باي اسلوب اكلم ابو شخص ما طاع يرد لي فلوسي وليس لدي اثبات

السلام عليكم اخواني اعضاء مستعمل ..

اتمنى انكم بصحة وعافية

انا اخوكم تركي (27 سنة).

السالفة اني عطيت صديق لي (25 سنة) مبلغ 3000 ريال ولا طاع يرد لي فلوسي واتصلت عليه مرة وحدة وقال لي باسلوب صدمني "وش تبي انت" ههههه بعدين ما عاد اتصلت عليه وعرفت ان الفلوس ما راح ترجع وخاصة انه تبين لي بعدين انه راعي مخدرات.

كلمت ولد عمتي لانه يصير صديقه، راح هذا الشخص قال لولد عمتي اني انا قايل له ما ابي الفلوس وانا ما قلت له وصار يسبني عنده ويقول لولد عمتي انا مرة ثانية اذا خذت فلوس من احد باخذ فلوس من رجاجيل (انلحس مخي).

اللي ابغى اسويه اني بروح اكلم ابوه، وابوه رجال طيب عكسه سبحان الله، بس ابي كلام اقوله لابوه يخلي ابوه يقتنع ويردلي فلوسي وخاصة ان ما عندي اثبات، يعني لو سألني قال عندك اثبات انك معطيه فلوس وش ارد علي.
واسلوبي بيكون بابتسامه يعني ما راح اتكلم بعصبيه انا بالي وسيع.

بانتظار الاخوان المخضرمين ^_^ يعلموني وش اقول. يا حبذا تكون له لحية بيضاء طويلة مثل اللي في الصورة (امزح ههه)

انا ذكرت الاعمار عشان تعرفون وش المناسب في الموقف هذا

كل الردود: 6
1.
02:13:32 2016.11.05 [مكة]
وعليكم السلام ورحمة الله وبركاته ,, الله يعينك يارب .. وان شاءالله مايروح حق وراه مطالب .. انت مالك ومال ان له في المخدرات او خلافة .. لأنه المفروض اذا تشك في سلوكه لا تعطيه ولا ريال واذا عطيته اعرف انه ماراح يرجعها .. لانه بالنسبة له المخدرات احسن له من صداقتك .. وهذه حقيقة لازم يعيها كل واحد له صاحب طايح بالمخدرات .. الحل : الأفضل انك تروح لوالده .. تسلم عليه وتتقهوى معه .. وتقوله ابيك بموضوع مهم .. تقوله انا صديق ولدك فلان من كذا سنة وخاويته على الطيب والان كبرنا والأيام بعدتنا عن بعض ولكن ولدك جاني وطلبني سلفة وعطيته .. وانا رجال على قد حالي وماخذها من قوتي ومعطيها له على انه يرجعها لي اذا الله فرجها له .. ولا خذيت عليه أوراق ولا شي .. لان المبلغ ما يستاهل وبنفس الوقت ماخذت ورقة على صديقي .. وبعدين لما جاء موعد السداد وتأخر .. سكت عنه وقلت امكن مامعه .. ولكن انا انحديت ومحتاج فلوس .. ف بدلا من ان اروح اتسلف .. قلت اكلمه واكيد بيقدر ظروفي ويرجع لي فلوسي .. ولكن تفاجأت برده لي .. ولكن قلت لعل اني كلمته في وقت ماهو مناسب ولا شي ... وبعدها أرسلت عليه فلان .. وقاله وكان رد ولدك كذا .... !!! انا ياعم محتاج فلوسي والله لظروفي الخاصة وماكان ودي اجيك واكلمك واحرجك واحرج نفسي معك .. لكن ظروفي .. وولدك معيي يرجعها .. ف قلت بدخلك بينا واللي تحكم به انا موافق عليه ... واذا رد فلوسي ف أنا ابريه امامك من كل كلمة سيئة قالها في حقي لما طلبت فلوسي واذا ما ردها ... ف انا خصيمه امام الله يوم القيامة .. والله بيرد حقي منه بالدنيا قبل الاخرة .. وبس .. خليه وتوكل على الله ... وان شاءالله بيحلها
2.
03:55:20 2016.11.05 [مكة]
رأي الأخ وسيط رأي حكيم ومتزن
3.
12:00:12 2016.11.05 [مكة]
رأي الأخ وسيط رأي صحيح لكن نصيحة ابعد عن كل واحد له علاقة في المخدرات وحتى ولد عمتك ابعد عنه لأنه من نفسك نوعية صاحبه والطيور على أشكالها تقع
4.
01:15:28 2016.11.06 [مكة]
اسمحه لوجه الله وانسى الموضوع
5.
01:52:12 2016.11.06 [مكة]
نصحك ابعد خل الفلوس لن صاحب المخدرات مشكله اخاف تضيق عليه ثم لوسمح الله قدم ع النتقم منك بلا قتل .. الله يستر ع المسلمين
6.
04:24:57 2016.11.06 [مكة]
لا تروح لأبوه أول شي ثبت حقك أرسل اثنين رجال مواقف من أخوياك يكلمونه بأسلوب الأخوة الي بينك وبينه وأنك ما قصرت معه وخلهم يستدرجونه في الكلام حتى يعترف بالفلوس مثل يقلونه يارجال أعطنا اللي تقدر عليه ذلحين والباقي بعدين واذا جبت الباقي بنطلب فلان الي هو أنت يبقيلك والرجال وقف معك وأنت يابو فلان وافي والرجال يذكرك بالخير ويقول أنك من أعز أخوياه ولولا ظروفه ما طلبك ومن هذا الكلام حتى لو يعطونه مهله بسيطه يسددك فيها أهم شي يعترف قدامهم أن لك مبلغ ثلاثة الاف وبعدها على المحكمة والله متى يجيه أتصال المحكمة يبلغونة موعد الجلسة أن يجيك ركض يسدد وهو مثل أبو أربع وشهودك معك وهو ما عنده الا الدجه حق مخدرات ولا غيرها أصلا الله يكفينا الي ماشي في هذا الطريق ما يبغى يسمع بطاري الحكومة وسلامتك وارجو من الاخوه الي سبقوني أن يعذروني وكلامهم على العين والراس .
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!