مصيبة تبي شور من شخص حكيم تكفون

بسم الله الرحمن الرحيم
السلام عليكم ورحمة الله

يا اخواني الحقوني بالشور الزين الله يجزاكم الجنة تراها وصلت خراب البيوت

لي صديق عسكري أصر عليه زميله العسكري ان يكفله في دين لحاجة عاجله ورفض صديقي ومع الحاح العسكري الثاني كفله صديقي في مبلغ مائة الف ريال جود من عنده وصفاء نية وبعض الناس يسميها غباء وغشامة

عند ما مرت الايام وجاء وقت السداد اتصلو اصحاب الدين بالكفيل وطالبوه بالمبلغ استغرب صاحبنا من المكفول انه ماسدد ولا قال له شي واكتشف بعد بحث عن المكفول ان هالشخص المكفول مسجون وانه متعود على هالسلف وانه مطالب بأكثر من مليون ريال

صاحبي الكفيل انصدم وحاول بكل ما اوتي انه يسدد المال المتكفل به ولكن لا حول ولا قوة الا بالله الرجل عليه قرض من البنك لزواجه واقساط سيارة وايجار وازيدكم انه كان متزوج قبل زوجته وماكتب الله لهم نصيب وطلق

حاول صاحبي قد مايقدر وراسل الديوان الملكي والإمارة وراح لمؤسسة الوليد بن طلال الخيرية ورفضو يدخلونه ومابقى بيده شي يسويه

الطامة الكبرى صارت يوم الثلاثاء الماضي حين دخل صاحبي للسجن وبيترتب على هالسجن فصله من عمله ولا حول ولا قوة الا بالله

ياجماعة الخير وش الشور وش الراي ؟ هل فيه بنك يعطيه قرض ؟ او فيه اشخاص يسلفونه بضمان اي شي ولا يستعجلون ؟ تكفون ياجماعة الخير الحقو اخوكم وتأكدو من حاله بأوراقه الرسمية

ترى الله عز وجل في عون العبد مادام العبد في عون اخيه ومن مننا يكره يكون الله عز وجل في عونه

