استشارة يا اخوان الأمور مخربطة شوي ونبي رايكم

نبي رايكم الله يرزق كل من يشاركنا برايه الصادق ما يتمنى.
ابغى اشتري شقة بسعر 700 الف ريال عن طريق البنك لكن عندي مديونيات كالتالي:
قرض شخصي = 5300 ريال باقي 3سنوات ونصف
سيارة = 1400 ريال باقي سنة ونصف
صندوق التنمية = 1700 ريال
الدخل كالتالي:
راتب = 16 الف
دخل من ايجار بيت 45 الف

رايكم ينفع كذا آخذ الشقة علما ان القسط الشهري للشقة بيكون 6000 ريال لمدة 12 سنة.

طبعا مضطر لهذا الأمر لأني انتقلت من المدينة اللي فيها البيت الملك الى مدينة أخرى والبيت الملك عليه صندوق عقار ولو ابغى ابيعه ما يجيب إلا حدود 300 الف ريال.
يعني ما فيه طريقة كذا والا كذا نقدر نضبط بها الأمور وشكرا لكم.

كل الردود: 28

عرض:
1.
12:16:01 2016.08.20 [مكة]
المتبقي لك خلال سنة ونصف كمدخول 5750 ( هذا دخل الايجار / 12 + المتبقي من راتبك بعد خصم باقي الالتزامات ) وحتى الانتهاء من قسط السيارة بعد السنة ونصف يصبح مدخولك 7150 بعدها بسنة مدخولك 12450 وذلك بعد الانتهاء من القرض الشخصي ، تبقى على هذا المدخول حتى تنتهي من صندوق التنمية وتستمر بمدخول 14150 . هذا يعني لو العين التي قمت بتأجيرها لم تستلم قيمتها في إحدى السنوات ستؤثر عليك سلباً لأن دخلها بعد قسمته على 12 شهر = 3750 . إن شاء الله تضيط أمورك بس تضغط على نفسك شوي حتى سنتهي قرضك الشخصي والسيارة وربك يسهلها وهذا ما يمنع تسمع رأي الناس فقد يكون لهم رأي أسلم لك وأفضل .
2.
12:42:04 2016.08.20 [مكة]
بارك الله فيك أخي ياسر فعلا كلام منطقي جدا
3.
14:59:57 2016.08.20 [مكة]
انصح انك تاجر البيت زايد مدخول البيت المؤجر وتستأجر شقه افضل لك وتحاول تدور لك ارض افضل من الشقه وتبني عليها شوي شوي على حسب الاستطاعه وحتى لو شريت الشقه فمدخولك من الايجار بيغطي القسط لكن الافضل الارض بنظري من الشقه والله الموفق
4.
15:05:36 2016.08.20 [مكة]
ما حولنا نشتري ارض اقل شي الأرض مساحة 500م بمليون ريال!!! وممكن تحصل ب 700 الف ريال في مخططات بعيدة أكثرها ما وصله كهرب!!!
5.
20:14:43 2016.08.20 [مكة]
نصيحة لا تزيد الديون عليك و استأجر بيت في منطقتك الجديدة ووفي الديون يلي عليك
6.
05:10:21 2016.08.21 [مكة]
مالك الا الاجار لمدة كم سنه الى انتهاء بعض الاقساط واذا انتهت اقساط السياره حاول تقسط لك ارض واضغط على نفسك وخلك بالاجار صدقني اغلب البيوت الجاهزه فيها مشاكل فمابالك الشقق الجاهز التشطيب ديلوكس ومن جوا الله اعلم بالحال
7.
21:48:35 2016.08.21 [مكة]
من الإجار استأجر وكذا تكون ريحت نفسك وراتبك
8.
22:23:18 2016.09.02 [مكة]
وفقك الله ووفق الله الجميع لا تشتري الآن ... استأجر الآن حتى السنة القادمة لتتضح الأمور بشكل عام ... لا تشتري الآن ، انتظر ... وفقك الله والجميع
9.
23:32:22 2016.09.02 [مكة]
اضف 300الف لل700الف واشتر بيت كامل بدال الشقه لانك ماتضمن اللي معك بالعماره
10.
23:43:28 2016.09.02 [مكة]
