السلام عليكم
اخواني ذبحتني هالثلاجه يوم الجمعه ثلجت ومعاد تبرد فكيتها لقيت الفريزر كله ثلج حتى مروحة الفريزر مغطيها الثلج
فكيتها وذوبت الثلج وشغلتها
اليوم اتفاجى رجعت المشكله
وحتى الثلاجه اسفل ماتبرد مررره الثلاجه نظيفه وحديثه نوعها امريكي
وش السبب يا اخوان للي فاهم فقط الحمد لله اقدر اغير اي قطعه
تتوقعون من الثرموستات او شيء اخر
يالله ياخواني الاكل بعضه خرب
انتظركم,,,
اخي ابو مشعل الهيتر نادرا مايتعطل واعطاله تكون واضحه غير ماذكر الاخ ابو حسين . وتراكم الثلج له اسباب كثيره ايضا ولكن حسب فطنة ومعرفة الشخص لمعرفة العطل . ومثال على ذالك لو هناك تنسيم بالربل الي على باب الفريزر على طول يثلج ومايبرد . وغيرها كثير . الموضوع يطول لكن ابوحسين ثلاجته ان شاء الله اتصلحة اتمنى ان يستفيد الجميع من تجربته
للاسف يابو رامي رجعت المشكله ثلجت وتراكم الثلج على المروحه حق الفريزر
والحين طفيتها
بجرب الهتر اللي يقصده ابو مشعل
وفي قطعه تركب على الرديتر في نفس الفريزر ممكن يكون منها الضاهر اسمها بي ميتر
الله يعين
لاتخسر نفسك اذا الثلاجه اشتغلت 24 ساعه وتمام فالمشكله رجعت فقط . ولكن في رايي الشخصي لاتشتري هيتر ممكن تختبره فقط . اهم شي ان القطعه الي ركبتها تعمل بشكل صحيح واشك في ذلك
والله ياخوي امس ممتازه ويفصل الكمبروسر
جيت فتحت الفريزر المروحه قل دفعها هواء ضعيف
فما ادري وش اسوي عذبتني والله
والفنيين تخبرهم يكبرون الشي
امس جاء لاخوي وغير له قطعه قال منها واخذ 120 ريال وانا متأكد انها ماتكلف 20 ريال
يوم الصبح دق اخوي قال رجعت ثلاجتي ما تبرد ودق على الفني وانا كنت ببيته
واخذها احتمال كبير يقول من نفس الرديتر منسد لازم يفكه ويفرغ الفريون
الله يعينه اذا قطعه ماتكلف 20 حسبها ب120 ريال
فمابالك بشيل الثلاجه وراح بها للمحل وتنظيف مجاريها وتعبئة فريون كم بيقول؟؟؟
انا الحين مشكلة ثلاجتي اتوقع سهله لكن ماعرفت اش الخربان فيها
التايمر اخذت افضل نوع امريكي
وباقي القطعه اللي تركب على الماصوره شكلي بروح اخذها
مثل هذا ان شاء الله يكون منها
https://encrypted-tbn1.gstatic.com/images?q=tbn:ANd9GcT2egricp9wZ25p1RIN85675rshpuNuQ26cNOJ_zkPjuUPOvP-pTg
واخر شي بأشيك على الترموستات
الله يعين
لكن والله ماقصرت يالغالي حاولت مساعدتي انت والاخوان
الله يرزقكم الفردوس
انا مشكلة ثلاجتي عكس مشكلة ثلاجة اخوي
ثلاجتي تثلج مره مثل الصوره اللي ارفقتها
اما ثلاجة اخوي ماتثلج ابد
غريب امرها
انا قلت يمكن من الجو الحار عدمهن!!
