| جميع الحقوق محفوظة © دار تقنية المعلومات IT Dar |

قصه في منتدى

واحد كاتب معاناته بمنتدى ويبي حل مع زوجته 😂😂


انا عمري 34 لدي اربعه اطفال وزوجتي 28 سنه كل سنه تجي اقول زوجتي تبي تعقل والله انها تنهبل زياده عقلها خفيف غير ناضج خلاص متى تكبر وتعقل وتثقل انا صراحه استسلمت وقلت اطق عليها ثانيه خليها تعرف ان الله حق وهي ولا عندها انسانه من كوكب ثاني اضرب لكم امثله صداها لا يذهب عن بالي وتحملوني يا اعضاء لاني ابفصل المشكله

اذاضحكت ياليتها تضحك مثل الخلق لا ضحكتها موحده وهي نياهاهاه وبصوت عالي.... اذا جت تكلمني وتدري اني بجتماع رجال او كنت معزوم وش تسوي تتصل و تقول ابوووك يالثقل ياهوووه يالرسمي امووت انا على الي مسوي فيها ثقيل وتضحك بعدين تكلمني كلام جن*ي وتضحك تقول اتحداك ترد علي وبعدها نياهاهاها انا انحرررج قدام العالم اسكرها وهي تتكلم خلاص انا اذا صرت بجتماع مهم استحاله ارد عليها المشكله ترسل رسايل ابيك ضروري جدا جدا بسررررعه لازم تدري قبل الظهر ترووعني واذا رديت على طول نياهاهاها جيت للبيت وضربتها وصلت حدي قلت لها وقت الجد جد وقت المزح مزح وانا اضرب فيها تلمسني وتسوي نفسها دايخه اعطيها طراق تمسك يدي وتبوسها انسانه غريبه هجرتها ورحت غرفه ثانيه ما ادري الى هي لازقه فيني اقفل الغرفه تويق مثل الاطفال تحت الباب وتقولي كلمات لا استطيع البوح بها وتدخل اصابعها من تحت الباب وكل كلامها ضحك

مسكتها ورجيتها ونفضتها نفض قلت اعقلي اركدي والله لا اتزوج عليك ان صرتي كذا والله انها تطق رقبه تقول المملوح ناوي يعرس ومااالوه اعرس ؟؟؟ وتقوم تهزز المشكله اطفالي مثلها عقلهم خفيف مافيه ثقل اببد ماكتبت مشكلتي الى اني موصله معااي للاخر

امس بالشارع اسمع زعاق وصراااخ دخلت للبيت وش اشوف تضارب مع عيالها يجلدونها وتجلدهم وانا مستغرب صرخت عليهم ويطالعوني ويضمون بعض ويبوسون بعض ويقولون وش جابك ؟؟ حنا نلعب

اذا كان فيه استراحه وجمعه مع الاهل تركض مع الاطفال ومعها احتياطها ملابسها على طول للمسبح ماتجلس مع الحريم الى قليل مع اني اشوفهم يترجونها يقولون بعديين تعالي معنا وهي مالمك احد طبعا اهلي يحبونها

انا شكيت ان فيها مس من الجن ماهي طبيعيه اببد تصحى من النوم ترقص تقلب من نومها تهز كلمت امها وصارحتها قلت بنتك يبي لها قران لازم نوديها شيخ جت امها وودتها لشيخ ويقول الشيخ البنت مافيها شي المشكله امها تهاوشها بالسياره تقولها ليش تقولين لشيخ لا تتفل علي ؟ يوم طالعتها صرخت وقالت خله يتفل عليك كانك تبي تفاله قلت وعدنا البيت

العام قلت ابحج واخليها تحج معي ان شالله تعقل وتركد وش سوت بالطواف مع الزحمه الشديده استرخت على امرأه بدينه جدا تقول خلها تدفني واحاول اسحبها ماقدرت الزحام شديد وهي مبسوطه وتقولي يا سلام يدفوني رجليني ماهي في الارض صرت طويله وناااسه قلت لها احتسبي الاجر وتلتفت على المرأه وتقولها هييه وين وصلنا اي شوط احيانا غصب علي اضحك

عند ركوب الباص لذهاب الى الحرم مالقيتها ادورها مالقيتها اكلم النساء في الحمله غير موجوده نهائيا كلمت بعض الاخوان ندورها وين لقيتها ؟؟؟ تنظم العالم الي ضايع تقوله تعال هنا والي يدور باصه توديه للباص مسويه مرشده الحمله ؟ سحبتها مع رقبتها وانا اسحب وهي توصف تقول وش فيك ابي اجر وخر

كلمت والدتي تتفاهم معها تقولي ابصارحك بشي صح انه غلط تصرفاتها لكن لو فيني هموم النيا زوجتك اذا دخلت علي نسيت كل همومي قلت طيب انا ابتزوج ابي وحده عاقله قالت بكيفك لكن زوجتك ماتطلقها طبعا الوالده تحبهاحبا جما ودايم تناديها عندها

قبل شهرين رحت لمكه مع والدتي وزوجتي حطيتهم في التوسعه رجعت لقيت زوجتي ما انتبهت لي ماسكه وحده افغانيه وقاعده تتكلم معها جيت شوي شوي واسمعها تقولها شفتي الدنيا يوم لك ويوم عليك وتقص لها قصص والافغانيه ماتعرف عربي تهز راسها وهي ماتدري وزوجتي مواصله تشكي لها قلت لزوجتي وش تتكلمين معها ماتعرف عربي قالت ابد صارت صديقتي

الحل يا اعضاء انا نصحتها وهاوشتها وكلمتها وضربتها لكن مافيه فااايده شلون تعقل وتتفهم والله ثم والله تعبت ابي حل وافكر جديا بالزواج



لا تطوفكم القصه 😂😂💔
اقروهاحلوه
رهيبه احس اني حبيت المره وانا ماعرفها

كل الردود: 3
1.
00:10:56 2014.11.05 [مكة]
هههههههههههههه مسلسل كوميدي رفيع الطراز . اللي أشوفه بأن زوجته عايشه الدنيا بطولها وعرضها ، وصاحب الموضوع بالغ في سرد قصته ، هذا إذا ما كان له هدف آخر بموضوعه يريد أن يوصله للفتيات اللاتي يقرأن موضوعه ، نسأل الله السلامة . عموماً كان سرده مضحكاً وإلا فمثل هذه الأمور لا تذكر على صفحات الانترنت إلا من باب الدعابة بصيغ المبالغة نوعا ما .
2.
15:17:49 2014.11.06 [مكة]
ههههههههه . اذا كانت القصة مثل ما تقول .... فأعتقد ان عقليتها خفيفة شوي . ومن النوع الذي لا يبالي وقد يكون من المحبب عند الناس لان الناس تحب الي يضحك وعلى طبيعته ويدخل السرور على انفسهم . من حقك الزواج لكن لا تظلمها وتهضم حقوقها مهما كان مستوى عقلها . فأحسن لها يحسن الله لك وارحمها يرحمك الله . اما اذا كانت القصة من نسج الخيال لجذب القرأء . فأقول انت ابدعت هههههه .
3.
17:09:35 2014.11.06 [مكة]
كلك حركات القصة كوم وسالفة كم شوط بقى كوم ثاني نياه ها هاه هاه هاه:)