جاري يراقبني على النزلة والطلعة ومسويلي قلق

السلام عليكم

انا ساكن في بيت وجاري صاحب البيت


له فترة مطفشني ومحترمه انه اكبر مني


كل ما انزل من البيت احصله تحت عند الباب ويسألني .. عندك دوام الحين ؟

ولما يشوفني انزل بالليل يسألني .. دوامك كمان في الليل ؟


وكل شوي يسألني .. وين شغال ؟

ومرة وقفت عند البيت بالسيارة .. يسألني كم سعر السيارة ؟ اقساط ولا كاش وكيف عزمها معاك ؟

وكل ما انزل اشوفه يطالع فيني


اليوم خربها مرررة .. نازل ومعايا كيس قمامة ... ههههههه يقلي دايما تنزل ومعاك اكياس .. فتحت الكيس قلت له قمامة شف

المهم انا مطوووووول بالي وموسع صدري للحين


تتوقعون ايش يبا مني ؟


بدا يسويلي قلق وما ابغا اخربها معاه


ابي المشورة العاقلة ايش اسوي معاه ذا القلق

كل الردود: 32

عرض:
1.
عضو قديم رقم 334864
02:08:19 2013.11.13 [مكة]
حط له غراء فئران واذا مانفع بخ المكان بمواد قويه قله عشان الثعابين والحشرات تبعد عن العماره واذا مانفع قدامك حلين اما تطلبه فلوس وهو بيهرب ولا سلفه فلوس وبكذا بيحاول يتهرب عشان مايسددواذامانفع انقل شقه ثانيه. ههههههههه
2.
02:15:46 2013.11.13 [مكة]
هههههههههه
3.
02:19:09 2013.11.13 [مكة]
اطلبه انك ممكن ماتقدر تدفع هذا الشهر ولا 6 الشهور .
4.
02:36:54 2013.11.13 [مكة]
اخوي اتوقع والعلم عند الله ان جارك متقاعد فلا تلوم الرجال فاضي ويبي يسولف .. خاصة كبار السن .. تلاقيهم يدورون اي شغله اهم شي يسولف مع احد
5.
05:10:51 2013.11.13 [مكة]
الفاضي يعمل قاضي
6.
عضو قديم رقم 188144
05:55:58 2013.11.13 [مكة]
ممكن يحس بوحدة ... شوف وين كان شغال .
7.
عضو قديم رقم 344770
06:10:32 2013.11.13 [مكة]
طيب يبي يسولف معك انت وش مشكلتك ما تحب السواليف ؟
8.
عضو قديم رقم 346131
08:00:51 2013.11.13 [مكة]
سولف معه واشبع فضوله والا اطلب منه سلف وكل ما شفته قل له هاه وش صار عندك تعطيني صدقني بينحاش
9.
08:31:05 2013.11.13 [مكة]
شور عليه يتزوج الثانية وأنت تفتك منه
10.
08:57:41 2013.11.13 [مكة]
احسن اليه وعامله معامله حسنه والايام كفيله في تغير تصرفاته ولاتحاول تتكلم كثير وحسسه انك مشغول واهم شي تحصن منه لان بعضهم الحسد معمي قلبه
11.
11:55:54 2013.11.13 [مكة]
كل ماشفتة أنشب لة قل نزلي من الاجار انت اجارك غالي ياخي دوري سلف طفشة وشرط ينحاش وقل شغال في المباحث والاستخبارات
12.
12:15:17 2013.11.13 [مكة]
اهلا كان عندنا جار ( الله يرحمه ) من نفس النوع كل ما شافنا يحقق معانا وين رايحين و من وين جايين ادكر مره واحنا جايين من المزرعه واول ما وصلنا البيت راح لصندوق السيارة وفتح الغطا حتى يشوف ويش الخضره الا عندنا ولكنه طيب واحنا ماخدينه على قد نيته
13.
عضو قديم رقم 316684
12:22:19 2013.11.13 [مكة]
النصيحةانك ماتسكن بيت يسكن فيه صاحبه لكن يوم انك ابتليت اصبراحمدربك فيه ناس سكنواعند عجيزوكلماطلع الزوج رقت العجيزتتفقد وش غيروا وش خربواواللي يقطع عنهم الموية كلماتاخرواعن التسديد
14.
عضو قديم رقم 348480
12:23:31 2013.11.13 [مكة]
الرسول صلى الله عليه وسلم وصى على سابع جار
15.
12:34:25 2013.11.13 [مكة]
انا بقول لك ايش تسوي مثل مايسوي فيك سو فيه اعزمه او كل ماشفته اقلب الوضع تحقيق معاه وين كنت وايش كنت تشتغل وليه تركت الشغل او تقاعدت واقلب الوضع طقطقه لحد مايطفش منك
16.
13:23:47 2013.11.13 [مكة]
مشكورين على ردودكم الجميلة هو فعلا متقاعد وفاضي ... بس شكلي بزعجه بانزال الايجار خليه ينحاش مني كل مايشوف خيالي
17.
عضو قديم رقم 339253
13:29:32 2013.11.13 [مكة]
اتوقع انه قارش عليك ,, او الرجال زهقان ويبي يطقطق
18.
17:32:51 2013.11.13 [مكة]
سلم عليه ولا تكثر معه الكلام وبين له انك مشغول
19.
عضو قديم رقم 313348
17:36:56 2013.11.13 [مكة]
