اقسم لك ايه الاحمق لو تقفل علي بسيارتك لامزق كفراتك كلها

والله ظاهره من ابشع الظواهر انتشرت في الرياض خاصه

مساله التقفيل عليك بسيارته ويخليك ويروح

هذا ثالث موضوع لي في مستعمل كل ما قلت تخف الظاهره هذي القاها تزيد

والله العظيم افكر اليوم احط لوحه على سيارتي من الخلف واكتب عليها (اقسم لك ايه الاحمق لو تقفل علي بسيارتك لامزق كفاراتك )

ايش رايك بالله في العباره اسويها ولانصبر حتى تتبرع المرور وتحل الظاهره هذي بمخالفه وجزاء رادع مع اني اجزم ان هذا لا يمكن يصير

واحد من اقاربي يروي قصه عند المحكمه يقول واحد قتل واحد عند السياره سكر عليه ونفذ صبر الرجال هذا

ياخوان ما يمديني اوقف عند بقاله او بوفيه او مخبز واطلع الا واحد مقفل ولا تدري وينه

واحد قبل اسبوع قفل علي المشكله انه اندونسي وماهي عادتهم والله هذا الشعب بس شافونا وقامو يسوون مثلنا

المهم قفل علي بعد ما نزلت مطعم وكان امامي محل محمصه وانتظر انتظر ما في امل ارن البوري ما في امل افتح سيارته واعلق على البوري حقه قلت يمكن يعرف صوت حماره قصدي سيارته ما في امل

نزلت رحت المطعم ناديت باعلى صوتي ابي الرجال يطلع ما في امل المشكله المحمصه ما فيها الا ذا الاندونيسي وقلت مستحيل وعشر المستحيلات يقفل الاندونيسي

قلت خلني اجرب ما خليت محل الا رحته

فتحت باب المحصمه وكان الاندونسيي مقابل البائع وملقي لي ظهره واصيح السياره لمين رد البايع يقولي مدري

الاندونيسي كان في اذنيه سماعات الجوال وجالس يكلم

اشرت بيدي للباىع قلت خل هذا يقابلني

قابلني الشيخ قلت له بالاشاره السياره لك قال ايوه

قالت الله يجعلك تحت كفارتها يارب ما تقوم

من اليوم وانا اصيح ما خليت احد وفي الاخير حاط سماعات ومسكر على العالم ولا حتى ناظرت سيارتك من اليوم اصيح

استغربت منه بس تعودو خلاص صارو يتطبعون بطباعنا

المهم ايش الحل مع الظاهره النتنه هذي قبل مااجرم في احد لاني والله ما عد صرت اطيقها في حياتي

