| جميع الحقوق محفوظة © دار تقنية المعلومات IT Dar |

عندي مشكلة بالتصرف براتبي (نصايحكم)

السلام عليكم ورحمة الله وبركاته
ياأخوان انا عندي مشكلة ومتورط لي شهووور
انا للأسف ماأعرف أدير أموري المالية بشكل مرتّب
أتمنى يجي يوم 20 ويكون معاي فلوس دائماً اطفر بنص الشهر
المشكلة هذي خلتني أتأثر نفسيّا كثير
انا عمري 26 أكبر أخواني متزوج لي سنة ولاعندي أطفال وبعطيكم معلومات ماليّة عشان تسهل عليكم مساعدتي
راتبي تقريباً 9000 الاف ريال
3000 ريال اقساط للبنك كل شهر (بقى سنة ونص لقسط 2200 و3 سنوات ونص لقسط 800)
1000 ريال مصروف شهري خاص ومهم جدا ماأقدر أكنسله(لشيباني)
600 ريال مصروف سيارتي (دوامي بعيد شوي)
100 ريال إنترنت لبيتي
300 ريال شحن لي ولحرمتي شهر كامل
السكن يجيني بدل سكن سنوي أدفعه كاش ولله الحمد
----------------
المتبقى من راتبي 4000 الاف ريال
ابغى منكم تعطوني نصائح من واقع خبرة وليس إجتهادات وتوقّع
ابغى يجي الراتب وباقي معي فلوس وأقدر أوفر
أنا ماكتبت هالموضوع الا من كم صدمه انصدمت فيها و مريت بمواقف بايخه جدّاً أقلها رقعة كفر ب10 ريال ماقدرت أوفرها
ابغاكم تساعدوني لرسم خطة ماليّة أمشي عليها شاملة كل شيء
من اهم شي لأتفه شي
وراح أمشي عليها من الشهر القادم بإذن الله لأن الشهر ذا زحلقن للأسف !!!!

دعواتكم



بإنتظاركم

كل الردود: 54

عرض:
1.
عضو قديم رقم 194440
05:49:28 2014.02.08 [مكة]
اشترك في جمعيات او ابدأ في مشروع انت نفس قريب لي قريبي يشتغل في الجيش اايام قبل كانت رواتبهم تبدا من 3000 تقريبا الحين راتبه مثل راتبك مع الزايادات 9000 ربي كما خلقتني ما تغير شي , لانه مسرف ولا يعرف يمسك الريال , ويحط نفسه في مواقف لا يحسد عليها مثله مثلك احيانا يجيني يبي ( ريالين ) تصور ^_^ شوف لك احد الحلين اللي فوق , اذا تشوف نفسك ما تقدر تمسك الريال
2.
06:48:13 2014.02.08 [مكة]
يعطيك العافيه اخوي لكن ماعطيتني حل انا اشوف اللي ناقصني تنظيم ونصائح ومسك فلوس ع قولتك والجمعيات راح تظغطني زيادة بإنتظار باقي الاعضاء
3.
06:58:58 2014.02.08 [مكة]
4000 حاول تسحب كل اسبوع 1000 و يكون مصروف الاسبوع لك اضغط على نفسك و مو اي شي يعجبك تشتريه بوقته .. و في بداية الاسبوع الثاني اسحب 1000 4 اسابيع = 4000
4.
07:07:15 2014.02.08 [مكة]
محمد شمس الله يجزاك خير طريقة جميله جدا بإنتظار البقية
5.
عضو قديم رقم 194440
07:09:12 2014.02.08 [مكة]
وش اللي تضغطك الجمعيات يا اخوي هذا اكبر دليل انك مبذر , اسمح لي على هالكلمه , بس هذا لصالحك ياخي اعرف شباب رواتبهم 3000 , وساكنين اجار , وقسط سياره , ووالخ ويوفرون شهريا 1500 ريال , عشان يتزوجون ويشوفون مستقبلهم وانت راتبك 9000 , والفائض 4000 , وخايف تضغطك الجمعيات !! انت كذا تذل نفسك وتهين نفسك , اذا خلص راتبك , وتجيك صغائر الامور , مثل ما قلت ( رقعة سياره ب 10 ) تروح تطلبها من احد وخاصه اذا يعرفون ان راتبك 9000 وتجي تطلبهم هالمبلغ البسيط يستحقروك اذا هذا تفكيرك , خذها مني : ماراح تتعدل اوضاعك
6.