تكفووووووون عطوني الراي السديد

كل الردود: 17

عرض:
1.
19:00:47 2013.01.19 [مكة]
لاحول ولاقوة الا بالله قسم بالله في ناس تكرهك في فعل الخير ... ...... الحل مالكم الا ثلاثة اربعة اشخاص يتقاطون ويطلعوه ويسدد لهم على مهل .. او احد ياخذ قرض ويعطيه يسدد للناس .. وهو يسدده له للبنك .. بس لازم اللي ياخذ القرض يكون مرتاح مالياً .. عشان يتوقع انه بأي شهر ممكن مايقدر يسدد ف يتعاون معاه ويأجل عليه او جمعية كم شخص وتسلموه اول واحد ويلتزم بالسداد معكم او الله يعينه يشوف اهله وجماعته يتقاطون له ... ويعتبروها دية اي والله دية الصداقة اللي ماتت والنخوه اللي ذبحها الديانة
2.
عضو قديم رقم 227898
19:02:31 2013.01.19 [مكة]
هذه من مصايب بنك التسليف اذا ما سدد الشخص يسكتون عنه وبعد سنه يطالبون الكفيل بالتسديد صارت معاي الله المستعان رحت ادور على الرجال حصلته فاصل من العمل ومسافر . اخوي تأكد ان العمل ماراح يفصلونه ولكن راح يستقطعون منه ثلث من كل راتب عاد خله يدبر اموره ياخذ قرض من بنك ويسدد
3.
19:25:18 2013.01.19 [مكة]
جزاكم الله الجنة اخوي بروزاك صاحبنا عليه قرض مهوب معطيه البنك قرض ثاني
4.
عضو قديم رقم 283444
19:34:07 2013.01.19 [مكة]
اللة يعينك ويعينة طالما خويك مسجون البنك ماراح يعطيه ولا اي مؤسسة تقسيط لذلك الحل انك تاخذ انت قرض من مؤسسة تقسيط مية الف و يستقطعون من راتبك وانت بدورك تاخذ من خويك كل شهر وصدقني خويك راح يطول في السجن حتى يسدد هذا العلم من تجربة لواحد من جماعتي عليه مليون وميتين والان له اربع سنوات في السجن انا عارف اني صدمتك بس هذا الواقع والله يفرج عليكم
5.
عضو قديم رقم 157399
20:06:05 2013.01.19 [مكة]
اخوي الكريم انت ماقصرت وجهك ابيض لكن سؤال صاحبك ماله اهل ابو اخوان جماعه زملاء عمل ترا العسكر اهل خووه اول شئ اذا تقدر كلم حد من رؤساه في العمل ظباط واشرح لهم الظروف وهم لهم يدينهم ويقدورن يجيبون لها حلول والثانية دور على احد الميسورين وقل لهم ابحث عن زكاة لشخص مسجون وقدم لهم كل الاوراق والثالثة حاول عن طريق اخوان زوجته اذا احد له واسطه او اوضاعه المادية طيبه الرجال طيب وعلى نيه ويستاهل من يخدمه
6.
20:06:26 2013.01.19 [مكة]
جزاكم الله الجنة
7.
20:10:34 2013.01.19 [مكة]
اخوي المتداول جزاك الله الجنة صاحبي عنزي له ربع واهل واخوان لكن المشكلة ان ابوه زعل عليه يوم عرف بسالفته وقاله انت سفيه الي تكفل احد بهالمبلغ وانت بالاساس مديون وانسى ان لك ابو وحلف على اخوانه مايساعدونه والله ان هذا الي حصل والزكاة الله يجزاك الجنة امرها عظيم وانا فقهيا جاهل مدري هي تحق له او لا انا انسان ببذل جهدي ولعل راي اخونا جزاه الله خير بالجمعية بين اهله تطلعه من سجنه بس بشروني الله يبشركم بكل خير اكيد عمله مهوب فاصلينه ؟
8.
21:08:03 2013.01.19 [مكة]
ياربي لك الحمد والشكر كما ينبغي لجلال وجهك وعظيم سلطانك ابشركم اخواني بفضل الله وحده اولا واخيرا ثم بفضل دعوات الطيبين مثلكم توه اتصل علي صاحبي وانحلت مشكلته ياربي لك الحمد والشكر وماشاء الله لاقوة الا بالله الله يجزاكم خير ياللي رديتو او دعيتو والله لايوريكم مكروه الحمد لله رب العالمين الحمد لله رب العالمين الحمد لله رب العالمين
9.
22:20:35 2013.01.19 [مكة]
الله يفرج هم كل مسلم
10.
عضو قديم رقم 193350
22:26:38 2013.01.19 [مكة]
الحمدلله الله يبشرك بالخير
11.
عضو قديم رقم 320600
22:54:34 2013.01.19 [مكة]
اسأل الله الكريم رب العرش العظيم انت يفرج همه ويقضى الدين عنه ويجعل له من كل هم فرجا
12.
23:27:45 2013.01.19 [مكة]
ماله حل غير اهلة وجماعته وابوه ماراح يخليه يطول بالسجن بس يمكن بيخليه فترة وتالي بيطلعه اذا كان الدين المسجون فيه من مية واقل وخصمة متساهل ففيه لجنة في السجن تسدد عن ما ذكرت بعد ما يخلوه من 3 الى 6 اشهر وقبل رمضان وهو طالع شرط يكون اول مرة يسجن اما اذا كان رد سجون فانسى
13.
23:32:55 2013.01.19 [مكة]
هذي تفريج كربه وربه مانساه ولا يعني ان مر عليه هالموقف انه مايفعل الخير لكن الانسان لازم يكون حريص ويستخير ربه بكل الاحوال الله يبشرك بالجنه اخوي وحمدلله على سلامة صاحبك
14.
00:49:13 2013.01.20 [مكة]
الحمد لله واتمنى ان تكون درس لنا جمبعا في التأني قبل اتخاذ القرار
15.
عضو قديم رقم 108032
01:22:17 2013.01.20 [مكة]
نظام الخدمه المدنية سجن سنة فااكثر فصل ويستثنى سجين الدين ولمن يسدد الكفيل يطالب المكفول بكامل المبلغ ويصدر له صك في ذالك
16.
13:04:41 2013.01.20 [مكة]
ودي اعرف قبل مايكفله ليش مافكر بالكلام هذا "الرجل عليه قرض من البنك لزواجه واقساط سيارة وايجار وازيدكم انه كان متزوج قبل زوجته وماكتب الله لهم نصيب وطلق " وين الوقاية خير من العلاج !!!! كنت مستحي وتخاف يقولون عنك طقوع ومافيك خير !!! يالله الحين دبر نفسك
17.
عضو قديم رقم 209575
16:33:38 2013.01.23 [مكة]
انا بس مو فاهمة شي... ليش عقوبة اللي مليدفع المبلغ اللي عليه السجن ؟؟ يعني هيا مساواة بين القاتل..والسارق..والسفاح والمعسر اللي مامداه يدفع لسبب من الاسباب ؟؟ كلهم مصيرهم وعقابهم واحد ؟؟
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!