انا اقلك قله والله عندنا فلان جيب اسم من راسك مريض وفلان بعمرك فيه مرض ال .... وفلان كان جاري ومات وفلان الي مخاويني بيحتظر وفلان وفلان وفلان كلهم مرضان وبنفس عمرك بينحاش مافيها كلام
20.
18:31:55 2013.11.13 [مكة]
للأسف هذا واقعنا المرير .. انا توقعت انه متقاعد .. لإنه حنا كذا .. ما يوصل الشخص لسن التقاعد الإ وقد تبهذل .. وتبدأ حياته الجديدة المملة .. واللي الناس ماتحبه فيها ولا يجلسون معه ويملون منه .. في امريكا او بقية دول العالم الرجال اذا تقاعد .. تبدأ حياته الممتعه الشيقة .. ويكون في فترات عمله جالس يخطط لمرحلة التقاعد ... ايش يسوي فيها منهم من يشتري بوت ويبدأ في جدولة رحلة في البحر حول عدة مدن تستغرق سنة او اثنين ومنهم من يتعلم هواية .. ومنهم من يحجز تذاكر طيران ويسافر حول العالم ... ومنهم من يقضيها رحلات مقناص وغابات وإستكشافات ... عندنا للأسف مرده وحده من ثلاث يا كداد .. يا في محل عقار .. يا جار ملقوف ... !!
21.
عضو قديم رقم 348518
19:24:41 2013.11.13 [مكة]
انا مثلك ياااااخوي وتوصلت الى اخر حل اني اسكن في عماره بينها وبين صاحبها مثل مابين المشرق والمغرب والله ياحتى البيض وانا مدخله يسألني منه اااااااف طفش ياااالربع والله تقولون ردار
22.
عضو قديم رقم 348518
19:26:42 2013.11.13 [مكة]
وربي ماااحقه الا شوزن
23.
19:30:18 2013.11.13 [مكة]
كل يوم قله بعزمك رز بالحمص ... صدقني راح يكرهك هههههه.
24.
عضو قديم رقم 346795
20:16:44 2013.11.13 [مكة]
يارجال هذا حله ابسط منه مافيه افتح مجلسك له واعزمه بالقوة واعزم نفسك في مجلسه الرجال يدور السواليف والا خايف منك خصوصا اذا انت مستاجر جديد ويدور الامان لنفسه والا معه في العمارة وكل ماتشوفه طول بالك عليه اعتبره ابوك او اخوك الكبير اترك عنك الكلام الي ماله داعي نزل في الاجار ومدري وش الرجال مسكنك في حلاله ماتفرق معه دفعت الي يبغاه والا اقضب الباب خل كل شي بالمعروف معرفت الرجال تجارة والرسول صلى الله عليه وسلم وصى لسابع جار وصدقني مع السواليف والعشره بتغير امور كثيره وانت لاتبالغ بالامور كثير وخذها بنيه حسنه وان شاء الله بتتيسر
25.
20:36:00 2013.11.13 [مكة]
بادره بالابتسامة و غادره بها سيتغير العجب ان شاء الله واذكر ربك في نفسك تضرعا و خيفة تحياتي
26.
عضو قديم رقم 317344
21:26:18 2013.11.13 [مكة]
انا اقولك وش السبب واحد من الامرين 1.كان في الماضي في مستأجر سوى له مشكلة كبيرة وتعقد الرجال 2.اكيد ماعنده اولاد او احد يسولف معه
27.
21:37:16 2013.11.13 [مكة]
المتقاعد عندهم له نفس يخطط المتقاعد عندنا يخطط كيف يسدد أجار بيته ويعيش عياله لأن راتبه بينخفس بالارض
28.
22:36:36 2013.11.13 [مكة]
عشانك مستاجر منه متمنن عليك وماتقدر ترفع صوتك عليه وتغلط ولا بيطردك احسن شئ تغير البيت وتساجر بيت ثاني وترتاح من هالعلة
29.
عضو قديم رقم 346131
00:59:40 2013.11.14 [مكة]
سو نغسك انك فقدت النطق وصرت اطرم وسمعك ثفيل وهبل به
30.
11:47:08 2013.11.15 [مكة]
الجار له حق على جاره . حاول ان تدعيه بالليل تسهر انت وياه ربما يدعيك هو وخلوا حريمكم يتواصلون مع بعض تصيرون عيله وحده هذا ما تعودنا عليه وحنا صغار كان الجيران الرجال والحريم عايله وحده
31.
14:41:12 2013.11.15 [مكة]
أبد إذا جاوبك رد عليه وإذا منت مروق قلها أنا مشغلو وأسحب عليه وإذا أنت متضايق مره زبد له وقل ماني فاضي لك وإذا في راسك مشكلة قله أن كررت لقافتك بفقع وجهك المهم عبر عن شعورك ولا تحبس موجات التساؤل والغضب غرد في السماء كقنبرتاً تهوى المطير والعرب نياموا هههههه
32.
21:15:16 2013.12.10 [مكة]
شكله شايب يبي احد يسولف وياه من الطفش اكسب اجره الكل انشغل عنه والله العالم
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!