07:19:50 2014.02.08 [مكة]
Axax اول شي الحمدلله على قد مامريت بمواقف قوية ماقد دقيت على احد اطلبه سلف نهائيا مع ان في ناس علاقتنا ببعض قوية يتسلفون مني ويرجعونها واقدر اخذ منهم لكن مااسويها لاني وببساطه ماتعودت ولااقدر ثاني شي الجمعيه تحطني في التزام شهري لاسمح الله حصل لي ظرف باحد الشهور واحتجت مبلغ او مريت بظرف ولاقدرت ادفع وهذي اشكاليات ماأحب ادخل نفسي فيها ثالث شي انت تحسبني انا ضد الجمعيات بالعكس انا معها للي راتبه كويس وماعليه اقساط ولايعرف يمسك فلوس وقتها يخش جمعيه لكن انسان بوضعي المادي المشابه صعب جدا يخش جمعيه ))(( الجمعيه للفلوس الزايده اللي ماتضمن تمسكها اتمنى الفكرة وصلت
7.
07:31:12 2014.02.08 [مكة]
الشي الرابع نسيت لااذكره لك يا axax انا قد جاني واحد يطلبني مبلغ تافه ع قولك يبي يعبي بنزين عشان يروح عمله والله مااستحقرته مثل كلامك ان الناس تستحقر الناس عشان السلف والمبلغ التافه بالعكس حلفت انه مايرجعها وقلت له اننا اخوان والناس للناس وبيمر علي وقت واطلبه وكلامي هذا عشان احسسه ان طلبه مافيه ذل ولامهانه زي ماتقول انت ان الطلب فيه ذل ومهانه اذا نظرتك للناس اللي تطلب كذا فحاول تغيرها وتنظر نظره ايجابيه فاليوم هو تحت وانت فوق بكره ماتدري يمكن ينقلب الحال
8.
عضو قديم رقم 194440
07:42:39 2014.02.08 [مكة]
والله يا غالي , انا كنت افكرك مثل قريبي لان قريبي نفس حالتك الماديه , وصار منبوذ في المجتمع بسبب التبذير , لدرجة ان ابوه طرده من البيت , بالنسبه للاستحقار اخوي , تخيل واحد راتبه يكفيه ودايم يطلب فلان وعلان وسلف وبعدين برجعهم ووالخ , وخاصه في المجتمعات القرويه يستحقروه طيب فيه حل اخر فيه اشتراكات او بطاقات في البنوك نفس نظام الجمعيات , لكن تقدر تبدأ ب 200 ريال وعلى حسب مقدرتك تسدد لهم شهريا , وبعد سنتين تقريبا يعطونك اياها ضعف , بس مادري والله نسيت وش يسمونه , اتوقع ( تكافل ) شي زي كذا
9.
08:22:09 2014.02.08 [مكة]
أفضل نصيحة تصدق تصدق تصدق راجع حساباتك : هل تقوم بعملك كما ينبغي كيف علاقتك مع الله لاتستهن بالمعصية ارق نفسك وتأكد أن أحدا لم يحسدك وليكن ظهورك طبيعي وعادي دون مبالغة فالكثيرين لايخافون الله
10.
09:03:03 2014.02.08 [مكة]
اعجبني رد رقم 3 كلنا نمر بضوائق مادية الانسب فعلا اشتري مقاضي البيت و لا تبذر من الحلقة و خلافها على الاقل تكون اغراض الشهر متوفرة لديك و يلزمك كماليات بسيطة اسبوعيا 500 ريال تكفي اذا اكلك و شربك في البيت و خلي يوم نقاهة تجيب اكل جاهز و خلافه ابعد عن المطاعم و الكافيهات و الامور الي مالها داعي و اصبر الى ان ينتهي قسطك يعدها لازم تشيل كل شهر 2000 ريال تخبيها تحت الارض ما تشوف الشمس ولا انت شغال ببلاش "خلق ليصرف" << و هذا حالي و حال الاغلبية :)
11.
09:56:04 2014.02.08 [مكة]
تصدق انا نفس الحاله ما عرفت ميزانيه للبيت وكل المحاولات باءت بالفشل بس انا عندي اولاد ومدارس مصاريف ومواصلاتمدارس وجوالات كل بزر يوصل سبع سنوات يبغى جوال كيف تحرمه والجيران مع اولادهم والله ورطنا باشياء ماكان لها داعي جزء كبير من رواتبنا للاتصالات والاجهزه وفواتير وكهربا اللهم لك الحمد ..يوجد تقصير منا ايضا بعدم التوازن واللخبطه في المناسبات والافراح
12.
10:57:10 2014.02.08 [مكة]
الله يكون بعونك وعون أكثر الناس لأن الكثير مثل حالتك للأسف. نصيحتي لك أولاً أن تدعي الله عز وجل بالبركة عند استلام راتبك وثانياً أن تتصدق منه ولو بشيء يسير فإن في ذلك بركة وثالثاً أن تحسن التدبير في راتبك وذلك بأن تضع لك قائمة مبدئية في أول الشهر بإيراداتك ومصروفاتك المهمة واللازمة بشكل جدول لا تحيد عنها إلا للضرورة القصوى وعندي ملف إكسل بسيط سوف يساعدك بإذن الله في عمل قائمة بإيراداتك ومصروفاتك بشكل إلكتروني فرجاء أرسل لي إيميلك على الخاص وموفق اخوي ،،
13.
