موضوع مطروح للنقاش مع الأعضاء الكرام

كلما انبت الزمان قناتاً
ركب الناس للقناة السنانا
وأنا أقول كلما هربنا عنكم أيها الشريطية ووجدنا لنا قناة للإستغناء عنكم استخدمتم تلك القناة لزيادة ارباحكم على ثقتنا بل سذاجتنا نحن بكم
ياجماعة يامعشر القراء مساكم الله بالخير جميعاً
فيه شيء يزعجني واكيد يزعجكم بعد في هذا الموقع
او بمعنى اصح ابي اشاوركم واسمع ردودكم في موضوع
يزعجني جداً جداً جداً الا وهو حركات بعض الشريطية في التدليس على الناس في بيع سياراتهم او تجارتهم او ماشابه واستخدام مفردات براقة جميلة لتسويق بضاعتهم
ابي اعطيكم أمثلة وأبي منكم لاهنتم تزودونني ببعض الأمثلة التي يمكن أكون نسيتها
1- السيارة خالية من الرش و السمكرة ماعدا الكبوت فيه رشة تجميلية ( بالله عليكم وش لون يرش رشة تجميلية وبعض موديلات السيارات اللي فيها رشة تجميلية 2012 وهو فيه رشة تجميلية بدون سمكرة او عج )
2- الموتر أخو الجديد ( والسيارة ماشية 150000 كم وهذي في شركات تقييم السيارات الامريكية ماتاخذ اكثر من 2.5 من 5 يعني ماتاخذ اكثر من 50% في التقييم حتى ولو أن بديها ومحركاته سليمه )
3- كفرات بلدها وباقي فيها نص عمر ( والسيارة ماشية 70000 ياجماعة ابي اتجنن كفرات ماشية 70000 وباقي فيها نص عمر ؟!!!!! )
الأمثلة السابقة كلها حقيقية مأخوذة من مواقع السيارات لبعض الشريطية الله يهدينا واياهم باقي الأمثلة أبي اخليها لكم تكملونها أخواني القراء
اخواني الشريطية ماحنا حاسدينكم الله يرزقكم بس احترموا عقولنا واحترموا بعض الناس اللي تاخذهم فيكم الثقة
وارضوا بالقليل
الرسول صلى الله عليه وسلم يقول بارك الله في الربح القليل
هذه الديباجة هي مقدمة لأطروحاتكم الجميلة فنسمع منكم بارك الله في الجميع

كل الردود: 10
1.
عضو قديم رقم 214261
20:20:59 2013.01.22 [مكة]
قول عمر رضي الله عنه لايغرنكم من رجل كثرة صيامه ولا قيامه .. ولكن انظرو صدق قوله وعمله وين تجد الصادق في هذا الزمن اللي يقولك هذه سيارتي وفيها العيب كذا وكذا..بل بالعكس بعض الناس لحيته تكاد تلامس ركبتيه وتساله عن سياره او بضاعه ..يقولك ميه ميه وشويتين اه ياخوفي بس من العين؟؟ وتجد في السياره كذا عيب وهذه حدثت معي قبل يومين فقط لاغير
2.
عضو قديم رقم 94884
21:17:54 2013.01.22 [مكة]
رد الاخ saadnmmm1 يكفي ويوفي.. للأسف الأسلام عندنا بالمظاهر.. لكن الجوهر لااااا
3.
23:06:30 2013.01.22 [مكة]
ياخي الله يهديك ليه الحسد ؟ والله انا مانيب شريطي ولو كنت شريطي مافيها شي الله حط فيك عقل تفكر وتعرف الزين من الشين رح افحص ولا عليك من كلام احد لا تقولي ثقه ومدري كيف رح افحص ولا عليك وريح نفسك
4.
عضو قديم رقم 270000
23:30:07 2013.01.22 [مكة]
يارجل اغلب الشريطية حاط ذمته بالبيت قبل لايجي للمعارض الله لايرده. انا ماانكر ان فيه ناس هذا رزقهم ويترزقون بالحلال وواضحين مع خلق الله بكل شي لكن نواااادر,, الغالب جشع في تعامله وفي بيعه وشراءه يبدل كلمته كم مرة قبل البيع , ماخذ الوضع بحبحبة الخشوم عشان تنزل له ,, من انجس المخلوقات هالعينة ,, ويحلف الف يمين ان الموتر نظيف واني مااكل حرام وهو كل شغله حرام بحرام,, ولا بعضهم مربي لحية يبيع فيها ويشتري وهو ابعد مايكون عن الدين والعياذ بالله وصادفت ناس منهم, ولا يقول لك استخدام شايب وهو كل وراعين الحارة متعلمين فيها , او زي ماتفضلت اخوي يقول الموتر جديد بس مرشوش كامل تجميلي واحد حكها بمسمار!!!!!!!!! أو يقول الموتر اخو الوكالة وهو ماشي 200 الف يقول جديد بس فيه رفرف وصدامات وجنب يمين!! وش بقى طيب ؟؟؟ ههههههههه والله عالم عجيبة واسطوانة الشريطية الدائمة الممشى مايضر الموتر..كيف مايضر الموتر بالله؟؟والله عالم كذابة لكن حسابها عند رب العالمين.. كل شي له عمر افتراضي اجل موتر ماشي ربع مليون كيلو يقول مايضره هههههه هزلت .. وغير ترجيع الطبلون وغير,, وغير لكن ربك بالمرصاد
5.
