الفارق السعري بين التاهو واليوكن ..!

السلام عليكم ورحمة الله وبركاته

ما ادري صراحة هو ملعوب علينا بكيفنا ولا غصب عنا..!
دخل مغامرة شراء سيارة جديدة ، بحثت ودرت ودخل في مقارنات ومفاوضات عديدة سالنا اهل الخبرة والتجربة واهل العلم والصنعة ، كل يقطك في شعيب وترجع منه بدون جواب يشفي الغليل ، او يجعلنا عن القرار نميل، تقلبت بين انوع الخيارات في السيارات العائلية بين هوندا وفورد واستقرينا على سلوم ربعنا عند جنرل موتورز
بحثت في النت عن الاسعار عند ماما امريكا لقيت الاسعار فيها اختلاف لكن قلنا يمكن وكيلنا يتعب يجيبهن سباحة ولا شايلهن على ظهره ، وقصة الضمان والصيانة الي مثل بيض الصعو الي تسمع فيه ولا تشوفه ؛ قلنا ميخالف يستاهل خله يتكسب وترزق الله من دم هالضعوف ( المواطنين) .....!
كل الي فات كوم وممكن تجد له تبرير وتصريفة وهالمسألة الي عيت تدخل مخي ، انتم معي يا جماعة ولا لا؟؟

وقت البحث والمقارنات في الاسعار والمواصفات لقيت شيء غريب وهو
ان فرق السعر بين اليوكن والتاهو من نفس الفئة يتراوح بين 1000 $ الى 1500 $ بعملة الامريكان يعني بين 3000 ريال الى 5000 ريال بعملتنا الطيبة الذكر..!
تروح لوكيلنا الطيب الذكر وتسأله عن الفرق بين اليوكن والتاهو من نفس الفئة
يقول لم بين 15000 الف 18000 ريال كيف ؟؟؟
طبعا في كل الحالتين الغلبة لليوكن الشعبي ...!
لكن ليش هالفرق وين عيون الناس ؟؟؟ معقولة يزيد في سعر اليوكن بدون سبب، هل اليوكون عندنا ولد اصل وفصل والتاهو مهوب معروف اصله ولا القضية استغفال الناس والضحكة عليهم..؟؟؟

فيه احد لاحظ هالشي ولا بس هي هواجس اتعوذ من ابليس واكل تبن واشتري وانا ساكت؟؟؟ مثلي مثل غير