11:27:45 2014.02.08 [مكة]
اذا بقى اك 4000 بعد التزاماتك معناه واح تصرف بالشكل المتوسط 2500 مصاريف للبيت يعني راح يبقى 1500 طلع منها 500 لاي ظرف غير متوقع مثلا لسياره لضيف لاي شي بالنهاية بيبقى معك 1000 ريال هذا المبلغ المفروض يتوفر من راتبك شهريا على اقل تقدير وعشان يتوفر اول ماينزل راتبك احجز الالف بطريقه تناسبك بحيث ماتفكر تستخدمه ابد. بالتوفيق
14.
12:42:57 2014.02.08 [مكة]
http://m.youtube.com/watch?v=wolUxI-1pJc&desktop_uri=%2Fwatch%3Fv%3DwolUxI-1pJc هذا حال الكثير منا هو الشراء دون حاجة ودون تنظيم. والاعتماد على البطاقة في الشراء او الفيزا الافضل الشراء كاش ومحدد اللي نبيه والأفضل لصاحب الاسرة الذهاب للجملة وشراء احتاجات الشهر من اكل ومنظفات وخلافه بالكرتونه ويخلي مستودع لذلك ويفضل مفتاحه معه هناك برنامج لتنظيم ميزانيات البيت وموجود في النت http://m.youtube.com/watch?v=wolUxI-1pJc&desktop_uri=%2Fwatch%3Fv%3DwolUxI-1pJc ممكن فيه برامج ثانية لكن هذا عينة وان شاء الله يفتح الرابط ويكون مفيد الأهم هو إعطاء الزوجة مصروف ثابت لا ينقص ولا يزيد أبدا أبدا أبدا التقليل من الخروج للمطاعم الا في كل اسبوعين مرة والأفضل في الشهر مرة تجنب الخروج اللمولات وان كان لابد فقط لتمشية بدون بوك النقود فقط مبلغ صغير لا يذكر للضرورة وخاصة ان كان الرجل بصحبة زوجته الغالية ولابد تخبرها بذلك مسبقا فقط لتمشية الأهم الصدقة والأقربين أولى بالمعرووووووف
15.
عضو قديم رقم 113340
13:21:11 2014.02.08 [مكة]
طيب انت ما حسبت الاكل والمشرب او التموين الغذائي الشهري .. المهم خلك بخيل حتى منتصف الشهر او على الاقل بعد مرور ال10 ايام الاولى من استلامك للراتب وبعد ذلك ابدا بالاهم والاولويه الاتصالات تصرف كثيرا ولا تشعر خصوص شحن الجوال لانها تأكل منك بدون شعور والاتصالات الغير ضروريه مالها داعي وطالما عندك انترنت بالبيت وبالعمل تستطيع اختصار المكالمات عبر الواتس اب . البخل ثم البخل هو الطريق الى الثراء او التحويشه .. الشهر الاول لو بقى من راتبك 4 الاف مافيه مشكله اضغط على نفسك الشهر الثاني حتى يتبقى من راتبك اكثر من هذا 5 او 6 الاف حتى ولو وصلت الى ال 20 من الشهر لانك كل ما تذكرت ان الراتب باقي عليه اسبوع مثلا او 10 ايام ستتشجع وتضغط على نفسك اكثر وسوف تتجمع معك خلال ال3 شهور الاولى مبلغ محترم وهكذا . والاقساط هي المفصل حاول تخلصها حتى ولو تجمع وتدفعها كامله هذا وانت ماعندك اطفال كيف اذا املتى البيت اطفال ستصبح مديون واعلم كلما زاد الراتب كلما زادت المصاريف وهذه تعتمد على نفسية الشخص في طريقة صرف راتبه ومفروض في وقتنا هذا كلما زاد الراتب خلك اكثر شحا وبخلا .
16.
17:40:57 2014.02.08 [مكة]
الحل : افتح لك حساب بنكي جديد بدون إستخراج بطاقة صراف لأنك إنسان مبذر ولا تعرف مصلحتك ولا ينفع معك الا الحرمان اعتبر الحساب البنكي الجديد شخص آخر وإذا احتجت استلف منه بشرط ترجع المبلغ مع الشهر التالي مصروف بيتك يكفيك 1000 ريال وكثيره فيك يالمبذر ويالمهايطي حول 3000 ريال شهريا لحسابك الجديد وياويلك وياسواد ليلك لو اشوفك توطوط عنده في نص الشهر إذا ما نفعت معاك هالطريقة بعد سته اشهر من محاولاتك الفاشلة يالفاشل انصحك تشوف لك طالب في الصف السادس ابتدائي يتولى امرك ويديرر دخلك يالدايخ
17.
