| جميع الحقوق محفوظة © دار تقنية المعلومات IT Dar |

قولوا ماشالله

وحدة تقول :
هذا الله يسلمكن عندي أخو على وجه زواج يشتغل بوزاره الدفاع بمركز مرموق ووسيم اسم الله عليه مو عشانه اخوي لكن ماشاء الله طول ورزه وهيبه وعندي بنات خالات وخوال وعمام مرتزات عندنا ليل نهار والي تسوي حلا وترسله والي ذبحتها صلة الرحم بالاسبوع تطق بابنا مرتين وفاهمين على بعض وماخذين انا وهن الموضوع ضحك ووناسه المهم ياطويلات العمر مره دخل اخوي علينا اول ماجاء من دوامه وقبل حتى يغير ملابسه قعد يزن على رأس امي ورآسي أبي تخطبون بنت الجيران الي قبالنا وماني مآخذ غيرها لو اقعد عزابي طول العمر واحنا والله مانعرف البنت زين ولا اهلها ناس بحالهم وهي شفتها يمكن مرتين حليوه ماعليها بس مابها هالزين الي يخلي أخوي كذا ينهبل ويوم قال يمه هذي وراها خير كثير وبتفتح لي باب مايسد .. انا وامي لحظتها شوشنا 😂 .. خير ! وباب ! اكيد بتورث ورثه او جيراننا مليارديريه واحنا ماعندنا خبر 😅 وعاد رحت مع امي وخطبناها وقعدوا شهر الين ماردوا بالموافقه وانا وخواتي نعزي انفسنا نقول عادي لو تأخروا اهم شي بيجي وراها الدراهم والقريشات 💵💶 واخوي لما دقينا عليه بالدوام وعلمناه وحاطين التلفون على السبيكر جلس يكبر ويتحمد الله 😂😂😂 صار الزواج بعدها بكم شهر واستغربنا وقتها مااطلبوا مهر كبير بس 50 الف وحتى من ضمنها الذهب وعلى كلام اخوي هذا طلب العروس الشاهد ياطويلات العمر سافروا وخلصت اجازه اخوي بسرعه ورجعوا ماطولوا وسكنوا فوقنا وبيتنا تصميمه المدخل واحد ولما جاء بيروح اخوي لدوامه الصبح ويمر علينا ويقول فلانه اذا تبي باب الشارع لااحد يتدخل خلوها تسوي الي تبي 😨😱 لكم ان تتخيلوا اشكالنا وقتها وش تبي بالشارع وهي عروس جديده ! يعني ممكن تبي اهلها !! كل هالكلام تم تداوله على طاوله الفطور وتجي أختنا بالله وتجلس معنا ووقتها بررررد ومطر ومسوين حليب زنجبيل صبت لحالها بكاسه واشربت وشوي تجيب كوب بلاستك وتعبيه وتطلع بالحوش وقتها كانت الساعه 6 وعشر استغربنا منها وش مطلعها بس استحت اي وحده تطلع وراها تشوفها وع الغداء جاء اخوي وانا اسحبه على جنب واقول له انصح زوجتك (ويعلم الله ان ذي نيتي) لاتطلع الصبح بالبرد مو زين لها ومرات مطر اخاف تتعب قال لي كلام صدمني كل مااتذكره ، قال : يالخبله هالي تشوفينها اصحى مني ومنك

قال : يالخبله هالي تشوفينها اصحى مني ومنك اصلا طلعاتها ذي هي الي خلتني اخطبها 😨 تدرين انها كل صبح لما اروح لدوامي انتظر السياره تدفى شوي اشوف باب بيتهم ينفتح ولا هالسواده وتطلع بنت وهي بكامل حشمتها وتصب للعامل الي يكنس الشارع شي حار يشربه ومرات تعطيه اكل ومرات لبس وقفازات وجاكيت ماتفوت موعده ابد ومن تسكر بابها اشوف العامل يرفع ايديه ويدعي لها مع اني كنت قبل اشوفه يوميا ماعمري مديت له ريال ومع الوقت صار العمال حول خمسه يتجمعون عند باب بيتهم تطلع تحط ترمس برا واكواب وحافظات اكل ، حبيتها من كل قلبي 😍قلت هذي الي وجودها بركه بأي بيت وانتي شوفي خلال شهر بس تيسرت امور من دخلت بيتنا اسمي طلع بالصندوق العقاري وترقيت ونقلوا مديري الي كان مسبب لي ازمه وكلامه صحيح احنا قبل نتقضى للثلاجه والبيت 2000 ريال ماتكفي واللحين يمر شهر ونص كأننا تونا متقضين ومن مشى واللحين لنا اربع سنوات كل مايجي شتاء نطلع طاوله عندنا بالمخزن حديد ونحطها بالشارع ونجهز برادات شاي وقهوه وحليب وفطور ونطلعهم برا على هالطاوله ..

كل الردود: 5
1.
عضو قديم رقم 346131
14:49:49 2014.11.24 [مكة]
بعدين وش صار
2.
15:15:41 2014.11.24 [مكة]
تعلمك وش تسوي الصدقة وش صار يعني ههههههههههه
3.
15:31:00 2014.11.24 [مكة]
اختيار موفق والاهم الوصل بينكم الله يديم الخير وهذه هي الحياه ارحموا من في الارض يرحمكم من في السماء
4.
08:21:03 2014.11.25 [مكة]
صدق سواليف حريم
5.
11:28:23 2014.11.25 [مكة]
قصت حياتها كلها