كل الردود: 8
1.
04:35:16 2013.01.17 [مكة]
يا رجال العيب مهوب فينا العيب في تفكيرنا العقيم الي ماتغير من عصر جدي وجدك مايعرفون غير تويوتا ونيسان وجمس ومن حق وكلاء السيارات المذكوره رفع السعر على كيفهم وراح تشترون ولا لوقارنا بين السيارات الكوريه والكامير المعفنه للاحظنا تميز واضح من ناحية المواصفات لسيارات الكوريه لكن تفكيرنا دائماً لايمكن ان يتطور ودائماً ملعوب علينا علشان عقولنا في .....
2.
عضو قديم رقم 109849
08:40:27 2013.01.17 [مكة]
فيه فرق في المواصفات اللي يجيبها الوكيل بالنسبة للتاهو أقل فئة واليوكون أقل فئة .. عندك ياطويل العمر مواصفات في اليوكون ماهي موجودة في التاهو وهي كالتالي : مكيف لمس - الدواسات وانتم بكرامة كهربائية - المرايات الجانبية فيها اشارة سهم + تتصفط كهربائيا + فيها لمبة تحت تولع مع فتح الباب + مصبوغه بنفس بوية الموتر - حساسات خلفية .. هذا اللي يحضرني من المواصفات حالياً واللي ممكن تكون سبب فرق السعر اما الوكلاء في امريكا ممكن يوفرون لك تاهو ويوكون بنفس المواصفات تماما عشان كذا مافيه فرق سعر واجد والوكيل عندنا مدلع الـGMC شوي بذا المواصفات. شي ثاني ممكن انت ما لاحظته ان الوكيل مابدا يبيع الشفروليه التاهو والسوبربان الا مع الشكل الجديد 2007 وطالع .. وبس الوكلاء الخليجيين اللي كانوا يوفرون الشفر التاهو والسوبربان .. قبل ف السعودية ماكان يبيع إلا GMC وكان يسمي الطويل منه SUBURBAN ولما نزل الشكل الجديد ونزل التاهو واليوكون أصبح اليوكون الطويل اسمه YUKON XL والصغير يوكون نفسه .. وحط السوبربان للتاهو الطويل .. وطبعا كلها اختلاف مسميات لكن الـGMC كسب ثقة الشعب هنا مع انهم كلهم سوا واصبح الفرق بينهم فوق الـ30 الف وعلى لاشي للأسف .. ايام 2008 كان السوبربان أقل فئة بـ119 واليوكون الطويل 156 وعلى لا شي برضه .. موفق وين مارحت ياغالي والله يرزقك الموتر اللي تتمناه
3.
12:37:45 2013.01.20 [مكة]
بياع صدقت قد نكون مؤدلجين في كثير من قراراتنا ، ونتبع ما كان عليه ابائنا بدون ان نفكر او نبحث ، وليس هذا قصورا في آراء ابائنا لكن الان تغير الوضع وصلنا الي عصر اصبحت في المعلومة متوفر في جيوبنا ومكاتبنا ولا يكلفنا الحصول عليها الا ضغطة زر عبود قد تكون وجهة نظرك صحيح ولكن مبلغ الفارق كبير جدا وايضا لا اعتقد ان الوكيل عندنا يضيف اشياء للمركبة الا وهي اصلا موجودة مميزة او مواصفات مطروحة كخيارات مصنع ولا اعتقد ان الامريكان اقل من موصفات وخيارات ...!
4.
12:42:09 2013.01.20 [مكة]
اشكر الجميع على التفاعل واحب ان اشارككم فرحتي وايضا خبرتي فقد اشتريت سيارة تاهو 2012 بمبلغ جدا مناسب وناقص عن السوق كثير فالي حاب يشتري لا يتردد بالتواصل معي على الخاص لن ابخل عليه بالنصيحة الي راح تفيده كثير
5.
06:46:04 2013.01.21 [مكة]
يعطيك خيرها ويكفيك شرها....أرسلت لك على الخاص....ممكن توضيح....
6.
عضو قديم رقم 168890
07:38:05 2013.01.21 [مكة]
سياره مبروكه باذن الله الله يطعمك من خيرها ويكفيك شرها ياليت ماتبخل علينا بالنصيحه
7.
عضو قديم رقم 320965
07:49:41 2013.01.21 [مكة]
الله يبارك لك
8.
06:52:04 2013.01.22 [مكة]
الله بجزاكم بالخير ويبارك لكم في مالكم وعيالكم ابد بقص لكم تجربتي المتواضعة والتي دخلت فيها في دوامة من الخيارات تضيق الصدر ، اخرجني منها الاستخارة وثم التركيز قليلا وتحديد الاحتياجات والنطاق السعري ثانيا وايضا اشياء اخرى مثل الصيانة مستقبلا واذا فكرت في البيع اذا حدتك الظروف السيارات العائلية اهم شيء فيها عدد المقاعد اعمل حسابك لهذه النقطة جيدا ، وسائل الترفيه قد تكون مغرية وجاذبة في بعض السيارات لكن لاتجعلها تصرف انتباتك عن الاهم احتياجك الشخصي وطريقة استعمالك وقوة السيارة ومتانتها وايضا قابليتها للبيع مستقبلا والصيانة من ناحية جودة الوكيل وتوفر القطع حتى في المدن غير الرئيسية للذين يسافرون كثيرا ، قد لا نلاحظ استهلاك البنزين ولا نعاني منه لكن مراعاة نوعه مهم ايضا خصوصا اذا كانت السيارة تقبل 91 او 95 او تقبل الاثنين معا لا انصح بشراء السيارة بنظام التاجير المنتهي بالتمليك لانهم ياخذون عليك نسبة عالية ولكن اذا استطعت ان تاخذ قرض وتدفع كاش افضل بكثير واذا رغبت بالتامين بامكانك انت ان تامن بنفسك باقل سعروافضل شركة احذر من تلاعب اصحاب معارض السيارات بالاسعار فقد تجد نفس السيارة في معرض مجاور او مقابل بفارق قد يصل الي 8 الالف او حتى اكثر وهذا شيء واجهت واختبرته بنفسي الوكالات جميعا سياراتها التاهو واايوكون وحدة الجميح والتوكيلات وايضا اذا فيه سيارات تخص العيسائي كل فئة لا تختلف عن مثيلاتها ولكن السعر قد يفرق معاك فالجميح اغلا مافي السوق لا اعلم لماذا؟؟ واخيرا اسف على الاطالة وارجو ان اكون قد قدمت معلومات مفيدة لاحد والله ييسر اموركم ويرزقكم من واسع فضله
هذا موضوع قديم، وتم إغلاق الردود عليه آلياً.
عرض وسائل التواصل مع الكاتب
تطبيق مستعمل

تصفح بسرعة مع تطبيق مستعمل!