18:18:03 2014.02.08 [مكة]
أبو محمد شوي شوي على الرجال ههههههههههه الله يقطع ابليسك فعلاً يحتاج اخونا إلى حزم في تعامله مع مصروفاته مع التنظيم وبإذن الله سيجد أنه يوفر مبالغ لم يكن يحلم بها.
18.
18:57:04 2014.02.08 [مكة]
اطلب الله انه يسهل امور وصل صلاتك في وقتها وبتعد عن المحرمات الصغيره والكبيره وأكثر من الاستغفار ومن يتق الله يجعل له مخرجا
19.
عضو قديم رقم 213166
19:17:37 2014.02.08 [مكة]
لباقي 4000 يالله يغطي مصاريف بيتك من تموين وخلافه ولاكن 4000 كثير على واحد مابعد عنده عيال ياخي. اقرب حل لك مثل ماقالوا كل اسبوع اصرف. 500. وتوفر لك الفين لان مصاريفك تقريبا ثابته.
20.
19:54:26 2014.02.08 [مكة]
. بقلم: أبومحمد1395 عمرك 40 واسلوبك اسلوب بزر بقلم: ابوياسر222 الله يجزاك خير يابوياسرر بقلم: المحيطalهادي الله يجزاك خير يالمحيط الهادي وفعلا شكلي بشتري اغراض المطبخ والثلاجة و500 ريال مصروف اسبوعي وزي ماقال اخوي الرايه التنظيم هو كل مااحتاجه
21.
عضو قديم رقم 356253
22:54:08 2014.02.08 [مكة]
تبي نصيحتي وما راح تخسر خصص 100 ريال للجمعيه الخيريه صدقه خله استقطاع من الراتب وقسم 250. لخمسه ايام واضغط علئ نفسك. صدقني راح تتبرمج علئ كذا واهم شي انصح زوجتك بالاقتصاد والادخار بس اهم شي 100 صدقه. وبنيه صادقه ونفس راضيه بقصد الاجر والانترنت ياخذ 100 اعتقد الصدقه والشكر ماهي خساره فيها 100 قال تعالئ ( وإن شكرتم لأزيدنكم )
22.
عضو قديم رقم 334913
23:39:23 2014.02.08 [مكة]
اخي الصدقه الصدقه انا جربتها ماتتخيل مصروف الاسبوع باقي منه واحس الفلوس فيها بركه واوصيكم ونفسي بكثرة الاستغفار تغفر الذنب وتجلب الرزق
23.
01:53:32 2014.02.09 [مكة]
العمليه سهله نضرياً 4000 الف ريال اذا اكلك و شربك في البيت تكفيك 1000 ريال ل اسبوعين اذا انت شخص يحب يتعشا في مطعم و يتغدا في مطعم ف هاذي مشكله كبيره جداً لازم تروح الى اقرب سوق بنده مثلاً و تتقضا للبيت من زيت رز مكرونه صلصات خضار كلهم يطلعون عليك 600 ريال اذا طار السوق و تكفيك انت و زوجتك لشهر كامل و خلي فطور غدائك عشائك في البيت يبقا تقريبا 3400ريال هاذي ما يحتاج لها مخ فقط لو قلنا بنزين يومياً 22 ريال 22x30 = يطلعلك 660ريال يبقالك تقريباً 2740 ريال هاذي تخليها متطلبات جانبيه للبيت مثل صحون كاسات اواني منزليه و تخذلك يوم يومين في الشهر يوم تدلع فيه نفسك و زوجتك في مطعم و تختار المطاعم بعنايه مو تروح لشارع التحليه تاخذلك كاس عصير ب 18 ريال و صحن قطعه لحم صغيره ب-79 ريال دورلك من المطاعم الي حولك الفخمه و تكلفتها صغيره في النهايه يمكن ينتهي الشهر و معك باقي 1000 ولا 800 الباقي تروح البنك و تودعه في حساب تكافل خل ايداعك يكون يدوي و كل شهر اذا نزل الراتب و باقي شيء معك من الشهر الي قبله دخله في تكافل نهايت السنه لو تحط 800 ريال يطلعلك 9600ريال اعذرني اذا فيه اي خطاء لي انه داخل على الموقع من الجوال
24.