كل الردود: 23

عرض:
1.
21:37:53 2013.02.13 [مكة]
سوي مثلي أوقف بنص الشارع
2.
عضو قديم رقم 305045
21:37:55 2013.02.13 [مكة]
المفروض تبلغ المرور ويجيب سطحه ويسحبها هذا الاجراء النظامي
3.
21:38:53 2013.02.13 [مكة]
Tek tak أنت تمزح والله تبطي المرور ساعتين وما يجيك
4.
21:45:48 2013.02.13 [مكة]
ورب الكعبه واحد سكر علي ساعه ونصف في العمل وكان عندي ظرف طاري جدا المهم ثلاث مرات اتصل ب 993 يقولون كل مره كم رقم اللوحه واسم السياره خلاص تجيك فرقه وساعه ونصف وطلع الرجال وشبيت فيه الرجال يستسمحني وانا متوتر وجالس اقول الله لا يسامحك انا الحين بلغت الدوريات تجيك ويوم شاف ما فيني حال ويبغى يرجع يكمل مراجعته في الاداره قام يبغى يطقني وعصب المهم انا خوفا من الشيطان لما شفت الرجال قام يهيج مثل الجمل خليته ورحت قال له العسكري طبعا العسكري اللي كان جنبي من حراسات المبنى ويقولون مالنا علاقه المهم قال له العسكري ياخي انت غلطان على الرجال وماهو قابل اعتذارك تدرون ايش رد يقول يقبل ولا ما يقبل ياكل زق البعيد والله هذا كلامه وانا اسمع الله لا يسامحه ويقول تحسنبي خايف من الدوريات اللي جالس تنفخ علي عشانهم والله لو يجون ويحصل لسيارتي شي لاوريك وش بيصير لك ومن ذاك اليوم الى يومك ولا حتى اتصال من الدوريات بالرغم انها ثلاث بلاغات خلال الساعه والنصف
5.
22:05:29 2013.02.13 [مكة]
اكثر شي يقهر لما يكون بيتك جنب المسجد ويجي واحد يقفل عليك وعذره الصلاه خصوصا في رمضان اوقات التراويح طيب فرضا في حاله طارئه او واحد رايح دوامه ينتظر الى ان تنهي التراويح ان لم تستحي فافعل ماشئت
6.
عضو قديم رقم 233648
22:10:43 2013.02.13 [مكة]
ياعزيزي الاشكال هاذي مالها حل قبل اسبوع كنت في مستشفى وواقف نظامي جاء واحد وقف خلفي في نص المواقف ابي اطلع ارجع للخلف ما اقدر اللف واطلع طفشت بعد انتظار حول ساعه رجعت وعطيته وحده على الرفرف يحبها قلبك ومشيت الحل الوحيد ان تشغل وقتك اثناء الانتظار لسانك بالتسبيح ويدك بسكروب تتعلم الرسم على سيارته
7.
22:18:33 2013.02.13 [مكة]
اقلها يحط رقمه على الزجاج لو انه مقفل على احد وهذا برضه مايعطيه الحق انه يقفل على احد بس عالم ماعندها احترام للغير
8.
23:09:47 2013.02.13 [مكة]
الحل ركب صدام مثل سيارات المرور ودفه على اي اتجاه انا مصيبتي اني نضامي وعجزة عن نفسي اسوي الهمجيه الي سوونها بعض مرضى النفوس المعفنه ومره حصلة واحد مسكر علي ودق عليه هرن يمكن ربع ساعه ودوره بلمحلات ماحصلته ورجع السيارته وحصلها ماهي مقفله وفضي القير ودفها والمنطقه مدحدره وخليها وستمرت تمشي ومشيت وخليتها تمشي مع الشارع والله مادري وش الي حصله بلف داهي
9.
عضو قديم رقم 282899
23:47:51 2013.02.13 [مكة]
http://www.youtube.com/watch?v=PC0jzRCZTmo
10.
00:22:35 2013.02.14 [مكة]
صارت معي من واحد بالعمل كل يوم يجئ متأخر ويسد على العالم بالصدفة مرت دورية ووقفتها وجا راعي السيارة المتخلف صار العسكري يقول سامح الرجال قلت ما اسامحه لانه مهو متربي وأصريت نروح للقسم واعطي مخالفة ووقع على محضر صار يجئ اول واحد وان جاءً متأخر وقف بعيد ماعدا تعودها
11.
00:26:18 2013.02.14 [مكة]
عزيزي صاحب الموضوع كان الله في عونك لكني ما أشوف ان كتابة اللوحة على السيارة بالعبارة اللي ذكرتها مضهر حضاري بالنسبة لك بالرغم أني شفت راعي يوكن اسود في منطقة مكتظة بالسيارات بشارع العليا العام كاتب عبارة مشابهة الله يصلح الحال
12.
01:21:50 2013.02.14 [مكة]
في ظل غياب النظام والعقوبة .. تحصل على واقع مرير
13.
01:25:45 2013.02.14 [مكة]
مجتمعنا مجتمع متخلف جدا ... لا تتوقع انك بتطلع مشوار تقضي شغله والا تتمشى مع اهلك وترجع سالم ... لازم ولد حرام يعترضك والنظام ماعندك احد. اولا تعوذ من الشيطان بداية كل مشوار. اذا جيت توقف حاول تخلي جزء من مؤخرة السياره طالع بحيث لو احد وقف وراك يكون في المسار.
14.
عضو قديم رقم 304241
01:33:44 2013.02.14 [مكة]
