قصه في مخيم

حكاية الليله قصه واقعيه#
والله ونحجزمخيم يومين
ومضيقتن صدري اميمتي
نقنعها بالطلعه معنا يمكن لنا اسبوعين
وتقول اذا استانستوا وانبسطتوا يكفي كني معكم،،
وماصدقنا انه وافقت وحنا حمولة سنعه من ناحية الكثره
متفرعين واحفادامي فيهم المتزوج
قلت والله لاسوي شيء يفرح امي
من فقرات المخيم
تعرفون
حركات الخبز واللي يعجن ويسوي بيتزاء والي يشوي ذره والي يشوي همبرقر
قلت والله لاسوي حركة تفرح اميمتي واخلي له شأن
(مشكلة اجتماعاتنا دايما الكبير مهمش لان نادر السواليف تخصه اويتاح له يشارك الا من رحم ربي ويكون فطن يوجه اسئله للكبير سواء أب اوأم لاثبات وجود وتفعيله بالمجلس)
والله وتجيكم النفلى💪وأعجن لي بمطبقتن يالله يشيله الرجل
عجينه من الفجر
وشاريتن لي مقرصه على فرن خبز يمكن له اربع سنين جديده ماعمري استخدمته
والله قلت للسواق ركبه هي ودبة الغاز الصغير بالسياره

يوم اجتمعنا وخلصوا الفطور وجاء وقت الظهر
وقت الخثره والكسل
واشبه تسخن

وامثل عجينتي بصحون التباسي
صحنين مليانات
قلت يالله يمه
انتي الاوله
مسابقه لافضل وحده تقرص
ماينشق قرصه
يااااكافي اميمتي تشققت قالت لا مابي حيل وايدياتي منتهيتن صلاحياتهن
مير علي جائزة اللي تفوز
وتستدني من المقرصه
وتبداء هذي توجه وهذي تعلمه
ويجون الرجال
عياله قالوا حنا لنا دور
وتصير ضحكه وضجه وكلن يتناهب القرص لانجض
والله لو اقولكم وش طعم هالفقره انه حركت جو المخيم
الصغير والكبير واميمتي وخويلتي عجيز مثل امي
صار لهن جو وانتعشن وتحمسن
عاد فازت حريمة اخوي مرة كبيره من الحريم الاولات السنعات
مهب مثلي تقل لسان واللي تقل شلقة جحه
يوم طلعنا من بكرى
قلت يالله
جايبتن لهن سعف
قلت اللي تسف مرتب
ادري اننا كلنا مانعرف الا امي وخالتي
تقل رسمه من الترتيب
وتوصي اميمتي وليده
قالت
رح اشر هديه لام فلان احسن شوكلاته

طبعا ننرغب اميمتي لاننا حاجزينن بالاجازه مخيم اسبوع
نبيه ترغب
والحمدلله
ابشركم
قالت الطلعة الثانيه
نبي قرص جمر وفريك
قلنا ابشري بس انتي طيعي اطلعي
فاقولكم رغبوا والديكم بمشاركتهم اجتماعاتكم بشيء يناسبهم ويخلي لهم شان