ماهو الحل لأهل الخبره في سوزوكي جيمني jimny

بالنسبة للرجة مع الفرملة ... شكل هوبات الفرامل الامامية محتاجة خرط. يكن لازم تغير فحمات فرامل معاها.
بالنسبة للرجة وانت ماشي ... يمكن كفراتك قديمة تحتاج تغيير. تقدر تسوي ترصيص كفرات اول واذا مافاد ... شيك على الكفرات يمكن لازم تغيرها ... على الأقل الامامية.
بما ان السيارة دفع رباعي فيه احتمال ثاني للرجة وهو يمكن ربلات وجلد عمود التوازن الامامية مهترئة او مساعد ذراع التوازن خربان مع اني اشك لان موديل السيارة جديد (كم ماشية؟)

تحتاج غسيل بخاخات عشان ريحه البنزين وتشييك هل فيه تهريب او لا
تحتاج تشيك على مراوح التبريد وتنضيف الرديدر واذا ماراحت المشكله تغير كمبروسر
اما الرجه مع الفرامل تحتاج خرط هوبات ووزن وترصيص
وبارك الله لك في موترك

جزاكم الله خيرا
اخواني الموتر جديد 8000كم فقط

مادام الموتر جديد:
بالنسبة للرجة مع الفرملة ... شكل هوبات الفرامل الامامية محتاجة خرط. يكن لازم تغير فحمات فرامل معاها.
النسبة للرجة وانت ماشي ... سوي ترصيص كفرات اول واذا مافاد ... شيك على الكفرات (حتى لو جديدة) يمكن فيها مشكلة من سوء تخزين السيارة ...الخ
ليه ماتوديه الوكالة ... المفروض الاشياء هذي تحت الضمان
بالنسبة للمكيف: هل مروحة المكينة عادية والا كهرب؟ وكم مروحة فيه؟

مروحة عادية بالمكينه و مروحة كهربائية للمكيف وسلامة الجميع.

الكفرات مغيرها المستخدم الي قبلي بس مدري عن ترصيصها.

بالنسبة للمكيف ... طبيعي اذا انت واقف يصير ضعيف لان رديتر المكيف مايجيه هواء واجد.
اذا كان الجو حار مرة وانت واقف وتبي تبريد المكيف يزيد ... ممكن تخليك ضاغط على دواسة البنزين (لاتضغط واجد ...) ... يعني تزيد ريس الموتر شوي ... طبعا هذا فقط حل مؤقت يفيد وقت الحرارة الشديدة ...

hmd100100
طال عمرك صحيح كلامك جربتها، ولكن فيه حل تغيير مروحة المكيف ولكن ماعندي علم وش الأفضل النوع
والقوة ( تجنب مصاريف بدون فائدة ) وانا ابحث عن مجرب
فيه فكرة في راسي وهي تركيب رشاش ماء يرش على الديتر الماء والمكيف وسهله = قربه+مفتاح+رشاش
+لي، فقط نفس فكرة المرهمات

^^^
الي يقول خرط هوبات وتغغير كفرات السياره جديده وماشيه 8 الاف مستحيل الكلام هذا

صاحب الفكره الجهنميه ( رشاش ماء ) الحديد الساخن اذا ترشه بالماء ينكمش بسرعه ويرجع يتمدد بسرعه وممكن ان الوصلات تتقطع ويخرب

نصيحه :/ تواصل مع احد ملاك نفس السياره وتاكد من ان العيوب هاذي عندك فقط
لانها اذا كانت عيب في جميع الموديل فلا يوجد حل

ابونواف1
مو مستحيل اخوي تعال جرب الموتر وسلامة الجميع

ابو نواف
فيه وكالات غيرت كفرات لزبائن سياراتهم ماكملت 1000 كم لعيوب في الكفرات من سوء التخزين او عيوب مصنعية. بعدين الاخ صاحب الموتر يقول ان المستخدم السابق غير الكفرات (مع ان الموتر جديد). يعني اكيد كان فيه سبب.

