الكهربائيه
وابشر اجيب رقم تلفونهم

ابو فهد ورا ماتوظفني عندك كل ساعة امر اصك اللمبات والمكيفات

مع تحيات صديقك راعي مطعم ابو هنود