قصه واقعية

قبل 8 سنوات

قصة واقعية
💔

كنت في الدمام وخلصت شغلي بعد الظهر وأنا راجع للرياض وقفت في محطة خارج الدمام ونزلت عبيت بنزين ورحت للبقالة عطشان أبي مويه وببسي وأشياء للطريق
يوم جيت أحاسب لقيت مامعي ولا ريال ومافيه جهاز صراف آلي في البقالة
عرقت وجلست ألتفت يمين ويسار انحرجت
ورجعت أغراضي كلها إلا المويه
قلت بستأذن راعي البقالة وأرجع له
الدعوة ريال وأنا دايم أجي للدمام
وتذكرت راعي البنزين ينتظرني يعني المسألة طلعت بنزين مو مويه بس
وأنا واقف ومعي مويه أبي أحاسب لقيت ولد عمره 18 سنة تقريبا
قال لي: السلام عليكم
أقدر أساعدك
شافني متوهق
قلت له وانا أخوك توني طالع من الدمام عندي مشروع وخلصت ورجعت ومادريت إن مامعي ولا ولا ريال الا الحين وسيارتي برا تعبي بنزين
وأنا عطشان أبي هالمويه بس وحق البنزين وإذا انت راجع للرياض أقابلك عند اول محطة أعطيك
قال: أفاا بس ، ومد علي 100 ريال
انحرجت وقلت لا ابي 60 أو 70
قال خذها ولا عليك
قلت الله يجزاك خير وتراني بردها لك
قال : لا توكل على الله ماتسوى
تشكرت منه وأنا طالع أخذت رقم لوحته
قلت والله لأردها له
وحاسبت وركبت وشربت مويه وارتويييييييت
وقلت في ظهر الغيب الله لا يحرمك الأجر
أنا ماهمني شي كثر ماأروى عطشي وسقاني
ومشيت وتوكلت على الله وقرأت دعاء السفر وحاولت ألحقه بس هو يسرع وانا ماقدرت أسرع وراه
راح عني يوم وصلت مفرق جودة بعد 140 كم عن الدمام لقيت سيارة جيب ابيض منقلبه وانا ما تعودت أوقف في الحوادث في الطريق
لكن لقيت اللوحة نفس اللوحة اللي كتبتها في جوالي
وقفت سيارتي ونزلت لقيت منظر مفجع
لقيت العسكري يبعد الناس يوم جيت قال لي شف اثباتاتهم إذا حصلت شي قل لي
ولقيت واحد مغطينه ومعه بنتين وبنت مصابه وطفل طيب مافيه شي
ناظرت الرجال لقيته اللي عطاني الفلوس قبل ساعة
وسألت العسكري قال اتركه هذا توفى واناظر فيه ماقدرت أكمل
وشفت البنات وحدة ماتت في الحال تحسست رقبتها مافيه نبض والثانية تنزف وتحرك عيونها
جلس عندها مسعف وشوي ماتحركت وفارقت الحياة وبنت ثالثة مصابه لكن في وعيها
حاولت أعرف اسمه أو شي عنه ماقدرت
مشيت للرياض وغيرت ملابسي سحبت فلوس
ورجعت لأمن الطرق قلت لهم فيه جيب منقلب أبي اعرف من هو ومن أهله
قال لي لا ممنوع
قلت له القصة تأثر وعطاني اسمه
قال هذا فلان الفلاني وتراه توفى
وقال هو في مستشفى عريعرة الان
وكان الوقت أول العشاء ورحت للمستشفى وسألت الموظفة قلت من اللي مات ومن اللي سلم من حادث اليوم
قالت لي أسماءهم وقالت مات هو وخواته الثنتين
قلت متى الصلاة عليهم
قالت مدري والله
طلعت ووقفت في الطريق مدري وش أسوي
بس عرفت أسماءهم
وافتح تويتر أبحث عن اسمه مالقيت شي
وبحثت عن اسم اخته ولقيت هاشتاق باسمها
وادخل على وحدة منهم وسألتها عن وقت الصلاة عليهم
وقالت لي الوقت ومكان الجامع
رحت للدمام وصليت عليهم
وإلى اليوم مانسيته بالدعاء والصدقة والاستغفار والعمرة
كل هذا بسبب المويه اللي سقاني إياها
الله يسقيه من حوض نبيه
وكل صلاة ماأذكر إني نسيته هو وأخواته من الدعاء
الله يجعلهم في الفردوس الأعلى



🔷🔷🔷🔷


لما قرأت هذه القصة أيقنت أن الله إذا أحب عبد سخّر له من يدعو له بعد موته

قصه واقعية
عندك أي منتج؟
الكل: 7

لاحول ولاقوة الا بالله قصه محزنه

عضو قديم رقم 320572
قبل 7 سنوات و8 أشهر
2

تأليف القصة راااائع، ممكن نخرجها، يا حبكم للحزن و الموت وثقافة المصايب

اذا انت شايف انه تأليف ترى الناس فيها خير ولله الحمد
وفيه ناس يتأثر بفعل الطيب فيه
فلاتستغرب انه يتصرف بهذا الشكل
الله يرحمه ويرحم خواته

سبحان من يسخر له للناس من يدعوا لهم

الله يرحمهم ويغفر لهم ويعوضهم شبابهم بالجنة

اهلا




مو جايني نوم وحبيت اتكونن

" لقيت العسكري يبعد الناس "

شي جميل

ولكن

" يوم جيت قال لي شف اثباتاتهم إذا حصلت شي قل لي " !!!

سبحان الله كيف الهم الشرطي وخلاه يقصر بعمله حتى الرجال يعرف خويه

الا ادا كان الرجال عسكري فهدا شي ثاني

" وشفت البنات وحدة ماتت في الحال تحسست رقبتها مافيه نبض والثانية تنزف وتحرك عيونها "

او يمكن يكون مسعف !!!



بما انه تصدق توقعت انها بتدفع عنه البلاء و ما بيصيبه الحادث

ولكن المخرج يحب الاثارة و التشويق !!!



وناسف على الازعاج

صباح الخير للناس الرايقه

صباح الخير للناس الايجابيه فقط

دايم اعيد واكرر ان اي شي نعرضه بمنتدانا الغالي
حتى لو كانت القصص تلفيق او كذب ( خذوا العبره فقط ) واي تعليقات بايخه لاتكتبونها في ردود موضوعاتي لاني بحاجه للدعاء اكثر من حاجتي لكلام ممكن ان يجلب لكم السيئات بالاضافه الى تكدير خاطري الذي اسال الله ان يسعدني ويسعدكم ويسعد كل من لايجد من يدعو له ويسعد كل حزين وحزينه ومكترب وكتربه بتحقيق احلامهم وامانيهم ومايسرهم ويرضيهم

اللهم امين

اختكم الشامخه💔

عضو قديم رقم 320572
قبل 7 سنوات و8 أشهر
7

والله معاك حق، و جزاك الله خير

أضف رداً جديداً..