اما عن رش الماء على الرديتر ... فــ اغلب الرديترات تصنع من الالمنيوم (حتى لو لونها اسود) والرديترات القديمة تصنع من نحاس ... يعني رش الماء عليها مايأثر.

الرجة في الفرامل ممكن تصير حتى للسيارات الجديدة.
هل تعلم انه بعد تغيير الهوبات والفحمات ينصح انك تسوي لها تمرين عشان ماتتاثر وتصير ترج.
والطريقة سهلة:
سوق السيارة بهدوء (سواقة شيبان) لين توصل شارع او ساحة فاضية. بعدين سو الاتي:
1- امش لين سرعة 100
2- اضغط الفرامل بقوة لين تصير السرعة 10 بس لا توقف
3- كرر الخطوتين 1 و 2 تسع او عشر مرات.
4- بعدين امش بالموتر عادي وبشويش لمدة 15 او عشرين دقيقة
5- وقف الموتر وخل الفرام تبرد
6- كرر العملية هذي في اليوم الثاني.
اهم شي في العملية هذي انك ماتوقف وتقعد ضاغط على الفرامل والموتر واقف.
افضل وقت لتغيير الهوبات والفحمات هو الشتاء اذا كان الواحد يقدر ينتظر.
شف الفيديو هذا يشرح طريقة تمرين الفرامل بعد تغيير الهوبات والفحمات:

https://www.youtube.com/watch?v=KRVoNYhvJuE

بالنسبة لتغيير مروحة المكيف ... كل شي ممكن ولكن انا ماافضل الترهيم والتغيير الا في موتر قديم او مخصص للتطعيس ...الخ
اذا كان ولابد شف كهربائي فاهم يحط لك مروحة اضافية اذا فيه مكان ...

من خلال تجربتي لمثل هذ الجيب ما فيه عيوب ابدا بإستثناء المكيف . صحيح مايبرد بشكل ممتاز اثناء الوقوف والسبب ان الكمبروسر صغير جدا لكن انت شيك على الفريون للتاكد فقط .

مشكله ريحه البنزين احتمال فيه تنسيم بسيط مع غطاء التانكي او الجلده اللي حول طرمبه البنزين تحتاج تغيير .

مشكله الرجه هذي فيها أشياء كثيره تسببها مثل : مسامير توازن-عامود توازن-هوبات-مساعد الدركسون-ترصيص كفرات-الجنوط .

ان شاء الله تكون المعلومات مفيده للجميع , للإستفسار اكثر تواصل معي على الخاص .

بيض الله وجيهكم وحرمها عن النار، جزاكم الله خيرا

سبحان الله وبحمده سبحان الله العظيم

السلام عليكم ورحمة الله وبركاته
للأسف الشديد لايوجد متمكن في الجميني

حل مشكله الرجه مساعد دركسيون ايسي ديلكو فقط
يتبع باقي المشاكل أن شاء الله بعد التجربه لمروحه المكيف وشكرا

مرحبا اخوي al-aziiz
انا قرأت بكذا موضوع ان حل المشكلة هو بمساعد تثبيت. مثل البرو كومب وايسي ديلكو اللي قلت عليه.

ممكن تقولي وين حصلته، وبكم سعره، وهل فيه ورشة تعرف تركبه

وهل فعلا راحت الرجة نهائياً؟ انا متردد اني اشتريه ولا احصل احد يركبه صح
لاني ما لقيت احد فاهم بالجمني عندنا للأسف.

مع الشكر

السلام عليكم و رحمه الله و بركاته
أخوي سعره 120 ريال حق جمس يركبه اي واحد بالصناعيه لحام قواعد فقط وهذا رقمي للتواصل واتس اب 0567744344

السلام عليكم
اخوي تم بحمد الله استبدال مساعد دركسيون ايسي ديلكو بمساعد فرخ شبح مرسيدس 126

وذلك بسبب ثقل المساعد في ورشه الحربي خلف الراجحي الصناعية القديمة بالرياض تقريبا التكلفه 75 ريال مساعد و 150 ريال شغل يد