قلت لخويي وراك ما تتزوج !!!

السلام عليكم يا احلى اعضاء مستعمل

اليوم جاتني قصيده بالواتس اب ذكرتني بيوم قلت لواحد من الشباب لا تصرف فلوسك بالسفر والخرابيط وسيارة تقسيط وجوال حديث

رد علي وقال الراتب حول 3000 ومنها مواصلات ومعيشة 1500 و1000 اعطيها الوالد و500 وين اجمعها وانت تدري ان المهر من 40000 الى 60000 والشقة وتاثيثها يبي لك اقل شئ 50000 وايجار اقل شئ 30000 غير القصر وعشا الرجاجيل وترى الرفده بوقتنا ذا ما تجمل ليلة الزواج ويبغى لك سيارة حديثة وغير طلبات ثانيه لام البنت وخالها والشكوى على الله

رديت عليه وقلت لا حول ولا قوة الا بالله اكثر من الاستغفار لعل الله يفرجها بالخير ان شاء الله

ويوم شفت القصيد ذكرني بالموقف ذا وحبيت انقله لكم

قال الشاعر

قصيدة اعجبتني

سبحان من يرزق بتوع الملايين
الرازق اللي ما يخيب الرجا به
لي عم عنده معرضٍ للصوالين
أموت واعرف بس من وين جابه
وإذا سألته قال بعت الدكاكين
ما يدري إني ما هضمت الإجابه
الشاهد إني رحت له قبل يومين
في قصره العامر ودقيت بابه
قال ارحب ارحب عدّ ورد البساتين
يا مرحبا باللي لفا يا هلابه
قلت البقا عدّ النفل والرياحين
يا شيخ شمل اهل الكرم والذرابه
قال اسلم الله يحفظك لي من العين
وآمر أوامر حضرتك مستجابه
قلت الصراحة طالبٍ قرب غالين
ودي تزوجني كريمتك يابه
ثنّى وقال اهلين والله وسهلين
والكون ترخص لجل عينك رقابه
لكن ترا عندي شروط وقوانين
قلت اشرط اشرط يا حبيب الغلابه
قال أولاً مهر العروسة ثمانين
غير الرسوم وغير حق العصابه
والثانية عمك يبي منك سبعين
رسم الأبوّة والنسب والقرابه
وام العروسة حقها منك ستين
عشانها ست الحسن والمهابه
واخوانها كلن يبي منك خمسين
عداً ونقداً تندرج في حسابه
وخواتها الخمس اعطهن من ثلاثين
عشان تتوثق عروق النسابه
وتجيب طقم عيار واحد وعشرين
وخاتم من الماس المصفى ترابه
واكياس متروسة كعوب وفساتين
ألوانها واشكالها ما تشابه
وموتر بسواقه وفيلا بدورين
أثاثها من بطرته ينحكابه
واحجز لنا قاعة بقصر السلاطين
واحجز بها رقاصتين وربابه
وامنع دخول اهل اللحى والبزارين
واعزم أمير المنطقة بالنيابه
هذي الشروط اللي على بالي الحين
وذكرني اللي ما حسبنا حسابه
قلت اذكر الله يا عدو المساكين
واستغفره لا يبتليك بعذابه
الظاهر إنك منت عارف أنا مين
أنا لو ارقا فوق متن السحابه
ما جبت حتى نص درزن مواعين
واضحك بكيفك واعتبرها دعابه
شروطكم هذي شروط المجانين
شروطكم شغل ابتزاز ونهابه
شروطكم تقصم ظهور البعارين
شروطكم همّن وغم وكآبه
شروطكم والله سيوف وسكاكين
تذبح بنات المجتمع مع شبابه
وين الرضا والعطف واليسر واللين
اللي ذكرها الله بمحكم كتابه
وين الصفات اللي أمرنا بها الدين
وين اختفى نهج النبي والصحابه
يا عم جعل اللي خلقنا من الطين
يرد عقلك من خطاه لصوابه
ويجعل نصيبي عند غيرك قل آمين
ويحسن عزا الصابر ويجزل ثوابه
قال انت لو فكرت تفكير صاحين
ما شفت في مجمل شروطي غرابه
حنا بعصر العولمة والمزايين
ماهوب عصر الفلسفة والخطابه
الناس تسعى للرتب والنياشين
وانت اهتمامك بالشعر والكتابه
والشعر ما ينفعك لو هو دواوين
ما دام جيبك مثل بيت الخرابه
يا بوك لا تسمع كلام المصاخين
واسأل مجرب عاش في وسط غابه
قلت الله اكبر يا محرر فلسطين
من يسمعك يحسبك ذيب الذيابه
تراك شايبا راس مالك ريالين
والبنت ما تسوى جناح الذبابه

