| جميع الحقوق محفوظة © دار تقنية المعلومات IT Dar |

تجربتي مع شراء تظليل عن طريق النت

مقارنة للأنواع المختلفة الكارتون كما وصلني تعليمات التركيب مع الضمان مع وصل الشراء الفلم الشفاف مقصوص وجاهز عدة التركيب.. مالها داعي

السلام عليكم جميعا..

حبيت اشارككم تجربتي بشراء تظليل للسيارة عن طريق الأنترنت، من موقع "ايباي"

طبعا بالبداية اخترت درجة التظليل المسموحة اللي هي 35% لجميع السيارة ما عدا الزجاج الأمامي.. يجي بدرجة 80% (شبه شفاف) ستاندرد.

طبعا النوعية اسمها بلاك بوكس.. وحسب تصنيفها ما في افضل منها الا ال 3M نانو كربون

اللي اشتريته انا مصنوع بتقنية النانو سيراميك.. ومواصفاته مبينه اعلاه.

السعر 146 دولار امريكي لجميع السيارة.. واذا استغنيت عن الزجاج الأمامي يطلع ب 101 دولار..

تعطيهم نوع وموديل السيارة ويقصولك اياه عالكومبيوتر.. وتقدر تشتري رولات كاملة.

الشحن يكلف 135 ريال عن طريق فيديكس.. لكن اذا عندك احد تعرفه بامريكا او كندا يشحنوله مجانا وهو يجيبه.. مثل ما سويت انا (-:

وزن العبوة تقريبا 1-1.5 كج.

حتى عدة التركيب يودولك اياها.. مثل اللي بالصورة.

طبعا الضمان مدى الحياة.. لكن ما اظن اقدر استفيد منه..

المشكلة الان بالتركيب.. ما ودي اركبه عند ابو يمن.. يحتاج ايدي مختصة.

رحت اليوم على زيبارت و رفضوا يركبولي اياه.. بس الرجال قالي روح شارع الملك سعود تحصل فلبينية شاطرين.

طبعا تظليل زيبارت يكلف 2300 ريال!! وما هو نانو سيراميك.

هالحين ابي فزعتكم تدلوني على ناس متخصصين بتركيب الافلام الاصلية.. تكفون..

