| جميع الحقوق محفوظة © دار تقنية المعلومات IT Dar |

مهم ياشباب بسوي عملية لعيوني

السلام عليكم ورحمة الله وبركاته

اللهم صل وسلم على سيدنا محمد وعلى اله وصحبه اجمعيين

ياشباب بسوي عملية لعيوني لانني اعاني من ضعف بالنظر والبس نظارة وناوي هذا الاسبوع اسويها لكن ودي اعرف احدث الاختراعات للي موجودة وامنة لعلاج عيوني بالرياض فقط بأي مستشفي

نسمع مشوراتكم يااخوان وماخاب من استشار

كل الردود: 9
1.
15:06:25 2015.03.25 [مكة]
الهند مدينهه بنجلور الدكتور احمد من اشهر دكاتره العيون ورخيص ونتائج مضمونه اذا امكانياتك تسمح بالسفر والهند تحتاج فيزا تطلع في اسبوع
2.
10:06:05 2015.03.26 [مكة]
سلامة عيونك (:
3.
عضو قديم رقم 407647
13:04:40 2015.03.26 [مكة]
اجدد عمليه فيمتو ليزك ولا فيها مضاعفات ولاالم بعد العمليه والاجدد منها سمايل ليزك بس ماعندي فكره اذا عندنا في السعوديه
4.
عضو قديم رقم 7868
05:00:06 2015.03.27 [مكة]
توكل ع الله واعملها انا ولله الحمد عملتها قبل سنه
5.
10:58:40 2015.03.27 [مكة]
اعمله في مستشفى الملك خالد برياض متساهلين الان يبون منك قبل ماتروح تاخذ تقرير من اي مستوصف او اي مستشفى سوى حكومي او اهلي بس تقرير عن حالك وتروح ويفتحون لك ملف ويعطونك موعد مجاني بدون فلوس الله يشفينا وياك وكل مسلم
6.
12:50:57 2015.03.27 [مكة]
انا سويت عملية الليزك Lasik بالهند قبل خمس سنوات والحمد لله كويسه وامورها طيبه و تعليقا على الاخ صاحب الرد الاول اذا انت بتسافر للهند عشان العملية اشوف انها ماتسوى لانها راح تكلفك قيمتها هنا او اكثر رغم ان العملية نفسها هناك ماتكلفك 4000 ريال لكن احسب رسوم الفيزا + رسوم الطيران اقل شي 2000 رايح جاي + السكن والمواصلات و مصاريفك هناك فترة اقامتك قبل وبعد العمليه اسبوعين اقل شي عشان المراجعات . حسبه سويها هنا اريح لك واقرب للمراجعات ان احتجت ، انا سويتها هناك لأني كنت وقتها بالهند اليوم قرأت اعلان مستشفيات المانع مسوين عرض عملية الليزك الحديثة ب5,500 ريال وقبل 4 سنوات مغربي ب7,500 ريال اعرف واحد من الاصدقاء مسويها في مستشفى الحبيب بالرياض من زمان ومبسوط منهم الله يسهل امورك توكل على الله بترتاح كثير وبتشوف الدنيا زين ان شاء الله بس استخير و اختار المكان المناسب
7.
20:59:58 2015.03.27 [مكة]
سمعت من صديقي ان زراعة العدسه هي الاكثر كفائه مقارنة بباقي العمليات ، وسوا زراعه في مركز جمب شارع التحليه يقول انه ماراقت له يد الدكتور ماكانت ذاك اللي ولكن اللي دفعه لاختيار المركز هو ان ابوه واخته سووا نفس العمليه في نفس المركز ويمدحونه وانا اقول كلامي هذا مجرد نقل خبره وماجربت شي شخصياً الله لا يحوجني
8.
10:32:47 2015.03.28 [مكة]
الى العيون لاتهاون فيها لاتسويها الى في مستشفى كبير وعنده امكانيات
9.
11:14:42 2015.03.28 [مكة]
السلام عليكم ابعطيك تجربتي واحذرك من الطبيب متعب الشعيبي لان له مسوقين بكل المنتديات للدعاية له لانه طبيب فاشل وهو الوحيد اللي تلاقي اعلاناته في حراج لسوء سمعته انتبه تروح له في مركز البراك بالرياض أقسم بالله العظيم اني سويت العملية عند متعب الشعيبي بجهاز الالترا ليزك ولعب بعيوني وكان وقتها في مركز مايز بالرياض غلط بالعملية الأولة وشكله مايعرف يستخدم جهاز الليزر وبعد شهر ماتحسن نظري ابد وكلمته وقال تعال اعيدها لك بلاش ويتكلم كأنه متفضل علي بكلمة بلاش ! سويت اعادة من جديد وكان يقول ابزيد لك جرعة الليزر !! كانت العين اليمين هي الافضل ونسبة الضعف بسيطة واليسار ضعفها واضح بعد العملية للمرة الثانية تحسنت اليسار وصارت زينه أما اليمين يخلف الله صار فيها تغبيش وغشاوة وكأني اشوف بالماء طول الوقت والمصيبة حتى القراءة تضررت من العملية ولي ثلاث سنين على هالحال وخلاص فقدت الرجاء ترجع عيني اليمين ولو لحاتها قبل العملية ابي يروح التغبيش والغشاوة بس وارجع البس نظارة مثل أول وأقول ليتني استمريت على النظارة أنبه الناس وأحذرهم من متعب الشعيبي والله هو الشاهد على صدقي حبيت أحذرك اخاف تطيح فيه بسبب الدعايات رح لمركز باجه او الحبيب عند الطرباق أو النخبة أو مستشفى الحرس الوطني بــ 5500 وأطباء محترفين أو أي مركز وطبيب معروف اما متعب الشعيبي قسم بالله فاشل وعايش على دعايات المندوبين بالمنتديات لأن سمعته سيئة واللي يجرب عنده يخلف الله على عيونه وللعلم سعر العملية عنده من زمان وهي 4600 وطريقة الكشف بدائي كأنك رايح تقص نظارة في محل مافيه أي تقنية بالكشف مثل اللي قريت عنها عند المراكز المحترمة وكل هذا توفير علشان تفرح بالسعر حقه وتفكر انك حصلت شيء مناسب والله يستر عليك ويحفظ لك نظرك