عمالة في المشروع لم تستلم رواتبها لاكثر من 6 اشهر

السلام عليكم


يسعد صباح الجميع


السالفة يااخوان
انا اعمل في احد المشاريع اللي الدولة ترصد لها المليارات
طبعا كلنا نعرف ان هالمشاريع تمسكها شركات كبيره و ينزل الشغل على مؤسسات اكثر ما يقال عنها زبالة او بالاصح ابو كلب

وهالمؤسسات تاخذ حقها بالاضعاف

لكن هالمؤسسة فوق انها ماخذة اكثر من حقها وعمالتها من الشارع وغير مدربة
ماعطتهم رواتبهم

لو تاخير شهر او شهرين اوكي
لكن 6 اشهر ؟؟؟


والله العظيم ان هالعمالة مالي عندهم اي فايدة لكن هالمساكين اللي صاير معاهم مايرضي احد
مو معقول المؤسسة تاخذ ملايين وهالمساكين هم اللي يتعبون بهالشموس واخرتها ياكلون هوا


عدد العمال تقريبا 20
وبصراحة ودي اساعدهم لوجه الله واخلي هالمؤسسة تعطيهم رواتبهم

فما ادري اي جهه حكومية نرجع لها
مع العلم بان هالعمالة شغالين بدون عقد وماعندهم مؤوسسة



واتمني ماحد يرد على الموضوع ويقول دامك تستلم راتبك ماعليك من غيرك >> متوقع ردود سلبية


تحياتي للجميع

كل الردود: 9
1.
11:50:04 2013.06.27 [مكة]
اخي الكريم الافضل تروح للشركه وتسوف شنو الاسباب اذا هم مطنشين هذولا حقهم الشكوى ولكن للاسف ان الي ماتعرفونه ان الشركات الصغيره والموسسات شغاله على دفعات الشركات الكبيره والشركات الكبيره ماكبر معضمها الا بالحرام لانه يسحبون على الشركات الصغيره وهكذا والعلم عن الله
2.
عضو قديم رقم 316738
12:22:01 2013.06.27 [مكة]
ايش مصبرهم 6 شهور عليهم بتوجه لمكتب العمل والعمال
3.
16:06:36 2013.06.27 [مكة]
احسن لو ان عملهم نظامي بعقد كان ماتحملوا سته شهور بدون راتب
4.
20:21:07 2013.06.27 [مكة]
المؤسسة استلمت دفعاتها وماسكة اكثر من مشروع يعني حسابها مليان وهذا اللي ينرفز اللي مصبرهم 6 اشهر هالمؤسسة كل يوم يقولون لهم الاسبوع الجاي لين عدت 6 اشهر
5.
21:10:08 2013.06.27 [مكة]
تكفى دور لي عماله تنقل علينا ونحن نوفيهم حقهم اذا يبون ينقلون على مؤسستنا يبشرون بحقهم وزود
6.
21:20:14 2013.06.27 [مكة]
الله يسعدك على اهتمامك فيهم وانسانيتك الله يفرج همهم والله يعطيك على قد نيتك تحياتي :)
7.
21:55:15 2013.06.27 [مكة]
الله يجزاك خير على شعورك النبيل تجاه الإنسانية .. ف ناس تعمل وتكد وتتعب .. والنهاية .. أكل مال الضعوف عن الرسول صل الله عليه وسلم : ( اعط الاجير اجره قبل ان يجف عرقه ) .. ع العموم الامور التصحيحية الآن بالدولة ممتازة .. وذلك للحفاظ على حقوق هالعمالة بحيث يجدون مرجع يرجعون له .. لأخذ اموالهم .. واجورهم .. طبعاً ما اقدر اقولك روح مكتب العمل .. لإنه راح يرفض المعاملة بالاساس كونهم مخالفين للنظام .. ولكن الحل المؤقت هو توجهه العمالة إلى سفارة بلدهم وطلب مساعدتهم في تحصيل مرتباتهم ... فإن أخذ الموضوع جانب الرسمية هناك إحتمالية بأن يدفع المستثمر لهم ..
8.
عضو قديم رقم 258273
23:19:57 2013.06.27 [مكة]
ء بقولكم كيف ياخذ الهامور المشروع ( ترسية المشروع عليه )؟ طبعاً يكون له مصالح مع المسئولين في تلك الوزارة اللي عندها مشاريع بالمليارات . يجيك بعد ما ترسي عليه الصفقه وهو ماعنده العماله اللي تغطي هالمشروع تعطيه الجهه حوالي 3 شهور او 6 شهور حتى ياتي بالعماله لنقول 400 عامل . وبعد مايجيبهم تعطيه الجهه فترة لانجاز المشروع ؟ طبعاً بعضهم عنده كم مشروع ولا يقدر يغطي كل المشاريع اللي تحت يده فيرسلها لهوامير معارف له أصغر منه ( تبادل مصالح ) يسمونها شركات من الباطن عاد تعرفون الشركات الصغيره ليست مثل الكبيره في الانجاز تاخذ سنين عشان تخلص المشروع هذا اذا خلص اصلاً ، وهاكذا هي مشاريعنا ( المصالح الخاصه ) ضيعت المصالح العامه ولا فيه رقيب ولا حسيب وكلاً ياكل ومحد يحاسبه . ء
9.
13:44:10 2013.06.28 [مكة]
على كذا اكل حق هالمساكين حلال؟؟ وين الناس اللي عندها خبرة في المشاكل العمالية؟
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!