الجوال والاطفال ///قصه

قبل 7 سنوات

ولدي ماكان فيه شي ابداً ابداً لما كمل سنتين كان نومه عكس نومي اذا نمت صحى وكان يصحى الساعه سبعه الصباح واعطيه الجوال وانام ويجلس عليه لين الساعه تسعه وينام واذا كان عندي شغل اعطيه جوالي واروح اخلص كل اشغالي وهو جالس على الجوال وعلى هالحال بس شهر واحد وبعدها لاحظت عليه حركات غريبه كذا كأنه يسرح ويفتح فمه واناديه مايرد علي الا اذا رفعت صوتي مررره والحركه هذي تتكرر كثير وبعدها ينسدح ويطالع السقف وانا خلال هالفتره ماكنت اتوقع انه من الجوال ابداً كنت اقول مايمديه بس شهر مو معقوله اثر عليه وكان ياخذ الجوال مااقوله شي وبعدها تطور الامر صار يمشي في الغرفه رايح جاي رايح جاي ويمسك راسه ويدور واحيانا احس انه يتألم من شي يعني فجأءه يمسك راسه ويسد اذنيه ويلف راسه يمين ويسار واحس انه منكتم او كأنه متضايق مره عرفت ان الجوال هو السبب لانه جالس على الجوال سنه صح اني صرت مااعطيه الجوال الا قليل بس ماقطعته نهأئياً فقررت اقطع الجوال والتلفزيون مرره اقطعه نهائياً وجلست شهر ولاحظت ان الحركات خفت بس ماراحت وقلت لازم اكشف عليه لاني توقعت معاه تشتت بالانتباه ابداًماتوقعت انها شحنات ورحت للدكتور وطلب تخطيط للمخ والنتيجه طلعت اليوم ان فيه صرع الشحنات الكهربائيه عسى ربي يشفيه ويقر عيني بشوفته متعافي
اكثر شي يألمني ومعذبني اني شريت راحتي واهملته ليتني جلست معاه ومانمت وانتظرته لين ينام وانام معاه
ليتني خليته يحوس معاي في اشغال البيت ولا اعطيته الجوال
احس بتأنيب الضمير انا اللي متسببه بتعبه ليتني صبرت على شقاوته ولا خليته يجلس عليه
تكفووون الحقوووا على عيالكم قبل يصير فيهم شي
للمعلوميه ترى الجوال ماكان بيدينه 24 ساعه لا وربي كانت كم ساعه بس اثرت عليه لانه صغير
الدكتور يقول الشحنات من الجوال وممنوع منعاً باتاً يمسكه قبل 3 سنوات ولو نص ساعه يضرر يضرر يضرر
انا الحمدلله صابره وراضيه باللي ربي كتبه واعرف انه احسن من غيره وانه افضل بكثير من غير يارب لك الحمد
بس انك تحسين انك انت السبب احساس مره مؤلم 💔

الجوال والاطفال ///قصه
عندك أي منتج؟
عفواً.. لايوجد ردود.
أضف رداً جديداً..