جميع الحقوق محفوظة ©
يا جماعة انا ادور على دبلوكس متلاصق
المهم اكتشفت حركه يسوونها بعض اصحاب المكاتب العقارية من ضعاف النفوس الذي ينسى انه خلق للعباده وليس للركض وراء الدنياء ولو بالغش والخداع والتحايل
يمكن الي اخبر مني يعرفها لكن بذكرها للي ما يعرفها
وبعض شريطية العقار ماهم بعيدين عن بعض شريطية السيارات
من حيث الاساليب واللف والدوران والتظليل
وقليل منهم النصوح همه ياخذ السعي وبس. لا مخافه من الله ولا حياء من الناس.
الطريقه وبالذات بالدبلوكسات الي شفتها
يطفي انوار دبلوكس ويسكر ابوابه ويقول هذا (تم بيعه) وباقي الملاصق له
بمعنى عندك عماره فيها أثنين دبلوكس متلاصق او منفصل
يطفي واحد ويقفل الابواب ويفتح الثاني للزبائن
ويقولك الجزء الثاني تم بيعه كذبا وزورا بداعي ترغيب المشتري للشراء
ولما يجزم الزبون ويشتري بحكم ان بيع الجزء الثاني شجعه على الشراء
ويتم البيع يفتح الشريطي الجزء الثاني ويشغل الانوار ويعرضه للبيع
ولما تسأله مو كان مبيوع؟
يقولك الرجال صار عنده تعثر في البنك او طلع عليه مديونيه ورفض البنك يموله ورجع سحب عربونه!!
وهو لا انباع ولا شي
ولما اخينا هذا يشتري يستخدمه طعم للجزء الثاني الي كان يقول انه مبيوع.
ولاحظوا يقفلون انوار وابواب الدبلوكس المرغوب مثلا على زاويه او يفتح جنوب او شرق
اولا: حتى يظن المشتري ان الناس سبقوه على الجزء الافضل
ثانيا: الشرطي إذا جاه زبون يسوق الجزء الي ممكن عليه اقبال اقل لان الي عليه اقبال اكثر هذا مضمون بيعه لما يكون المشتري الاول طعم للمشتري الثاني.
فليس من المعقول يسبقني مشتري ويشتري الدبلوكس الي بالوسط ويترك الي على زاويه بالرغم ان سعرهم واحده ومساحتهم وحده والبناء متصل وحتى الصك واحد!
شي طبيعي اول شي ينباع الافضل ويبقى الاقل منه.
فهم يسكرون انوار وابواب الجزء الافضل ايهاما للمشتري انه مبيوع فعلا
لكن لما يشتري يصير هو طعم للجزء الثاني.
على شان تشوفون صدق كلامي
خذوا لفه وشوفوا اغلب الدبلوكسات واحد يكون مطفئ الانوار ومقفل الابواب والثاني مفتوح.
لما يجي الزبون يقوله الجزء الثاني خلاص انباع!!
والمسكين ينبسط ان فيه احد يشجعه على الشراء بالذات إذا كان ما يفهم بالعقار يدور اي شي يقنعه بالشراء او صرف النظر.
ايضا تنطبق الحيله على الفلل المتجاوره وتصميمها واحده ومساحتها وحده. في حال كان صاحبهم واحد.
يقفل فله ويقولك مبيوعه ويبيع عليك الثانيه وتصبح انت طعم ويفتحها بعد اتمام البيع ويقولك صاحبها رجعها عنده مشكله!
الي خلاني اكتشف هذا الشي واصدق فعلا انها حيله
اني طلعت اشوف دبلوكس قالوا الي جنبه تم بيعه
بالرغم ان عنده لوحه مكتب آخر.
من بكره اتصلت على المكتب الثاني قالي لا القسم الثاني هو الي اتوقع انباع!!
ياليت الاخوان يعطونا بعض الاساليب من بعض الشريطيه اللعابين الي ما يخافون الله.
اسأل الله لهم الهدايه.
20. بقلم: ابوهياف
طيب علمنا ونورنا وين الدنيا رايحه لا نكون نمشي عكس التيار!!
طيب حنا على طريقها نأشر لها ونركب معها ونرضى بالخطأ والسرقة والتلاعب وإلا نتركها تروح هههههه
على الشور وعلى رأي المالك من وين جبتوا هذه المسميات!!
هل أنتم الي تضعون القوانين أم الدولة!!
والمالك إذا ماله بالعقار اش يعرفه بسعر السوق! أنتم يا أصحاب المكاتب يامن تعيشون على فضلة التجار أنتم الي تحددون السعر حسب سعر السوق لأنكم يوميا تتعاملون بهذا الشي.
ومع علمكم بسعر السوق وان الاسعار مبالغ فيها بالاضافة إلى ذلك ترفعون السعر حتى يرتفع السعي!! من أحل لكم هذا!!