02:04:45 2014.02.09 [مكة]
انا زي ما شفت في موضوعك السابق انه معك ماركيز 2008 مشاء الله عليه بس اذا بريت تدخل في الاقتصاد بقوه تغير سيارتك لي انه السياره 8V سرندل و مكينه اكبر و اقوا يعني يصرف بنزين اكثر يعني شبه يومي توقف تعبي بنزين و الفل عند الماركيز على خبري بنزين 91 فله 29 ريال دورلك سياره حلوه تكون قويه و جميله و عمليه و تكون 4V او 6V لتخفيف استهلاك البنزين وخلك على بنزين 91 اوفرلك
25.
عضو قديم رقم 326831
07:39:26 2014.02.09 [مكة]
داوم ع صلاة الضحى وسترى ان شاء الله
26.
09:06:45 2014.02.09 [مكة]
اخي جزاك الله خير انا مثل راتبك ووضعك اول شي سويته نزلت برنامج اسمه مصاريف على جوالي ايفون وحطيت فيه خانات شخصي زوجه البيت السياره ترفيه وكا خالنه مقسمه مثلا السياره (بنزيل زيت صيانه غسيل اجار) وكل ماصرفت شي سجلته في خانته اول شهر اكتشفت ان صرفت على المطاعم الف وميتين ريال (استبدلتها ثاني شهر بالاكل من البيت والدوام اخذ فسحه من البيت ووفرتها بدون زياده مصاريف على خانت البيت) وكمان اكتشتف في اول شهر ان زوجتي صرفها ضعفين صرفي بشكل مباشر وغير مباشر (على طول عطيتها مصروف وقلت انتي مسئوله عن طريقة صرفك ولا فيه غير 500 ريال وحاولي تجمعين من مصروفك لتشترين شي كبير وغالي لو بغيتي تصرفي) بستثناء الاعياد واعدتها ازيد الخمس مائه) وهاكذا وكل شهر اعالج مشكله من المشاكل اللي اشوفها تزيد مصاريفي لاني اكتبها في البرنامج واخر الشهر اشوف تقرير كامل عن مصاريفي غير اني اقدر اسوي مزانيه في البرنامج واعرف واحاول اضبطها غصب على شان ماتورط في اخر الشهر وهاكذا
27.
10:51:13 2014.02.09 [مكة]
السلام عليكم ، من أول ماتستلم الراتب ،سجل جميع مصاريفك الصغيرة والكبيرة ، إلى آخر الشهر وعند حلول الراتب الجديد . أنظر كم المتبقي عندك ؟ - ربما يكون بالناقص ( مدين ) :) - ،وحاول تحدد المصاريف اللي مالها داعي وتتجنبها ، أعمل نفس الحركة لمدة ثلاث شهور وسيتضح لك الأمر أكثر وستحدد بوضوح المصاريف اللي مالها داعي ، حاول تتجنبها في الأشهر القادمة بقدر المستطاع. أيضاً ، من الراتب القادم وتحت كل الظروف أبدأ بسحب 1000 ريال من راتبك وحطه في حساب جديد بدون بطاقة ، أعتبر هذه الـ 1000 مصاريف إجباريه جائتك بحكم قضائي ! ودبر عمر.! :) وبعد ماتخلص الأقساط ، وجهه مبلغ القسط إلى مقبرة الأموال في الحساب أبو بدون بطاقة ! إن لم يكن كله فأكثره .. لاتنسى الصدقة ، والدعاء ببركة المال . أحذر ثم إحذر أن يكون من ضمن مصاريفك مايغضب الله تعالى .. الله يوفقك .
28.
10:51:46 2014.02.09 [مكة]
الله يجزاك خير يا كاتب الموضوع ويا اصحاب الردود موضوع مهم ومشاركات قيمه اخ mat2bt لو سمحت بحثت عن برنامج مصاريف ووجدت برنامجين الاول مصاريف وصورة 100 دولار والثاني مصاريف سعودي أيهم تستخدم لو تكرمت؟
29.
11:02:28 2014.02.09 [مكة]
متابع ومهتم بالموووووووووضوووووع
30.
عضو قديم رقم 113340
11:03:34 2014.02.09 [مكة]
حديثي هنا لمن لا اقساط عليه او اذا كان عليه قسط بنكي يقوم بتقسيط سياره من شركات التقسيط او العكس اذا كان لديه سياره يقسطها من شركات التقسيط ولا يوجد عليه قسط بنكي يقوم بالاقتراض من البنك مبلغ خاص بشراء سياره جديده ليقسط للبنك . اشتر سياره اقساط حتى ولو كانت وكاله حتى ولو لا تحتاجها وقفها عند بابك الهدف من هذا الضغط على مصروفاتك التي تذهب في غير حاجه وكذلك بعد سنتين تقريبا من سداد جزء من اقساطها لان الاقساط 5 سنوات اعتقد تستطيع بيعها بعد سداد المتبقي من الاقساط دفعه واحده . وهكذا يصبح لديك مبلغ وقيمة سياره حتى ولو نقصت قليلا الا انها ستكون ركيزه لك تضعها في حسابك البنكي يشجعك على مسك يدك عن التبذير او البذخ الذي يلتهم راتبك .
