السيارة تضررت بالامطار والمكينة راحت مشورتكم

قبل 8 سنوات

السلام عليكم ورحمة الله وبركاته ,,

قدر الله ما شاء فعل .. الحمد لله أولا واخراً ..

في عاصفة الرياض الأسبوع الماضي يوم الثلاثاء تعرضت سيارتي العائلية من نوع يوكن 2007 ( مشتريها قبل 10 أيام بالضبط ) إلى ضرر بسبب المطر ..
دخلت في تجميع مياه و طفت لحالها مباشرة ..

حملت السيارة على سطحه وعلى الميكانيكي وبدأنا فحص السيارة ..
الزيت ( نظيف ) مثل ماهو ما خلط ماء ولا شي ..
ولكن ظهرت رسالة " تم خفض طاقة المحرك " و رسالة عن حساس ال ABS
طبعاً بدأنا فحص الدوائر الكهربائية كاملة .. واصابع البطارية والسلف والدينمو وكل شي متوقع ولكن لا حياة لمن تنادي

(( لاحظنا ان السيارة تسحب كهربه وتفضي البطارية على طول في نص ساعه )) لذلك قلنا نفحص الدوائر الكهربائية لعل وعسى يكون في خلل في احد الاسلاك وصارت تسرب الكهربه ..
ولكن لا فائدة ..

فتحنا حساسات الثروتل والدعسة وحساسات الكومبيوتر ونظفناها ورجعناها .. ومافي فايدة
في النهاية فتحنا الثروتل نفسه و وجدنا التالي :

الثلاجة مليانه موية , الثروتل فيه موية , فلتر الهواء فيه موية .

سؤال للخبراء : طيب اذا الموية مليانه في الثلاجة والثروتل مو المفروض تكون دخلت المكينة وخلطت ؟؟؟؟
ليش زيت المكينة نظيف ومافيه شي ؟؟؟


اللي حصل بعد كذا نظفنا الثلاجة والثرتل وغيرنا الفلتر .. وحاولنا نشغل وما اشتغلت .. :(
رجعنا فكينا المروحة ومن بكرة الكرنك حاولنا نفر المكينة ولكن ظهر انها مجيمه للأسف ... ماتدور الا شوي بس سنة او سنتين فقط وبعد كذا تجيم ...

طيب سؤال للخبراء : التجييم يكون بسبب عدم وجود زيت في المكينة ف يمسك الحديد في بعضه وتجيم المكينة .. ؟؟
كيف هذه مجيمه وهي فيها زيت .. ؟؟؟ تجننت انا

الان الخيار اللي قدمي لي المكيانيكي هو ( تغيير المكينة او توضيبها ) ايهما افضل ( اذا الله أراد علينا وطلعت مكينة ) ؟
وكم التكلفة لمن سبق ان وضب او غير مكينة يوكن 2007 بدون دبل .. ؟؟

وانا اشاور نفسي ابيع السيارة وخلاص وبحالتها .. ماتهنيت فيها ( والحمدلله ) ف ايش رائيكم ؟؟؟


انتظر مداخلتكم يا خبراء السيارات واللي مرت عليه التجربة هذه من قبل .. ؟؟

السيارة تضررت بالامطار والمكينة راحت مشورتكم

إعلانات ذات صلة

عندك سيارات ومركبات؟
الكل: 16

الله المستعان ، الله يعوض عليك ، إذا انك راعي ميزانية وتقدر على مصاريفها صلحها لأن الجديد غالي ، وإذا ماتقدر على مصاريف إصلاحها حاول تخليها تمشي بس وصرفها على اي مقاول ينقل فيها عماله ولايهمه الكماليات .

شكراً على الرد ..
المشكلة مو بالكماليات .. المشكلة بالاساسيات .. المكينة هنا الكلام ..