ليلة انا وصاحبي طالعين نتمشى وكان عنده قلبة شفت يعني يريد يواصل الى الصباح و ينام حتى يعدل نومه مع الشفت الجديد ( الله يعينة ) خرجت معا و تمشينا قال لي وقف عند محل العصير مخطط 91 نزل يشتري و برجعته ادا بسيارة واقف خلفي و نازل قلت ما في مشكله نضيع وقت انتظرته نصف ساعه مليت و انا انتظر استخدمت المنبه اكثر من مره ولا احد يرد بالنهاية جنبي سيارة خارج و خرجت معاه بعد ما ركبت فوق الرصيف حتى تدخل السيارة النكته بان في راكب بالسيارة و لكن ما كان مهتم !
15.
عضو قديم رقم 317344
08:37:32 2013.02.14 [مكة]
اخي الفاضل لما تتصل عالمرور ويقول لك عطني رقم اللوحه عشان يطلعون بياناته عالجهاز ويشوفون رقم جوال له ويتصلون على صاحب السيارة فقط الحل/ وضع رقم الجوال على نافذة السيارة من الداخل واذا لم يكن هناك رقم جوال لك الحق بالتصرف
16.
عضو قديم رقم 265430
12:36:10 2013.02.14 [مكة]
انا عندي جمس قديم مكسر الحمدلله ماحد يوم تجراء ووقف وراي اطلاااااااقا ولو حد يوم قفل علي ببساطه دق الريويس واكمخه ودق علمرور ولا اتنازل يصلح جمسي المكسر
17.
عضو قديم رقم 113340
12:45:24 2013.02.14 [مكة]
اساسا سقطت هيبة الحكومه والشرطه والامن امام هؤلاء السمرمد هم يعلمون ان الطاسه ضايعه لهذا تجدهم يقفلون عليك بسياراتهم وينافخون عليك وممكن يمدون يدهم عليك هذا وانت الضحيه تطلع الغلطان وقدام العسكري ممكن يضربك . والله بلشه يعني يجبرون الواحد انه يرتكب جريمه ولا كيف ياخي تخيل اذا معك عيالك وجاك واحد مثل هذا مقفل عليك وينافخ ماذا لو مد يده عليك امام اولادك انت امام خيارين احلاهما امر من العلقم .. اما تضربه المهم تاخذ حقك او تتركه وتنهزم وتنسحب وبهذا تتحطم صورة الاب امام اولاده!
18.
عضو قديم رقم 113340
12:49:12 2013.02.14 [مكة]
بالامس كنت في احد المخابز واقفين سرا والشخص اللي امام لديه سياره مقفل على واحد المهم الرجال جلس يدق بوري ويكبس بالانوار للي في المخبز لعل وعسى المهم بعد مده رد الشخص صاحب السياره وهو قبلي في السرا ياشر للي في الشارع يقوله شوي شوي اشتري خبز تخيلوا الرجال هذا قدامه يمكن 6 اشخاص يشترون خبز .... طبعا الرجال صاحب السياره اللي يدق بوري ماهو سعودي اجنبي يمكن لهذا السبب ان الاخ تهاون معه وتجاهله وخلاه ينتظر الى ان جاء دوره واشترى الخبز. الحقيقه قمة الاهانة ان كنا ننظر للاخرين على اعتبار السياره وفخامتها لنفسح لراعيها الطريق ونتجاوب معه او تكون سيارة موديل قديم او حتى جديد ولكن ننظر للسائق من يكون ! انما الامم الاخلاق ما بقيت
19.
14:06:02 2013.02.14 [مكة]
الاخ سعيد القحطاني انت تقول عادي اتصل بالمرور يجونك واذا طلبو مني رقم اللوحه اعطيهم عشان يتاكدون اقول لك ثلاث مرات اتصل فيهم وبين كل اتصال يمكن ربع ساعه وكل ما اتصل يقول عطني رقم اللوحه واسم السياره يعني يبغون يطفشوني وفي الاخير ليتهم تجاوبو معي لو بعد عشر ساعات بس الى يومك ما تجاوبو ولا حتى اتصال اي استهتار هذا وترا الدعوه ما يبغالها شي يتصلون باقرب دوريه في الموقع وتجيك بس ما عندك احد الهيئه اقل عدد وعده منهم واكثر قضايا منهم واذا اتصلت فيهم يركضون لك ركض بالكثير عشر دقايق او نصف ساعه وهم عندك حسب المسافه
20.
عضو قديم رقم 282899
14:28:52 2013.02.14 [مكة]
من امن العقوبه اساء الأدب. القصور من الجهات الرقابيه والمسؤله في التجاوب السريع وردع المتهاون يسبب مشاكل في المجتمع قد تؤدي الي الشجار ثم لاسمح الله القتل ثم يهبوا حينها مسرعين يقتادوك لي السجن فمن السبب في تلك المأساه كلها
21.
20:32:14 2013.02.18 [مكة]
طيب ما عندكم حلول بدون مضاربات
22.
17:48:27 2013.02.20 [مكة]
امس بالليل امام الطواري وانا جالس بالسياره انتظر مريض وقف واحد امامي وهو يدري اني بالسياره اشرت له بيدي اقول له لا توقف طنشني قلت اشوف نهايته سكر سيارته ونزل ويوم خلص جاني قال معلش بس نصف ساعه وارجع قلت له لو تبي دقيقه واحده ما اسمح لك ياخي انتو ما تعقلون من ذا الحركه تركني ووقف قدام اللي جنبي وراح
23.
20:03:24 2013.02.20 [مكة]
منت مأدب الناس لكن حلها سهل جداً لاتوقف بموقف تكون فيه معرض انه يسد عليك احد وان حصل وقف ولاتدخل السيارة مرة يعني خل مؤخرتها طالع على الشارع العام بحيث انه مايقدر يسد عليك لانه لو سد بيسد على الشارع كله وهذا اللي اسويه أنا دائم ولا قد سكر علي احد
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!