واللي مستغربه كلهن خربن بنفس اليوم وهو ببيته وانا ببيتي
اعاننا الله واياكم
ياريت تشيك على الربله حقت باب الفريزر الي تقول انه يثلج وتتاكد انها راكبه صح او تنظفها وتجرب وتميل الثلاجه للخلف ميول واضح وتجرب ايضا
انا مره ثلج عندي الفريزر ووقف التبريد على الفريزر و الثلاجه تحت
وطلعت المشكله بسيطه أن احد العيال زاد على نسبة البرودة من العداد الي يطلع لك من 1-10
هي بالعادة تكون على مابين 6 او 7
طفيت الثلاجة لين ذاب الثلج كله وتركت الباب مفتوح طبعاً الحمدالله الثلاجة ماكان فيها اغراض واحد يخاف تخرب
بعدها رجعت الوزنية مابين 6-7 وشغلت الثلاجة ولا احلى من كذا
النقطة الثانية تأكد أن الفريزر والثلاجة ماتهرب هواء يعني الباب انه يقفل بشكل كامل
لأن بعضهم يصك الثلاجة ولا يتأكد أنها تقفل زين وتبرد لين يثلج
والله يااخواني اصلاً الثلاجه مديلها حي "جديد"
والجلده انا بنفسي نظفتها بخرقه مبلوله ومقفله صح
وبالنسبه للي تقصده اخوي العاشق قصدك الترموستات
هذي ماحد يلعب بها دائماً محطوطه على رقم 2 من يوم شريتها
بيني وبينك انا شاك من اول انه من الترموستات ماكنت ابي اغيرها لين اتأكد
انا بفضل الله عندي خبره ودائما اصلح الترموستات حق المكيفات واعرف اوزنها حتى اذا خربت
لكن حق الثلاجه مارضت توزن لانها تختلف عن المكيفات
الله يسعدكم ويثلج صدوركم والله ماقصرتو يااخواني عسى الله يوفقكم بالدنيا والاخره
هذا الي اقصده
http://files.fatakat.com/2010/4/1271423576.jpg
بعضها فرار نفس الصورة
بعضها لا خط طولي تحركه يمين يسار وزنية تبريد للثلاجة
على العموم ان شاءالله ينفعك هالموقع
http://learnfixinghomedevices.blogspot.com/2013/05/blog-post_24.html
ايه يالغالي هذي اسمها ترموستات بخليها اخر شي وممكن اشتريها اليوم لاني ان شاء الله بروح لشارع الريل اعرف محل دايم اتعامل معه
وبحاول اسأله ممكن يدلني
هو قالي مثل ذكره اخوي بو رامي تايمر
لكن رجعت المشكله
بشوف اش يقول والله يعين
بحثت كثييير بالمنتديات
ولقيت بعضهم نفس المشكله اللي عندي
واغلب النصائح تقول
من سخان الثلاجه اللي هو نفس هذا مثل اللي عندي بالضبط وانا فكيته وبأتوكل على الله
والحياة تجارب والله يعين
موقعه بالفريزر مشبوك بالماصوره النحاس من الاعلى
https://encrypted-tbn1.gstatic.com/im...uUPOvP-pTg
اذا عندك وقت ومافكيتها ياريت تجرب تلف الزمبرك الي في التايمر الي قلت عنه يقول تك على فكره نظامه زي الساعه يلف كل وقت ويعطي كهربا لكل شي في الثلاجه حسب برمجته ربما تشتغل معك
هلا بالغالي
لفيته وقال تك شغال ماعليه كلام
حتى القديم اتوقع انه شغال لاني فريته وطفى الكمبروسر وقعدت شوي ثم فريته مره ثانيه
واشتغل الكمبروسر
عاد انا قلت بأصلي العصر وبأروح للريل وباخذ السخان اتوقع رخيص والله يعوضنا وياكم خير
كان عندي ثلاجه امريكي ويربوول ونفس المشكله وكل يغير الفني
المروحة الصغيره اللى بالفيزر وتضبط
اقترح عليك تمر عند اي فني وتساله اش ممكن يكون المشكله يمكن يعطيك حل
الله يعطيك العافيه ويالله ياخوك المروحة شغاله بس لاجاها الثلج قل دفعها
انا رحت والله من بعد صلاة العصر مباشره واسأل عن القطعه اللي بالصوره لفيت كل المحلات