المالك إذا جاه زيادة فوق الي طلب مراح يقول لا. لكن انتم من احل لك رفع السعر!!
نبي نلفلف بالمكاتب ونشخبط ونكشف تلاعبكم.
ومصير كل آكل المال الحرام للافلاس. الي قفلوا صنادقهم ومكاتبهم مصير الي ما يخاف الله مصيرهم.
المشكلة يجيك واحد جالس في صندقة بطرف المدينة وسارق الكهرباء من أقرب عمود نور ومسوي فيها أبو العريف وصاحب العقارات الي ماحد مثله..
ماتلاحظ تناقض نفسك مالك عقار ولا يعرف بسوق !!!!
من ذا المالك التنح اللي عنده عقار ولا يعرف بسوق الا مالك ابو بيت وبيتين وارض وهو بديرة ثانية وذا مايحدد بسعر السوق بالعكس ينلعب عليه من المكاتب هذا شي
اما قانون الدولة وقانون المكاتب اولا ماعندي مكتب لكن شي متعارف عليه من سنين وبنين بالعقارات والمعارض والشرا والبيع حتى بسوق الابل !!! اذا ماتعرف عربون الشور هو يا اما تتم البيعه بالقيمة اللي طلبتها على شور المالك يا اما يرجع العربون كامل ونفس الشي للمشتري يحقله يقول يعربن على شور يا اما شريت او سحبت عربوني
والعربون ذا لعينات الطفيليين اللي يجي ويطير السلعة ولا ينقصها وهو مو صامل لا بشرا ولا بالبيع كنها سواليف عجيز وياكثرهم حاليا!
اما الصنادق فظاهر تفتر عليهم طاردينك هل المحلات ههه استغفر الله ابو زنيفر 2
اما الاسعار المبالغ فيها حاليا فهي صحيح ولا احد ينكرها الا مغفل بس بدال ماتطلب من ملاك العقار الحرامية يعدلونها اطلب من دولتك تفرض انظمة وتعدل عشان المسكين يلقى سكن
مع علمي ان قيمة الريال نقصتك قبل 1995 اللي عنده مليون كنه الوليد بن طلال عند الشعب السيولة ماكانت بنفس الوضع الحالي واغلي شي عرفوه بسيارات ماكان يتعدا 300 الف المرسيدس والواحد مقاضي بيته في شهر ماتعدا 2000ريال والمستاجر بسنه مايتعدا ايجاره 10 الاف ومع كذا كان مبلغ قوي على رواتب الموظف حاليا الاسعار بكل شي غاليه
بالاخير ملاحظ انك حاطني صاحب مكتب عقار نوعيتك بنقاش ان لم تكن معي فأنت ضدي الله يصلحك
والحمدلله ماني براعي مكتب بس صاحب عقار واي شي يحكمه عرض وطلب دامك تشوف ان العقار حاليا ماعليه طلب انتظره يطيح من نفسه اما اللي فاهم وبيتلاحق عمره بيعرف وش خراجه وعينات ذا المواضيع والله ثم والله الهدف منها تدليس عقول المشتري نفس عينة تصريح ابن عياف ووزير الاسكان والخبراء العقاريين واخرتها ماياكلها الا المسكين اللي يتردد لين ينجبر على الايجار عسى الله يبلا من ضر المسلمين عن قصد بهله وماله لان اغلب اللي يروجون ذا المواضيع هم اهل العقار ومكاتب الصنادق
( اذكر موضوع من ثلاث سنين وبمستعمل ومدري عن نية كاتبه بس كان لي رد وتوصية على منطقة كان فيها المتر بميتين ريال وجاني واحد من الاعضاء مدرعم يسب برسايل اني اطبل وراعي مكتب راحت الايام ووصل سعر المتر 600 وقريب لـ 800 وصاحبنا للحين ينشر مواضيع هبوط العقار !!! من ظنك ظلل واخذ اثم الناس انا ولا ابو هبوط العقار)
طيب ممكن تقولي ليش مضايقتك هذه المواضيع!!
إذا لا تملك مكتب عقار ولا تبيع ولا تشتري ليه متضايق!!
دخلت على ردودك كلها ردود على مواضيع تحذر من الشراء في الوقت الحالي او تنشر أخبار تخص العقار وبالذات بالسلب!!
ليه زعلان!!
منعم الله عليه بعقار وساكن بيت ملك خلاص احمد ربك واشكرة مانت بوصي على هواير العقار ولا انت محامي لشريطية العقار..
أحب اقولك الخطأ خطأ ماعمرة صار صح حتى لو كل الناس فعلوه.
والنصب نصب لو كل الناس صارت نصابة مراح يصير حلال أبدا..
شريطيه السيارات و شريطيه العقار اخوان غير شرعيين و 90% منهم شبيحه والباقي اذناب لهم والكل يعرف هذا
