عباره يرددها الكثير ( من حكم في ماله فما ظلم )

قبل 10 سنوات

عباره يرددها الكثير ( من حكم في ماله ما ظلم )

كثير كنت اسمع هالعبارات من اصحاب العقارات والعماير والمشاريع من حكم في ماله ما ظلم

بمعنى ااجر عمارتي لمستثمر اجنبي او ااجر الشقق الى عندي بمستاجر اجنبي مطنوخ او محلاتي للاجانب

وتجلس مع مالك العقار يقولك ياخي كيفي انت وش دخلك انا حر بمالي وحلالي

طيب واخوانك السعودين واصحاب الدخل المحدود وين يسكنو بالشارع يقوم يردد العباره المشهوره من حكم في ماله ما ظلم وانا ما ظلمت احد انا ابي ااجر شقتي لاجنبي يدفع وبس

اجل وش فايده العبارات الرنانه الشعب والوطن يد وحده وسارعي للمجد والعليان وكلنا ضد الاجانب اكلو حلالنا سو وفعلو

واقسم بجلال الله جلست مع صاحب عقار عنده 3 عيال عاطلين يقول ما عندك وظيفه لاحد عيالي بشركتكم عيالي عاطلين عن العمل وكل ما يتوظفو يستقعدولهم الاجانب ويقدمو استقالتهم

وهذا صاحب العقار جايله احد معارفي سعودي يبي يستاجر من عمايره يقوله ما ناجر سعودين !! يا شيخ

توك قايل الاجانب يستقعدو للسعودين والاجانب اكلونا والاجانب فعلو وسو واخذو وظايف عيالنا ... اجل وشلون تبي تاجر اجنبي يعني تناقض نفسك

الى يحز بخاطري هالايام عباره دايم اشوفها بمواقع العقار واصحاب الملاك لافته مكتوب ( عذرا الايجار للمقيمين فقط )

او تروح لمكتب عقار ويكرشك لمن يعرف انك سعودي وانت طالع من المكتب يدخل عليه احد الجنسيات بكرفته وبدله وتسمع الترحيب والتهليل

احس يا اخوان شعبنا متناقض والهرم الكبير ايضا متناقضين ( وافهم يا فهيم )

تجلس بالمجالس وتسمع عبارات ان دولتنا عندها خير واحنا اولى بهالخير ليه نرسل للدول الاجنبيه والفقيره واحنا اولى احنا كمان عندنا فقر وبطاله

ولمن تتمعن بذولي الى يتكلمو تلاقي فيهم قمه الحسد والغبنه تجاه بني جلدتهم السعودين برفع الاسعار والتحجير باسعار العقارات والسلع واغلبهم تجار

اجل وشوله تقولون احنا اولى وعندنا بطاله وفقير ليه تتكلمو بصيغه الجمع وانتو الى مخربينها وحسودين

ولا حكومتنا الرشيده تكب من ذي الدراهم للدول الى برا وتستغرب اننا ما عندنا فقر وبطاله ويتعجبو ان في مواطنين بلا مسكن

والله ما ابي اتعمق بالموضوع الخلاصه انت ما عباره من حكم في ماله ما ظلم ومع عباره عذرا احنا ما ناجر الا للمقيمين ولا لا

والرجو النقاش بصلب الموضوع بعيد عن التجريح لشخصي مجرد مشاهد شفتها بالواقع وحبيت اطرحها بموقعي الغالي

عباره يرددها الكثير ( من حكم في ماله فما ظلم )
عندك أي منتج؟
الكل: 4

من حقك طرح الموضوع ولكن بسألك ... هل انت متعاطف ام تتكلم من واقع تجربه ؟
لو انت صاحب عماره ومتأذي مع الأسف من أبناء بلدك اللي يهايطون بعزايم وعانيات وسفريات وما عنده تنظيم او التزام للغير وعلى سبيل المثال دفع الإيجار ... لان مافي نظام يضمن حق المؤجر ويقعد يهبل بك وكل يوم شكوي وأقسام شرطه ولا تخلص معه وان طلع طلع بنفس شينه ولا حمدا ولا شكورا بتأجره من شققك ؟؟؟ اترك الإجابة لك

وإلا تشترط اجنبي لان الأجنبي ما يقدر يلف ويدور وكذلك لان صاحب عمله او كفيله يدفع له سنويا إيجاره وبالتالي هو شخص مضمون .

وكذلك توجد نقطه مهمه ربعنا يطلع من الشقه حتى لو انه ماقعد فيها الا سنه والشقه كلها شخاميط وبيبان مكسره وحمامات رايحه فيها من قله أدبه وضعف تربيته لأولاده والاجنبي لو انه قاعد فيها عشر سنين كأنها جديده .

كل ماذكرت لك من واقع تجربه مريره مع المستأجرين وبكل أسف أقولها الأجنبي افضل بمراااااااحل

لو انك صاحب عماره بتأجر سعودي بعد اللي طرحت عليك ؟؟

لاانكر انه يوجد من أبناء بلدنا من هو افضل من الأجنبي بكل المقاييس ولكن يظل الأجنبي في التأجير افضل

ونسمع من بقيه الأعضاء وأتمنى ان أكون مخطىء

والله ما املك عماره ولا مسكن ولا حتى مشروع انا موظف بسيط في شركه فقط ,,, ولا متاذي من احد ولا اذيت احد بحياتي كل الحكايه طرحت عالموضوع من الى شفته وسمعته بالمجالس الى اجلس فيها مع الرجال وشكرا لتعليقك وعلى راسي من فوق

المصيبة الأدهي والأمر اني سعودي وساكن في شقة عقد ايجارها باسم واحد يمني تحت كفالتي لانة متأهل وانا عزوبي ههههههه والحارس يمني كل شهر اعطية 150 ريال تغسيل السيارة حتي يسكت ولا يقول لصاحب العمارة اني عزوبي هذا غير اشياء اخري مايصير تنقال علنا يعني ندهن السير حتي يسير مع ذا الحارس مجبورين ويش نسوي يا نعمل كدا يا نديرها خيام في الحدائق ولما تجيك البلدية وتطردك روح دور لك حديقة بعيدة ومشي حالك والحمد لله صاحب العمارة في مدينة ثانية طبعا كنت ساكن في عمارة كلها عزاب مقيمين علي سعودين بس المشكلة كل شهر او شهر ونص والدورية محضرة عندنا تفك مشكلة بين الشباب والله حالة

كلامك يا صاحب الموضوع في محله

لكن كل شيء وله سبب والخير يخص والشر يعم

قدام بيتي عمارة فيها 10 شقق كلها شوام قبل 3 سنوات طلع واحد من المستأجرين وصاحب العمارة أجر واحد سعودي الأصل والمنشأ وابن قبيلة لأنه دفع 2000 ريال زيادة في الإيجار وجلس سنة دفع 6 شهور فقط وطفش المستأجرين وأولاده أذوا الحارة

هل لو كنت مكان صاحب العمارة بتأجر لأي سعودي؟

أضف رداً جديداً..