31.
11:15:22 2014.02.09 [مكة]
عط 4000 الاف شيبانك وديعة وهم يحفضونها لك , او افتح حساب جاري بدون بطاقة سحب ولا تسجل في الهاتف المصرفي عشان التحو يل او السداد :بمعنى تودع من طريق حسابك الاول الى حسابك الثاني في نفس البنك حساب استثماري يقطع من الراتب المبلغ الذي تريدة اليآ حسب اتفاقك مع البنك وتركة سنة , ميثال اودع 3000 الاف بعد 12 شهر يطلع 36 الف وذا احتجتها للضرورة تسحبها عن طريق موضف البنك فقط, ونصيحة لكل واحد يعمل بها , بطاقة الصراف مثل سبحة الشيطان , تسحب ولا تدري الى رصيدك صفر , والله المستعان ,
32.
17:34:42 2014.02.09 [مكة]
هذا يعني انه راح يكون ال 4000 بقي منها مصاريفك من اكل وشرب وتمشية وملابس وضيوف وطواريء انا اقول اول كل شهر حط لك 500 ريال وهذي تشتري منها كل اغراض البيت حقت شهر قدام واعتبرها كافيه لكم شخصين حط لك 500 لزوجتك وتتولى مصروف نفسها من ملابس وجوال وخلافه حط لك مصروف جيب اسبوعي 250 ريال يعني لازم ما تصرف باليوم اكثر من 35 ريال واعتقد كافيه وهذي تعني مصروف جيب بالشهر 1000 ريال ( يبقى عندك 2000 ريال ) 1000 ريال ادخار وهذا ما تجيه مهما حصل 500 ريال تحطها للطواريء لا قدر الله شيء طاريء مو بالحسبان 500 تحطها تجميعة للسفر والترفيه وهذي لو تجمعها بالسنه تطلع لك 6000 ريال واتوقع بتكون كافية لسفريتين بالسنه وزيادة داخل المملكة والله يوفقك وييسر امرك
33.
عضو قديم رقم 162038
21:54:33 2014.02.09 [مكة]
حاول تضغط على نفسك بحيث الامور الي تبيها دايم او نفسك فيها تأجلها دايم علشان تكنسلها وخلك في البيت لاتطلع الا للظروره نصيحه لان الخروج يخليك تصرف واربعه والله تكفي وانا اتذكر كلمة لواحد من الشباب الله يستر عليه يبقاله من راتبه 900 زمان قلت له كيف تمشيك قالي انا امشيها ماهي هي تمشيني وصدق وربي
34.
23:30:57 2014.02.09 [مكة]
احد يبقى من راتبه 4000 ويتشكى .انظر لناس الي رواتبها اقل منك .يعني شخص متزوج ومستاجر وراتبه 4000ومصاريف ابناء واقساط وماشيه اموره .كثر من االاستغفار وصلاة الليل وربك يفرجها
35.
07:37:28 2014.02.10 [مكة]
بعض البشر ماودك يهرج ابد لافي نصيحه ولاغيره علطول تريقه واستخفاف دم قل خيراً او اصمت الله يعيننا على بعض العينات بالاول احرص على الصدقة لو بشي قليل والاقربون اولى بالمعروف ثانياً انا من رايي واناخوك اول ماينزل الراتب اسحب 4000 من الصراف وحطها بظرف وخبها في مكان آمن مايعرفه الا انت واصرف الباقي وادا احتجت شي لاتاخذ من المبلغ الا للضروره القصوى وعلى قد الحاجه واذا اخذت شي اعتبره سلف ورجعه الشهر اللي بعده يعني خل الظرف بمثابة شخص وتسلفت منه ثالثاً اقطع اي شي كمالي ولاتشتري الا اللي تحتاجه فقط فقط مو حاجه من اول استخدام لا حاجه تستخدمها دايما وضروري اوكي اشتر كماليات اقطعها تماما المطاعم على خفيف جدا او وقت الضروره
36.
10:35:54 2014.02.10 [مكة]
نصيحة نصيحة نصيحة نصيحةنصيحةنصيحة نصيحة أخ لك مجرب اصرف 30ريال وكل يوم خذ ريال وحطه بدرج السيارة وبنهاية الاسبوع حطها في يد عامل نظافة او مسكين وراح تشوف البركة بإذن الله تعالى . في الحديث أن النبي صلى الله عليه وسلم قال: (ما من يوم طلعت شمسه إلا وملكان يناديان: اللهم أعط منفقاً خلفاً وممسكاً تلفاً).
37.