انا افكر قلت بدل ما اغير مكينة واتكلف وترجع ماتضبط ولا شي .. ابيعها بخسارة فرق التصليح والله يعوضني ... وبنفس الوقت أقول يابن الحلال ماجاك جا لغيرك صلحها والله يعوضك ومشي بها على الأقل سنة وبعدين بتخسر نفس اللي بتخسره الان لما تبيع .. والله اعلم

واذا على ميزانية التصليح تدبر من عند رب العباد ... وصحيح تقص الظهر ولكن الله كريم

سألت مبدأيا على المكينة هنا لقيت سعر التشاليح حول 8 إلى 9 الالف ( والله كثير ) ولكن لسه ما دورت هذولا كم واحد سألته وبس ...
واليوم الميكانيكي المفروض يكون سأل في التشاليح كمان ..
وسألت واحد بأمريكا عن المكينة وكالة من هناك طلعت حول 15 الف بدون شحن .. ولسه بأسئل هنا بالوكالة والبقية ..
والله يكتب الخيره يارب

بالنسبة للتأمين ضد الغير حق السيارة ما يغطي الاضرار الطبيعية .. ؟؟ مثل الامطار

أخوي المعذره أنا ماقريت موضوعك كامل نظرا لإنشغالي الآن

لكن أحببت أنوه عليك أن بعض التأمين يشمل الإتلافات بسبب الكوارث الطبيعية

مادري إبحث في موضوع تأمينك إذا يشمل أو لا

طبعا هذي نقطة عالطاير وعليك التدقيق والتأكد منها

موفق خير

تسلم وبيض الله وجهك ... سألت قالوا ما يشمل للأسف ولكن ان تحصلت على تقرير مرور وقت عطل السيارة والدولة عوضت اتحصل على تعويض غير كذا لا

وانا ما اخذت تقرير من المرور ... اخذت سطحه استغل الوضع :) واخذ 200 ريال عشان يشيل السيارة من الشارع للورشة خلف الشارع ( والله يعوضنا )

كان من المفترض عدم تحريك السيارة لأخذ تقرير من المرور وتعويضك من قبل الدولة لكن الله يعوضك بأحسن منها

اللهم امين ... والله يا اخي ماعرف انه كذا النظام .. انا تعطلت السيارة ومرمية في الشارع من العصر إلى الليل ورحت سحبتها بسحطة عشان لا يشيلها المرور ...

وقت الامطار للاسف الغي كل مشاويري ولا اطلع من البيت نهائيا الا في اليوم التالي


ولاكن اتعجب من الي يفرفرون وقت الامطار بين تجمعات الماء

ماهو فر الله يطول بعمرك .. الامطار نزلت والسائق بره البيت أساسا وتوهق في المطر

الحمدلله على كل حال وقدر الله ماشاء فعل

نصيحتي لك..
انك تتأكد من الميكانيكي قبل كل شي لان بعضهم ممكن يكلفك قطع وتوضيب والعطل سلك كهرب ب 50 ريال
يوجد ورشه لأحد ابناء الجميح خلف وكالة الجميح الي على خريص يوم كان معي كابرس 2001 اذكره اذا كان موجود للحين والا ابحث عنه بالنت لين تحصله ..
هو الي بيفيدك بأذن الله لان مشكلتك مهيب سهله وانا خوك ولا تنحل في منتدى او في مجلس..
اذا انت على خريص ووجهك شرق بيجيك الجميح جمس وكدلك
ادخل يمين قبل وكالة الجميح جمس وخلها بيسار ووجهك جنوب او تقاطع خله بعد ماتتعدا النقاطع بيجيك سور يسار طويل قبل لاينتهي فيه باب هذي ورشة الولد تعال له الصباح اذا موجود والا ابحث عنه بالنت..
والله يكون بعونك وان شاءالله يكون موضوعك هين ولا يكلفك

اول شي الله يعوض عليك

ثاني شي انا اشوف ان اذا الموتر عاجبك انك تاخذ لك مكينة من التشليح مع ضمان شهر. اعتقد ان بيع الموتر وهو خربان راح يكسر سعره وماراح يجيب سعر يسوى. فيه ناس توصي بالتوضيب بس لازم تكون ورشة معروفة بتوضيب النوع هذا من المكاين.

انت سألت ليش المكينة جيمت مع ان الزيت اوكي. الجواب ان الماء دخل عن طريق فلتر الهواء والثروتل الى حجر السلندرات (مكان الاحتراق حيث الحرارة بمئات الدرجات) وطبعا مع الحرارة العالية ودخول الماء اللي برد الحديد بشكل مفاجئ حصل التجييم.
طبعا زيت المكينة موجود حول الكرنك واذرعة البساتم ولكن لايدخل الى حجرة السلندر لوجود الشنابر في البساتم.