كل الردود: 13
1.
عضو قديم رقم 310218
17:16:01 2012.09.17 [مكة]
يا خوي والله انا مركب عندد يمنيين والله اشطر ناس انا مركب في البطحاء عند مطعم الواحه والله ابداع حقيقي ولا في اي فقاعه ولو صغيره ما تلاقي روح هناك وتلاقي خير
2.
23:52:48 2012.09.17 [مكة]
تسلم عالنصيحة اخ نايف.. لقيت محل يركب 3M.. بس طلب 400 ريال. رحت عند واحد يمني.. كل شي تمام ما عدا الزجاج الخلفي.. ما عرف يركبه.. واضطر يقصه بالنهاية.. خليت الزجاج الأمامي ما ركبته بعد..
3.
عضو قديم رقم 307152
00:20:09 2012.09.18 [مكة]
يا اخوي كم يكلفني سعودي وتقدر تخدمني بيه لو بغيت
4.
00:28:37 2012.09.18 [مكة]
حيالله اخ wizard كلفني بدون شحن 550 ريال.. بس ترى ما عليه ستيكر ولا ختم ولا شي..يعني بدون مظاهر.. خليني اجربه هاليومين بالحر واردلك خبر اذا انه عملي.. وابشر بالسعد.. بس تراني بالدمام.. وحاليا ما عندي احد مسافر امريكا..
5.
عضو قديم رقم 293242
15:46:24 2012.09.18 [مكة]
شيء طيب وحركه حلوه اذا كان ممتاز . عني انا مااحرص على نوعيته سيارة طلعتها وكاله وضللتها عند كار كير اكسبرس لانها عائليه والتضليله معروفه ورى كاتم والسواق شفاف والامامي شفاف اما سيارتي العاديه اضلل العازل ب15ريال القزازة الوحده وبعد كم يوم يمسكوني وافكها ههههه وربك يعين .. الكتم صراحه راحه ماهي طبيعيه لكن تنعمي بالليل ماتشوف زين ولا امسك خط بالشمس ولا احس فيها
6.
02:26:12 2013.02.01 [مكة]
السلام عليكم بشر جربت التضليل و كيف اداءه والان ودي اضلل سيارتي من نوع كراون فكتوريا 2011 وين تنصحني طبعا بالدمام انا
7.
13:48:39 2013.02.01 [مكة]
هلا al7war والله التضليل ممتاز.. لكن اللي ركبه لك عليه.. طلع عندي فقاقيع صغيرة عالقزاز.. طبعا الكل يتسائل ليش تطلع الفقاقيع عند ناس وناس لأ؟ من تجربتي انه لازم الفني اللي يركب التضليل يستخدم الموية والصابون لتنظيف القزاز بالاول.. ويمسح المويه عن القزاز باستخدام القطعه المطاطية (مثل القشاطة الصغيرة) او باستخدام قطعة قماش لا تترك وبر عالقزاز.. واياك تخليه يستخدم كلينكس او فاين. عدا عن ذلك التضليل ممتاز حراريا.
8.
15:33:13 2013.02.01 [مكة]
احسن حاجة سويتها انك جبتة من برا يا جماعة الي يبي اطلب لة من برا يجي خاص
9.
15:36:18 2013.02.04 [مكة]
اخواني.. وردني الكثير من الطلبات والرشائل على الخاص للمساعدة في شراء التظليل عن طريقي.. صراحة لو انه شخص واحد يبشر.. لكن كثرت الطلبات على فبعتذر من الجميع. على كل حال الامر بسيط جدا.. وبامكان اي شخص انه يعملها بالخطوات التالية: 1. روح فيديكس وخلهم يسولك عنوان بريدي بامريكا. على ما اظن يكلف 35 ريال سنويا. 2. هالحين تقدر تشتري اي شئ عن طريق النت باستخدام هذا العنوان.. اي شئ تشتريه سوف يتم شحنه لهذا العنوان.. وفيديكس راح يشحنولك اياه تلقائيا عالسعودية. 3. طبعا تحتاج فيزا كارد او ماستر كارد.. واذا ما عندك تقدر تروح جرير وتشتري من عندهم بطاقات شراء عن طريق الانترنت مسبقة الدفع.. طبعا اغلى شوي.. يعني المية ريال يبيعوها لك ب 130 على ما اذكر. 4. لشراء التظليل انسخ الرابط التالي: http://stores.ebay.com/filmvantage 5. ابدأ بادخال نوع سيارتك والموديل في الخانة على يسار الشاشة. 6. انتبه وش تشتري بالضبط.. كل شيئ يباع على حدة.. يعني تظليل فتحة السقف يباع لوحده.. وتظليل الزجاج الامامي كذلك.. وفي تظليل للشبابيك الامامية فقط.. وفي تظليل لجميع الشبابيك ما عدا فتحة السقف والزجاج الامامي. انا اشتريت هذا النوع بالاضافة اني اشتريت معاه (بطلب شراء مستقل عن الاول) تظليل للزجاج الامامي.. والزجاج الامامي ييجي شفاف 80% ستاندرد. 7. لا تنسى تذكر درجة التظليل المطلوبة..اذا ما طلبت راح يرسلولك تظليل 20% تلقائيا.. اتبع التعليمات المذكورة في الموقع. 8. طبعا تقدر تشتري نوعيات اخرى موجودة عندهم.. مثل Lumar و 3M وغيرها.. لكن الاسعار تختلف. واي استفسار اخر انا جاهز انشالله.. واعتذر من جميع من ارسلي عالخاص لعدم امكانية الشراء لهم.
10.
22:13:10 2013.02.04 [مكة]
المشكلة في التركيب صح وفرت 300 ريال بس احسن شي ركب هنا وريح مخط وين الي يضبط الشغل لازم تفكك جلد القزاز عشان ماتطلع فقاقيع
11.
15:21:02 2013.05.07 [مكة]
احسن شئ دور على يمني متجنس امريكي
12.
عضو قديم رقم 168459
21:52:24 2013.05.07 [مكة]
أفضل من اللي موجود في السوق... وماهو الفرق...
13.
23:03:27 2013.05.07 [مكة]
والله ممتاز.. يعني اقدر اسوق السيارة واحط يدي على الطارة بدون ما انحرق.. طبعا ما في شي يمنع الحرارة كليا.. لكن المكيف فرق.. و سخونة الطارة والتابلو قلت ايضا. ركبت الامامي عند ابو يمن اللي عند رامز.. تركيب ممتاز صراحة..