مساعدة في شقق فندقية في العليا بالرياض

أسعد الله جميع اوقاتكم بالخير
مسافر بمشيئة الله للرياض برفقة الأسرة وراح نبات فيها ليلة وحدة بس وسألت بعض الأخوان قالو أسكن في شرق الرياض لأنها أقرب للمجمعات التجارية وبالتحديد في منطقة أو حي العليا

الوجهات راح تكون المجمعات التجارية وياريت تساعدوني كذلك بافخم مجمع غير برج المملكة .. وكذلك راح تكون لنا زيارة لحديقة الحيوانات بالرياض

الأهم من هذا أتمنى ترشيح شقق فندقية لعائلة من أربعة أشخاص وراح نحتاج غرفتين واتمنى مستواها يكون جيد والسعر يكون معقول
أحد الاخوان قال قريب من وزارة الداخلية شارع حوالي أربعة كيلو كله شقق ولكن أهل الرياض أدرى فيها

في انتظاركم والله يرعاكم

كل الردود: 5
1.
19:05:38 2017.01.24 [مكة]
ارجوا المساعدة يا اخوان
2.
22:45:29 2017.01.24 [مكة]
، حياك الله اخي بالنسبه لحي العليا هو في منتصف الرياض وليس شرق .. وهو من الاحياء الراقيه ذات طابع الغلاء عقاريا .. وهو مناسب جدا للسكن لعائله تهدف الى التسوق وكل شي قريب عندك مولات الرياض كثر النمل ذاليومين وماراح تلحق ولا مول واحد في ليله واحده ولكن تلبية لطلبك راح اعطيك خيارات وستناسبك نظرا لكوني اقطن في الرياض وفي تلك الاحياء .. بالنسبة للسكن اعتقد فندق الخزامى راح يكون خيار اول الخيار الثاني فندق الاندلسيه تبع مجموعة الحكير قولدن توليب اشوف قيمته جدا ملائمه ومكانه وخدماته كويسه ... فيه كذا فندق وتقدر تستخدم موقع بوكينج دوت كوم هذا راح يخدمك الان وفي المستقبل في عمل اي حجوزات .. قبل شوي شيكت على موقع بوكينج booking.com ولقيت فندق اربع نجوم بسعر منافس اسمه ميلينا بوتيك وموقعه جيد ولكني لم اسكن فيه ولم اجربه ... الاندلسيه والخزامى امدحهم .. نروح للمولات : (اولا انصحك بتنزيل برامج خرايط محدثه تدعم التحويلات الجديده القائمه بسبب المترو) المولات المعروفه عندك مول صحاري وجمبه صحاري بلازا ، و وراهم حياة مول هذول اشهر مولات واعتقد راح يكفونك وزياده وميزتهم انك تقدر تلفهم كلهم على رجولك لو تحب ولو اني ما انصح انك تروح حياة مول احسه بايخ روح صحارى وصحارى بلازا وامورك تمام ومنه على الرياض جالري وتقدر تستخدم طريق العليا متجه شمال لان ذاك المقطع (من طريق الملك عبدالله وشمال) يصير شارع العليا رايح جاي ... قدام الرياض جالري فيه مول بعد بس نسيت وش اسمه واذا جا الليل وفيك حيل تقدر تميل على الدرعيه و تتمشى في وادي حنيفه اجمل مقطع هو اللي ورا السوق الشعبي انوار وشجر والاولاد راح يتمتعون واجد بس بمجرد المشي فيه وفيه سوق شعبي وسوق مدري فتح ولا لا ولكن فقره ممتعه لو تضيفها لجدولك وسلامتك ،
3.
22:50:11 2017.01.24 [مكة]
، على فكره ترى مطعم دارين للاكلات البحريه بيصير جمبك اذا خلصت من صحارى بلازا واي تعديل على جدولك لا تتردد ،
4.
00:35:33 2017.01.25 [مكة]
بيض الله وجهك والله يسعدك أخي .. عز الله انك كفيت ووفيت ماقصرت يالغالي وانا راح ابحث في البوكينج عن السكن اللي قلت عنه وبشوف .. وما تستغني كذلك عن آراء الاخوان من ناحية الشقق الفندقية الجيدة واللي أسعارها معقولة ..
5.
20:44:57 2017.01.25 [مكة]
، تذكرت لك فندق اسمه المثنى بعد الفيصليه عاليمين ونت متجه شمال مكتوب بالاحمر كلمة المثنى هذا عائلي وكلاسي وسعره مناسب جداً ما تلاقيه عالبوكينق ترى وذكرت اسم المول الثاني اللي قدام الرياض قلري اسمه مارينا مول ،
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!