تبي الشور الصحيح انت مخربط خاااااالص لا انصح اطلاقا وهنا افضل من فكرتك الف مره فانتظر شوي وسانورك القصد 6000 اولاف بلاش الاف اولاف ياعمده ركز ومخمخ وخل السته قسط و6 للمصروف و6 للصلاح و6 لمن تحب خذ شوري 17 الف تدخل شهري لا ترهن رقبتك في عش حمام
11.
13:48:20 2016.09.03 [مكة]
ابوفيصل2 ممكن توضح والله خربطتني زيادة!!
12.
05:05:15 2016.09.05 [مكة]
شقة بذا المبلغ انتبه غالي جدا العقار مدحدر وانت مالك عقار ولله الحمد خذها ببساطة وضيق على نفسك شوي فترة بسيطة لين تتضح الأمور وتخف الديون عليك وتاخذ لك عقار على قد ميزانيتك بعد انخفاضه.
13.
06:25:03 2016.09.05 [مكة]
انا رأي اذا انت في أطراف المدن تشتري لك دور جديد جاهز تحصلها بحدود 500 الف او 600 افضلك من شقه صراحه وأوسع واذا رجعت لمنطقتك. تأجره او تبيعه.
14.
17:05:11 2016.09.05 [مكة]
الى الآن ما فهمني احد أنا اسابق الزمن إذا ما أخذت خلال سنتين تكون فترة التقاعد قربت وما راح تعطيني البنوك أي مديونيات إلا بقسط عالي جدا وفترة زمنية بسيطة وبكذا ما راح اقدر!!! من وين ما نطقها عوجا الله يعين.
15.
17:07:25 2016.09.05 [مكة]
والأدوار في اطراف المدن حصلت لكن أحياء تعبانة ودك تبقى مستاجر طول عمرك ولا تسكنها ابدا وانا بصراحة يهمني الحي لأن في الحي راح يدرسون عيالي وبناتي وراح يتأثرون بطبيعة السكان وأنا ادور الحي المعقول وليس التعبان ولا الراقي يعني المتوسط واهم شي طبيعة السكان!
16.
21:19:58 2016.09.05 [مكة]
الله يهديك تسابق الزمن على القروض اجمع اللي تقدر عليه خلال خدمتك واذا تقاعدت اشتر اللي تبي والإيجار خذ في حي مناسب لك ولا تتوسع عشان يكون الايجار معقول.
17.
00:50:36 2016.09.06 [مكة]
كم بقي عليك تتقاعد ووين قطاع عملك ننورك وكم راتبك بعد التقاعد وباي مدينة انت اذا بالرياض ابشر بعزك نبني لك عظم وبلك بطريقه ميسره لن تندم تاكد
18.
14:45:20 2016.09.08 [مكة]
ابوفيصل ممكن توضح لي كيف تبني لي عظم بطريقة ميسرة! المشكلة في الأرض كيف نوفر ارض نبني عليها والا العظم ما أظن بناءه مشكلة كبيرة وحسب علمي ما يكلف كثير! الوظيفة مدنية مثل مثل اي وظيفة مدنية التظام واحد! التقاعد باقي 10 سنوات لكن البيت وش ابي فيه بعد التقاعد!!
19.
02:46:49 2016.09.09 [مكة]
الله يسعدك انت بالرياض اولا ثم 10 سنوات حليوه العظم يبي له خبره وصبر اذا بالرياض ابشر من المخطط لنهاية العظم وممكن اللياسه كمان انا اشرف لك عليها بعمالي انا لا تقلقل جماعتي الان كل ابوهم مالكين وساكنين وبعضهم بديت له ب1000 ريال اهم شيء عندي العزيمه والامور الباقيه تتسهل باذن الله كيف وش تبي بعماره دخلها 200 الف بعد التقاعد انت تحكي صحيح الارض خذها اقساط من الراجحي نسبة ثابته انصحك ابعد عن النسبه المتحركه مثل البقره ترضع نفسها ما تقدر تتخلص من دينها مستمر النسبة الثابته هي الافضل
20.
13:34:33 2016.09.10 [مكة]