عضو قديم رقم 181163
12:08:35 2014.02.10 [مكة]
احلى حل اصرف كل يوم 100 ريال ولا تتعدا هالرقم مهما كان واحيانا اصلن يكون صرفك اقل من 100 ريال اعطيك مثال الشهر فيه 30 يوم اضربها في 100 يساوي 3000 باقي لك 1000 من 4000 وتقدر تزيد دخلك مثلا جاك يوم صرف اقل من 100 ريال يغني باقي الفكه مثلا 30 او 40 او 50 حطها على جنب وجمع هالفكات لاتصرفها بكره او بعده او اي يوم لانك ملتزم بصرف 100 ريال يومياً بيجيك اخر الشهر معك الفكات جمعها وشف كم تصير واضف عليها 1000 ريال الباقي من ال 4000 لان مصروف الشهر 3000 حسب اليوميه 100 ريال اتمنى وضحت الفكره وانشالله تتسهل امورك وعليك بالصدقه والصلاة مع الجماعه والفجر احرص عليها جماعه
38.
12:25:49 2014.02.10 [مكة]
نصيحة اكفل يتيم ... ترى البركة في المال اهم من قلته او كثرته
39.
عضو قديم رقم 329363
12:29:33 2014.02.10 [مكة]
~~~والله صدقت اخي ....ابورائد2015.... بدل من كثرة الحسابات اكفل يتيم او اجعل مبلغ معين تتصدق به كل شهر ؤراح اتشوف البركه في المال والعيال ~~~
40.
12:46:19 2014.02.10 [مكة]
نصيحتي لك تفتح في نفس البنك الي ينزل عليه راتبك حساب جاري اخر وتسوي تحويل دائم على الحساب الجديد بمبلغ 3000ريال شهري ولا تاخذ لهذا الحساب بطاقة صراف او شيكات نهائي واعتبر راتبك ناقص 3000 ريال وشوف بعد سنه كم يكون 3000x12 =36000
41.
13:14:11 2014.02.10 [مكة]
وانا اخوك المشكله في الكماليات الزايده والفشخره والكلام الفاضي راتبك حلوا ومصروفك انت وزوجتك ما يتعدى 2000 في الشهر تبقى معاك 2000 احتياط بس عندك سوء تدبير عود نفسك ماهو كل شي تبغاه تشتريه ولا تشتري الا الشي الضروري كل اسبوع اصرف 500 تكفيك اسبوع انت وحرمتك انت زي خويي اخر الشهر يدور واحد يسلفه واذا كفاه راتبه لاخر الشهر يعني يصرف الراتب كامل يعتبر نفسه انجز انجاز كبير وانا نفس راتبه واوفر والحمد لله اكثر من نصف الراتب اذا ماهو 80% من اراتب اوفره وعليه قصد بنك 3722 هذي اخر سنه وساكن بالاجار ومتزوج وعندي ولد وبنت وعمري 28 ماعليك من اللي يقول عنك انك بخيل خليه يقول الناس ترى ما تنفعك اعرف ناس تشتري اي شي ويحاول يقنع نفسه انه ضروري وفي الحقيقه هو شي زايد انت ماجاك اولاد ترى مصروف الاولاد كثير الله يصلحهم حفايظ وحليب وحليب الاطفال كل يوم بسعر والله المستعان
42.
18:25:17 2014.02.10 [مكة]
الله يجزاكم خير ياشباب وكثر الله من أمثالكم ويعطيكم على قد نياتكم ماتوقعت الردود توصل لهالعدد وضعتوا لي الكثير من الطرق وراح تكسبون أجري وأجر من يشوف الموضوع ومتورط مثلي وفعلاً انا عندي سوء تدبير للأسف وردود كثير من الأخوه أنارت الطريق أمامي بشكل ماتتصورونه راح تصير الصدقه وكفالة اليتيم بإذن الله من اولوياتي مع نزول كل راتب عرفت مشكلتي وبحلها من الاساس راح اشتري ب700 ريال اغراض المطبخ وراح أضع مبلغ 50 ريال بشكل يومي مع الالتزام بأن أي شي ماله داعي ماأشتريه نهائياً مهما قيمته تافهه وإن ظبطت الخطه معناته راح اصرف بالشهر 2200 ريال التوفير 1800 ريال دعواتكم لي
43.
00:49:30 2014.02.11 [مكة]
الله ينور عليك فهم زوجتك عن التوفير و سجل في تكافل كل راتب لك يسحبون 300 ريال لما بعد سنة يطلعلك مبلغ تسافر فيه ولا تسوي فيه اي شيء
44.
