يا هلا ومرحبا بالجميع، يقولون ماخاب من إستشار! واللي تشوفه الناس بعيونه ماهو مثل اللي تشوفه بعينك! ما ودي أطول عليكم، أنا جالس بالمكتب وأفكر إلى متى وأنا أنتظرهم يصرفون الراتب وآخر حاجه أصير مبرمج نفسي على مقدار هالراتب ومربوط فيه مع إن وظيفتي زينه ولله الحمد ومكاني جداَ مرتاح فيه. والشغل أزين من العطالة لكن الفكرة إني ماودي أجلس أنتظر الراتب وبس ودي أسوي شي يصير دخل ثاني!!! هنا الكلام أنا معي مبلغ تقريباَ 200،000 ريال ولله الحمد والشكر، وأفكر أفتح محل ولا نشاط وجالس أفكر مره في محل تلميع سيارات ومره أقول ماينفع وكثرت الأفكار اللي مدري وش آخرها. اللي ودي أوصله لكم اللي جرب يفتح مشروع ويتابعه بنفسه ويتعب عليه ويشوف وعرف مدخاله ومخراجه منه يشور علينا. الأفكار موجودة لكن تجارب أهل التجاريب هي اللي تعطيك التطبيق الصحيح. والسلام عليكم ورحمة الله وبركاته.