طيب أخذت الأرض عن طريق الراجحي بمبلغ فلكي مع الفوائد الله اعلم حسب تقديراتي لن تقل الأرض عن مليون كاش مع الفوائد بتكون قيمة الارض في حدود مليون وست أو مليون وسبعمية يعني قسط شهري 14 الف ريال لمدة 10 سنوات طبعا البنك ما يعطيني هذا المبلغ!! طبعا اتكلم عن الأحياء المتوسطة او أقل من متوسطة اللي قيمة المتر 2000 ريال أما الأحياء فوق المتوسطة فسعر المتر يتعدى 4000 ريال . وعليك الحساب! طبعا ما أظن فيه حل سحري.
21.
17:19:55 2016.09.13 [مكة]
كل عام وأنتم بخير...
22.
15:25:31 2016.09.14 [مكة]
5300+1400+1700= 8400 ريال وهذا دخل من ايجار البيت 45000 ريال بمعدل 3800 ريال بالشهر وقسط الشقة 6000 بالشهر يعني 14400 - 3800 = 10600 ريال بالطير من الراتب و يبقى لك 5400 ريال شوف اذا انت تقدر تعيش بالراتب هذا توكل على الله و اشتري الشقة و ان كان هذا بيسبب لك ضغوطات اجلس على و ضع افضل وبالتوفيق
23.
05:43:20 2016.09.15 [مكة]
بارك الله فيك ابو عبدالعزيز9 إلا وش رايكم ابيع البيت مثلا وادفع تقريبا نصف قيمة الشقة ويبقى من قيمة الشقة حوالي 400 الف او 450 الف اقسطها؟! أو ابيع البيت واطقطق بقيمته شوي اسهم وشوي سيارات والا افتح محل لكن هنا مشكلة ان امكانية النجاح في المجال التجاري بالنسبة لي ضعيفة مدري ليش لكن مالي في التجارة. الا مثلا احصل شريك فاهم في شغلة ومخاطرها قليلة ويكون شغلنا النص بالنص يعني احط مبلغ ويحط مثله ونشتغل. الراااااااي لا تخلونا من آرائكم بارك الله فيكم ورزقكم الرزق الحلال!
24.
06:20:59 2016.09.15 [مكة]
يا اخوان للعلم فقط العقار فيه نزول رهيب بحكم اني لفيت على مكاتب عقار كثيرة الفترة القريبة هذي والله اول مرة اشوف اصحاب عقار كلمته مرة اسأله عن السعر وفيه اكثر من واحد مرسلي تهنئة بالعيد مثل اللي يقول تذكرني! والله اول ما يكلمك صاحب العقار الا وهو يقولك اذا ما شريت غيرك الف واحد يشتري!! وفيه ناس اتصلوا علي من اصحاب العقارات اللي مريتها يدور الواحد منهم المشتري الجاد ومستعد ينزل له عن السعر الاول كثير. شي غريب... فعلا فيه نزول حقيقي كما قرأت في جريدة اظنها الرياض يقولون النزول من 35% الى 40% في بعض المدن ! لكن فعلا نشوف نزول حاد او انهيار كما حصل في عهد الملك خالد الله يرحمه عندما ارتفع العقار بشكل جنوني ثم هبط بشكل جنوني ويقولون ذاك الوقت وصل المتر 1000 ريال ثم تراجع الى 150 ريال يعني انهيار مهول فالفله اللي وصلت مليون رجعت الى 150 الف ريال
25.
17:25:53 2016.09.15 [مكة]
اووف الفله ام مليون صارت ب 150 الف والله رحت وشفت المكاتب والنزول ممكن يوصل 15 % فقط
26.
06:07:18 2016.09.23 [مكة]
ركز الله يرحم والديك hsagran اقرأ الرد زين!
27.
17:29:24 2016.10.08 [مكة]
سلام عليكم ،، اخوي احمد ،، راتب محول على أي بنك ،،
28.
13:23:44 2016.10.09 [مكة]
نصيحة لك لوجهه الله عز وجل ... ابتعد عن القروض العقارية من البنوك .. ابتعد .. ابتعد .. نصيحة من شخص متورط وشايف الضيم من البنك .. وللمعلومية لم اكن المتضرر الوحيد .. بل هناك الكثير من المتضررين غيري .. الحمدلله التضرر في رفع الفائدة والاقساط دون سابق انذار وبطريقة ملتوية ..
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!