00:05:49 2013.01.23 [مكة]
انا جبت سيارة لي ولأخوي ونسيبي من أمريكا طبعاً فصلت في الموضوع عشان ماتقولون شريطي هههههههههههههههه المهم صار عندي خبرة في الشراء من أمريكا عندهم شركات تقييم للسيارة تعطي السيارة رقم من واحد الى خمسة النظيف جداً ياخذ خمسة والسيء جداً ياخذ أقل من 2 لايمكن لايمكن لايمكن أن تاخذ السيارة خمسة وهي ماشية أكثر من 50000 كم حتى ولو كانت محركاتها وبديها سليم 100% بمعنى إن ممشى السيارة يقلل من عمرها الافتراضي وربعنا الله يهديهم يقول لك اخت الجديدة وهي طاقة اكثر من 150000 اللي ماشية في امريكا 150000 كم يعني حوالي 94000 ميل لايمكن ان تتحاوز 3.5 من 5 في التقييم وينقص فيها حوالي 10% من قيمتها انا كل السيارات اللي انا جبتها لم تتجاوز 50000 كم ومع ذلك وصلت بمبلغ غير مجدي اطلاقاً للربح لأنه مساوي للأسعار هنا ولو أنني ضحيت في موضوع الكيلومتر لحققت منها الربح وهذا مايفعله اصحاب الصالات ومستوردي السيارات الامريكية خلاصة القول يجب ان يتنبه المجتمع الى خطورة قناعات الشريطية واقناعهم للناس في موضوع ممشى السيارات لأن السيارة مو مكينة وقير وممشى تلاحظ احياناً السيارة ولا احلى من مكينتها وقيرها لكن بديت تحس في صوت ولا انت عارف وين مكانه مثلاً او اذا ضربت مطب حسيت هرقله في السيارة او اكسسوارات السيارة مايشتغل بعضها هذي دلاله على ان العمر الافتراضي للسيارة بدأ في النفاد هذي جلد وهذي مقصات وهذي ياي وهذي ربلة وووووووو الخ المشكلة مو في هذي المشكلة ان الشريطي مقنعني ان السيارة جديدة واخذ علي سعر عبارة عن 70% من سعر سيارة وكالة طيب وين جديدة وهي بادية تطلب انا مااخاطب الشريطي لأنه رجال يدور عن رزقه بالطريقه اللي تعجبه انا اخاطب المجتمع اللي اذا صار عنده وعي بها لأمور ترك هذه البضاعة أو على الأقل يشتريها بسعر معقول يساوي مع الصيانة اللي راح يسوي لها السعر العادل لها ودمتم ،،،
6.
00:25:23 2013.01.23 [مكة]
في البيع والشراء .. هناك معلومة خاطئة في كون البائع يتفنن في غشه للمشتري ولو علم البائع أنه غاش لنفسه .. وسينكشف غشه عند من لا يغادر صغيرة ولا كبيرة إلا أحصاها ما أقدم على ذلك ولتمنى أن ينام طاوي البطن خير له من ريال بتوقد عليه ناراً يوم القيامه نسأل الله أن يصلح أحوالنا أجمعين .
7.
01:01:13 2013.01.23 [مكة]
وعندهم عقده من شي اسمه ميتسوبيشي ومازدا وغيرها من الشركات اليابانيه مع العلم بان مازدا وميسوبيشي هما الوحيدتان بالاضافه لهوندا الذين لازالت صناعتها ياباني ميه دالميه نيسان وتويوتا لو انه موديل صفر تلقي سعره بالعلالي هذي ثقافتهم للأسف
8.
01:29:29 2013.01.23 [مكة]
عشان كذا تلقى سعر ميتسوبيشي ومازدا للمستعمل سعر عادل اي واحد يقدر يشتريه لكن التويوتا والنيسان مطيرينه
9.
عضو قديم رقم 270000
03:06:38 2013.01.23 [مكة]
تصحيح لك اخوي الصداوي / الهوندا ماصارت يابانية 100% موديل 2012 كان ياباني-امريكي
10.
04:48:21 2013.01.23 [مكة]
ابغي اذكر طرق الغش لي سابق تعامل مع الشريطيا وباالاحري عملت معهم والله ما طواعني ظميري بلي يسوه 1يتم فحص السياره باالفحص الدوري بطرق مثل الكفرات من سياره اخري او مساعد مفقوع ينظف من الزيت كانة جديد بعد المكينه يحطون زيت 90حتي ما دخن بعد يجوبون واحد فلبيني او واحد مرسم علي انه زبون عادي ولما تكون في الحراج لاحظ لما توقف عند سياره تحت المقرفون دقيقه ويكثرو العالم هم منهم وفيهم ولمبة الارباك انتبهالها يغطونها بشطرطون من الداخل واخر شي ورش الفحص اصحابه هم اصحاب المعارض واصدقاء يعني لما تبيع انت يطلع الف عيب ونفس السيارة ونفس اليوم لزبون تطلع انظف شي والله ينتقم منهم وشورتي لازم ينشالون ويصار الحراج لاصحاب السيارات وما يبقي ولا شراطي لانهم ما يخافون الله
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!