عضو قديم رقم 293554
18:46:19 2014.02.17 [مكة]
حله بصيط جداً هل نسيت بركة الراتب في دعاء في كل شي واكثرنا ما نقوله ونا اولكم اللهم بارك لي في راتبي وعملي ، اللهم بارك في رزقي وبيتي ، وفي حاجه اهم ومجربه سو استقطاع شهري 50ريال او 100ريال اوانت واستطاعتك لأيتام وانت شخصي روح لدار الايتام وشف اليتيم صدقني تعمل عمل جبار لك ولدنياك واخرتك
45.
08:50:32 2014.05.07 [مكة]
^^^ رد الاخ ابوهديل44 بالاضافه الي الابتعاد عن شراء الاشياء عديم النفع مثل الفيران والسناجب والسلاحف وتذكر (من اشتري ما لا يحتاج اليه باع ما يحتاج اليه)
46.
08:55:00 2014.05.07 [مكة]
كلكم ماتعرفون السبب؟؟؟؟ السبب التبذير واكل المطاعم ودخول السوبرماركات وشراء اي شئ تصدقو ولا تسرفو
47.
12:26:13 2014.05.07 [مكة]
هذا ردي على احد الاخوان قبل ثلاث اسابيع .. شوفه امكن تستفيد منه يا طيب الله يبارك لنا في اموالنا ما أزيد عن كلام الاخوان بالصدقة والحرص انا عملت طريقه من قبل واعترف ما كملت عليها رغم انها نفعتني جيب ورقة بيضا حطها في المحفظة وبمجرد نزول الراتب سجل كل ربع ريال تصرفه من اقساط او التزامات او مصاريف اكتب المبلغ وتاريخ صرفه وفين مثلاً : الاثنين 10/4 صرفت 60 ريال في الصيدلية فرشاة أسنان ومعجون ودوا كحه البقالة 80 ريال حلويات للأولاد وجبنه و و و وهكذا اخر الشهر وبمجرد نزول الراتب الجديد أمسك الورقه الاولى وشوف صرفك فين ؟؟ تلاقي انك صارف اكثر من 50% ع حاجات مالها داعي او حاجات شاريها بزيادة الشهر الثاني تلقائيا راح تلاحظ انك خفضت المصروفات ف بدل ما تشتري في البقالة ب 80 صارت 50 وهكذا الشهر الثالث راح تلاقي نفسك اقل صرفية من الشهرين اللي قبلها لأنك بدأت تحس انك تصرف في النثريات الكماليات اكثر من اللازم بعد 6 اشهر تلاقي نفسك ضبطت الميزانية ع صرفية محددة جربها وماراح تخسر
48.
13:29:32 2014.05.07 [مكة]
أولاً : كفالة يتيم 250 ريال باستقطاع شهري واذا تبي الطريقة موجودة عندي ثانيًا : اسحب بداية كل اسبوع 750 ريال كمصروف لك وللعائلة والبيت لمدة سبعة ايام تكون معاك في المحفظة وحاول توزن نفسك فيها لمدة سبعة ايام والاسبوع الي بعده كذلك والي بعده بالاخير تشوف انك صرفت ثلاثة الاف ريال وباقي معك الف ريال
49.
21:12:28 2014.05.07 [مكة]
انا مثلك راتبي على طول يطير واخسر كثير صرفية سيارة وعلاج واكل مطاعم وملابس على طول يروح ماجمع الا قليل راتبي مافيه بركه ودايم اخسر وكل ماقلت هالشهر بجمع ماجمع الا قليل الشكوى لله
50.
عضو قديم رقم 268733
00:41:52 2014.05.08 [مكة]
هل تعمل اخي بجد وتحلل راتبك في عملك؟ اذا لا، عليك بالصدقة والصدقة
51.
14:17:37 2014.05.08 [مكة]
كل الطرق من الاخوان ممتازه. لكن هناك طريقه تستفتح فيه كل شهر من نزول الراتب. اول ماينزل الراتب خذ مبلغ بحدود الصدقه من كفالة يتيم او عمل خيري..وراح تعرف إيش إلي لك ولي عليك وربنا يبارك في رزق الجميع
52.
03:20:00 2014.05.15 [مكة]
الله يوفقك والتبذير زين وانا اخوك ... لك ودي
53.
15:50:36 2014.05.15 [مكة]
15. بقلم: فايز البخل ثم البخل هو الطريق الى الثراء او التحويشه .. افضل الحلول ومفعولها سحري وفعال جدا
54.
16:33:51 2014.05.15 [مكة]
انا متزوج وعندي اثنين راتبي 8000 ريال 7000 بتروح في مصاريف الشهر ( ايجار-قرض-مقاضي-مصروف-فواتير-حفايض-حليب-بنزين, الخ ) يبقى 1000 كيف احوشها ؟؟ ولا احد يقولي كيف ال 7 الاف تروح انا اقول اقعد احسبها يوميا من فطورك في الصباح الين وقت نومك وكل شغله تصرف عليها ريال واحد احسبها