وسلامتكم

اخوكم
ابوعبدالله

كل الردود: 9
1.
21:14:31 2013.09.19 [مكة]
وعد النبي صلى الله عليه وسلم من يريد الزواج لإعفاف نفسه بعون الله له، فقال: ثلاثة حق على الله عونهم: المجاهد في سبيل الله، والمكاتب الذي يريد الأداء، والناكح الذي يريد العفاف. اقسم بالله العظيم أني لما نويت أتزوج انفتحت لي أبواب الرزق من كل جانب ... وأنا كنت لااملك شيء حينها . نصيحتي لك ان تبين له ذلك وان ينوي الزواج ليعف نفسه .. وسيرى الرزق اماااامه .
2.
21:27:41 2013.09.19 [مكة]
يقلم الصداوي كلام سليم 100في 100 اهم شي صدق النيه وربي يسر الامور كلها
3.
22:05:32 2013.09.19 [مكة]
حديث الرسول صلى الله عليه وسلم ما بعده تفسير او كلام وعلى العين والراس اما الموضوع فهو رسالة بطريقة غير مباشرة لكل ولي امر لديه بنت ان يخفف على الشباب ان راى في الشاب خلق ودين وان يقللوا من طلباتهم ويساعدوا الشباب في بداية حياتهم شاكر لمروركم اخوي الصداوي واخوي ابو بدر وجزاكم الله خير
4.
22:29:59 2013.09.19 [مكة]
اختلف معك اخوي ... الرساله الموجهه ليست لكل الآباء ... البيوت مليانه بنات واكثرهم مايبون ذكر .. فقط يريدون رجل بمعني الكلمة على قدر من المسؤليه يصونها ويحترمها ويعزها ويكرمها . أما الرزق يأتي معها ؛. والنكاح اذا نوى عليه سيتحقق له وعد رسولنا صلى الله عليه وسلم . صاحبك يقول مقدر اتزوج .. بس يقدر يسافر .. ويقدر يجيب جوالات جديده . هنا المشكله لايوجد هدف ؛. لو وضع الهدف سيصل بتوفيق الله تعالي .
5.
22:51:50 2013.09.19 [مكة]
جزاك الله خير اخوي الصداوي لكن الطلبات التعجيزية هي اللي تحبط الشباب وان شاء الله كل شاب او فتاة او ولي امر يقرأ موضوعي هذا ان يفتح الله عليه وييسر له زواجه او زواجها وكل ولي امر بنت ان يذلل الصعاب امام كل طالب عفاف ذو خلق ودين والقصيد واضح فيه ذم كثرة الطلبات وتعسير الزواج وهو ولد اخوه كيف لو كان غريب الله المستعان
6.
11:01:05 2013.09.20 [مكة]
نعم مع سار في طريق العفه جاد فستيسر اموره بأذن الله والاجاويد كثير ولله الحمد
7.
عضو قديم رقم 311024
12:03:17 2013.09.20 [مكة]
صحيح الكلام هذا والا كل الشباب يبغون يتزوجون لكن المعوقات الماديه هي الواقفه بينهم وبين الزواج والراتب مايكفي الحاجه وين سمعت هالعباره من قبل مو ذاكر المهم ماعلينا الي اقصده لزم يكون من الحكومة والاسره دعم للشاب المتزوج علشان يقبل على هالخطوه الي اهي من اسباب صلح المجتمع وتحياتي
8.
15:25:00 2013.09.20 [مكة]
حي الله اخوي مسامح واخوي جيغسوا بس كيف القصيده جميلة ومعبره
9.
03:11:05 2013.12.27 [مكة]
قصيدة حلوه بس الصراحه الزواج الايام ذي مقلب انا زواجي قريب وللحين لاوظيفه ولاغيره اسال الله العلي القدير ان يرزقني ويرزق شباب المسلمين ومصاريف كثيره جدا جدا ومايعلم فيها الاالله بس خله على الله .....
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!