اخوي الموضوع ممكن يكون تبريد مفأجاء ولكن

لابد من ان الميكانيكي يفك البواجي كلها ويقوم باخراج الماء من غرفة الاحتراق

دام ان الثلاجة مليانه مويه معناته غرف الاحتراق مليانه مويه كذلك

والمحرك ما راح يدور لا عن طريق السلف ولا عن طريق عامود الكرنك والسبب ان الماء فوق المكبس
مستحيل يدور ولا تضغط على المحرك ممكن يزيد التلف

الحل الان هو

اخراج البواجي كلها ونفخ الهواء داخل الغرف لكي يخرج الماء

ثانيا اذا الكمبيوتر وصل له الماء ممكن يكون تضرر وهذي تقدر تختبرها

ثالثا الكهرباء اللي تصرفها السياره ممكن يقدر يطلعها مهندس كهرباء فاهم عن طريق جهاز الافوميتر موضوعها بسيط اذا جات في يد واحد فاهم

انت لو انك قريب مني كان خدمتك باللي اقدر عليه ولكن انا اعمل في الباحة

انا مهندس محركات ومركبات ومدرب في المعهد الثانوي الصناعي بالباحة

قسم محركات ومركبات

اتمنى اني افدتك باللي اقدر عليه

بيض وجيهكم وحرمها على النار ...

9. بقلم: يايا

تسلم والله .. الميكانيكي اللي اتعامل معاه ولد سعودي طيب وفنان شرواك ..
والولد مجتهد بالامانة .. وانا أحاول اساعده باللي اقدر عليه من ناحية المعلومات لإنه ممكن تخفى عنه شي او نسي شي ف الخبرة نبادلها مع بعض ...
لذلك انا حريص اعرف الأسباب والطرق المناسبة ..

10. بقلم: hmd100100
اللهم امين .. جعلها خيرة يارب ..

اما بيع السيارة او إصلاحها .. والله هذا الشي اللي محيرني .. كسر سعرها .. طبعاً الخوف انه تطلع شغلات اكثر من اللازم واتوهق في الإصلاحات كل شوي .. ولكن مادري بستخير الله واشوف ..

وماذكرته بخصوص السلندرات صحيح .. والميكانيكي قالي هالكلام وكذلك احد الاخوة الافاضل في الموقع جزاه الله خير ارسلي على الخاص تفاصيل ماكنت اعرفها الله يسعده يارب ويسعدكم

11. بقلم: العنكبوت

بيض الله وجهك .. عز الله كنك سويتها وزيادة ومانحرم من توجيهاتك طال عمرك ..
فعلاً هذا اللي بيصير بكرة ان شاءالله وبكون واقف عليها بنفسي انا اللي بنفخها ونشوف

طيب تتوقع هل بعد نفخ الماء يفك التجييم .. ولا التوضيب بظهري او اغير المكينة خلاص . ؟؟

اما الكهربه .. خلي السيارة تشتغل ووقتها ان شاءالله بنشوف موضوع الداوئر الكهربائية وندور كهربائي ممتاز عشان الموضوع هذا
بس نخلص من مشكلة المكينة ان شاءالله

انصحك تمر على ورشه فيها ميكانيكي قديم وفاهم وأمين .. اتعامل معه من حوالي 16 سنه خذ رأيه لعله يفيدك
عنوانه في صناعية العروبه المدخل الثاني ( الأخير ) على طريق العروبه وانت متجه للشرق .. اول ماتدخل يمين هو ثاني ورشه يسار .. مدير الورشه سوداني رجل أمين واسم الميكانيكي جوزيف ويتكلم عربي .

السيارة خذت عمرها الافتراضي
غير المكنيكي وشوف وش بيقولك

13. بقلم: الصداوي
جزاك الله خير .. تم اكتشاف العطل الأساسي .. الله يعيننا ونتحمل هالسواويق .. شكله ضارب في رصيف ولا حفرة ولا شي لان السيارة مضروبة من تحت وكسر الكارتير والمكينة

14. بقلم: مزووون

الحمدلله على كل حال شاريها قبل 10 أيام .. :(
الميكانيكي ما بيده شي ... الله يعين يارب



----

تم الكشف على السيارة بشكل دقيق وتم اكتشاف كسر في الكارتير والمكينة والسلندر منطلق وذراع البستم طالع ...

الان وجب تغيير المكينة ولازالت في مرحلة المشاورة حول إصلاح السيارة او بيعها والله المستعان

هذا اللي يهديه السواق المفروض كان طفى السيارة بمجرد دخوله في الماء

لكي يتلافى هذا الاشكاليات

أضف رداً جديداً..