من شرقها لا غربها مالقيت ورحت البطحاء مالقيت
وواحد وصفلي وكيلها البابطين ويالله وصلت لهم لقيتهم قفلو ويداومون الاحد
وتوني ادخل البيت 3 ساعات وانا ادورها
واخر ماتوصلت له رحت لورشتين بالريل والبطحاء
قال لي المهندس مشكلتك لها ثلاث احتمالات
الاوله /التايمر وغيرته ومافي فائده
الثانيه/ القطعه هذي مدري وش سماها الضاهر انها فيوز تعطي امر للتامر يقفل
وهي لاصقه بالماصوره النحاس وانا حاس انه الخلل منها نفس هذي
https://encrypted-tbn1.gstatic.com/images?q=tbn:ANd9GcT2egricp9wZ25p1RIN85675rshpuNuQ26cNOJ_zkPjuUPOvP-pTg
والاحتمال الاخير قال لي من الهيتر"السخان"
الحين شبكتها وعساني القا القطعه ذي
وين القاها غير الوكيل هذي اللي بالرابط نفسها بالضبط
اللي لقيته بالسوق سلكين
وهذي ثلاثة اسلاك جابت لي الجنان وش ذا التعقيد
للفائده وبعد عناء مدة اسبوعين واكثر بفضل الله توصلت للمشكله
طبعاً بالبداية خسرت وقت وجهد كبير جداً وخسائر الله يعوضنا وياكم خير
اولا غيرت التايمر لكن بدون فائده سعر الاصلي 50 ريال
ثانيا بحثت عن قطعة اسمها هيتر ومالقيتها الا بالوكاله لان اللي عندي حجمها كبير
وسعرها بالوكاله 280 ريال
لكن بفضل الله بحثت مره ثانية وثالثه ورابعه بكل المحلات لقيت نوع صيني ب 20 ريال
واشتريته
بعدها جاني حب استطلاع ولقافه فكيت القديمه وشبكتها دايركت بالكهرباء واتفاجئ انها شغاله
رجعت ركبتها
بقي قطعه اسمها الدفروست وظيفتها تعطي امر بتشغيل الهيتر اللي عندي مثل هذي ثلاثة اسلاك لكن للاسف مالقيتها بكل المحلات مثل هذي
https://encrypted-tbn1.gstatic.com/images?q=tbn:ANd9GcT2egricp9wZ25p1RIN85675rshpuNuQ26cNOJ_zkPjuUPOvP-pTg
فأضطريت اولف قطعه شبيهه لها ولكن بسلكين وسعر الاصلي منها ب20 ريال مثل هذي
https://encrypted-tbn1.gstatic.com/images?q=tbn:ANd9GcQiXRrYTeSZ5-EZ6OUm-m05bn8dqQgfag60457PbggnnqoVgsByIg
الان بفضل الله الثلاجه ان شاء الله اقول رجعت مثل اول وضبطت
خلاصت الموضوع وللفائده للجميع
اذا الفريزر يثلج اولا شيك على الثلاث اشياء هذي
ابدأ بالدفروست
وبعدها افحص التايمر
واخر شي اذا عندك خبره ذوب الثلج وخلف الرديتر من الاسفل تلقى الهيتر مثل هذا
https://encrypted-tbn2.gstatic.com/images?q=tbn:ANd9GcSCbzdvxYSCrGzuKB6fSkODu7aJuMtLs23rO4M9Ex0d4ojy1yv9tg
فكه بلطف واخرجه من مكانه واشبكه بالكهرباء اول مايحر فكه وكذا نعرف انه شغال ومايحتاج تغيير اذا حر
*****
هذى ملخص ماصار معي واللي عنده اي استفسار يتفضل
طبعاً بعد ماعانيت جبت فنيين اثنين ماعرفو المشكله
كل هذي الصيانه والاختراعات بفضل الله سويتها بنفسي
لكن ينقصني الان وبإذن الله اشتري جهاز فحص الاكترونيات عشان اعتمد على نفسي بكل شي
مثل هذا
http://t1.gstatic.com/images?q=tbn:ANd9GcRNGEPPrGkjJI8YM3MBEVE8BJOP-FDoo9bh1PtJmN4i0YrQPvYI
اسأل الله التوفيق لنا ولكم جميعاً
واشكر كل من رد الله لا يحرمنا منكم
والله يجمعنا وياكم بالفردوس الاعلى
واللي يبي يستفسر عن اي شي يتفضل نحاول نخدمه والاخوان مايقصرون
جزاك الله خير على التلخيص
اسأل الله ان ينفعك وينفع بك
اجر وعافية باذن الله
اللهم امين وياك يالغالي
وشرفني مرورك الله يسعدك ويسمح دربك