تحذير على كاسات ستيل الشبيهه لعدسة الكاميرا

الله يجزاك خير وحسبي الله عليهم هالنصابين

اشياء كثيرة معروضة هنا بضعف ثمنها

مثلا

1- شريت حصالة نقود ببطاقة للاطفال بـ 60 ريال بدون الشحن ولقيتها في سوق الصين بـ 35 والوان متعددة اختار الي تبي

2- وسعات تقليد تباع بـ 800 هنا في السوق نفسها بـ 90 وب 110 ريال


والكثير الكثير

والله المستعان

يا عزيزي هذي ضريبة الي يدور سلعه بدون ما يروح يتعب يدور عليها

ان كانك ما تبغى تدور تتحمل الخساير

الناس طماعه وانا اخوك وتحاول تاخذ كل قرش انت ماسكه

ضريبة التسوق الالكتروني

اخوي اللي يقول نصابين اعذرني انا ما اتفق معك ..
اول شي هل تتوقع ان المحل اللي تشتري منه ب35 شراها ب35 في الاساس ..؟
اكيد هذا شراها يمكن ما طلعت عليه ب 5 ريال لانه اخذ كمية كبيره ..
واللي يبيعون هنا وفي المواقع اغلبهم يشتري من برا السعوديه ويكون فرد فتكلفه اكثر من المحل ..
وبعدين حتى لو يبيعها ب مليون معه حق لانها سلعته ..
لكن الصحيح منك كمستهلك انك قبل لا تشتري تبحث .. لكن هم ما غلطوا ومالك اي حق تقول عنهم نصابين ..!
تحياتي لك اخوي ..

اخوي اللي يتكلم عن التقليد التقليد درجات .. ممكن تكون نفس الشكل لكن الوده اعلى .. ومع ذلك مثل ما نبهت اول كل واحد يدور رزقه لكن انت المفروض انك تبحث قبل لا تشتري ...

لكل من تألم لسلعة دفع ثمنها مضاعفاً عبر مستعمل وعن سبق اصرار وترصد،، أطمأنكم أنها طرح من حسنات الكذاب والغشاش، وزيادة في حسناتك، فمزيد من السيئات يا كذابين وعسانا نحن الرابحين،، للأسف البعض لو يستطيع يبيع الهوا ما تردد. ولكن الله لهم بالمرصاد،، أذكرهم:
بقول الله سبحانه وتعالى:
ألا يظن أولئك بأنهم مبعوثون ليوم عظيم..

انا معك بكلامك ياصاحب الموضوع بس الواحد مايجي مدرعم ويشتري
مثلا من ناحية اللاكترونيات تقدر تشوف سعرها وانت جالس على الشاشة وتحسب تكلفة الشحن وتحسب مكسب الرجال المعقول منه وتاخذها منه والله يرزقه بس فيه ناس الطمع معميهم ولو مالقى احد يشتري منه ماعرضها وعلى ذلك ابعطيك مثال قبل اسبوعين حبيت اشتري شاشة وحصلت وحدة معروضة وكانت مستخدمة شهر ويبغى فيها 2600 ريال رحت وفتحت على موقع اكسترا ولقيت نفسها 2199 ريال جديدة والتوصيل مجاني بعد .

المفروض من الآخوان في مستعمل التآكد من الآشيا اللي تعرض وعدم فتح المجال للمتلاعبين والنصابين بآكل آموال الناس بغير حق ..

اخوي mr3bood
بارك الله فيك تقول عن ابو وليد لاتقول لهم نصابين هؤلاء
كأنك تدافع عنهم
والرسول صلى الله عليه وسلم يقول : من غشنا فليس منا
الرسول عليه الصلاة والسلام يتبرأ من هذا الغشاش .
وأيضاً تقول هذي بضاعته حر فيها يبيع بأي قيمة يريدها
لا ياخوي ليس حر أن يضحك على الناس في بيعها لأن هذا من الغش
والنصب هو الغش لاكن كلمة نصب كلمه عامية
يسمى هذا ( غبن )

اخوي mr3bood
بارك الله فيك تقول عن ابو وليد لاتقول لهم نصابين هؤلاء
كأنك تدافع عنهم
والرسول صلى الله عليه وسلم يقول : من غشنا فليس منا
الرسول عليه الصلاة والسلام يتبرأ من هذا الغشاش .
وأيضاً تقول هذي بضاعته حر فيها يبيع بأي قيمة يريدها
لا ياخوي ليس حر أن يضحك على الناس في بيعها لأن هذا من الغش
والنصب هو الغش لاكن كلمة نصب كلمه عامية
يسمى هذا ( غبن ) من ضحك عليه في البيع

حسب خبره في مجال التسوق الالكتروني ....

البضاعة غالباً تكون من مستورد ومن ثم تتجه لطالبي الرزق بالقطعه
فلا يقدر يشتري جملة ف يشتري بالحبه ... وبكذا تكون عليه تكلفه عالية .. ويحسب عليها مبلغ المربح حقه وكل واحد وشطارته ...
وعلى المشتري تحري الدقة في الشراء .... فلا تشتري الا وانت عارف السلعه وقيمتها بالسوق
البائع ما غشك ... عرض سلعته عليك ب السعر الفلاني وانت وافقت ... بكذا ماتقدر تتهمه انه غشاش ... لانه انت شريت على بينه منه ...

ولاتنسى البعض ينزل السوق يشتري بضاعه بالجملة ويبيعها على المعارف والاصحاب او الانترنت ... بزيادة .... مافيها شي ... أجتهد ونزل ولف ودار واشترى وجابها لحد عندك
ليش تتهمه بالغش والنصب ... ؟؟؟؟؟؟
اطلب الرزق مثله ... وروح اشتريها ... باقل سعر .... وبيعها بأعلى سعر ...

بالمناسبة انا اعتبرها رزق من رب العالمين ...
انا كنت اجيب بضاعه جملة من الخارج .... وابيعها بسعر قليل جداً ... واحياناً كثيرة ما تمشي معايا .. ولكن يجيني مندوب او مندوبه يسوقها لي ... ويضاعف السعر ... وما شاءالله تمشي معاه البضاعه ... هذا يعني رزق من الله له + فن في التسويق + يعرف متى وفين يعرض البضاعه = مكسب حلال عليه .... !!!!!!!!

نقطة اخرى ...
في احد المرات زبون يسأل ليش الملابس عندكم غالية بالرغم من انها في الشركة قليل ..
المهم في موقع الشركة السعر : 5 دولار فقط ... وانا قلت له 50 ريال وشرط جملة
وقال وقال وقال .... طيب ... يا طيب .... انا ماني ملزم اني افصل له
ولكن لازم يعرف ليش .. عشان البعض هداهم الله يحسبون ان اللي يترزقوا الله يشتعلوا مجاناً لخدمة البشرية :)
السعر المعروض في الشركة شرط ( 250 ) كرتون
واذا قطاعي بالتأكيد السعر يزيد ...... غير الشحن ..... والمجازفة بإحتمالية حجز البضاعه لدى الجمارك لاي سبب كان أو فرض رسوم على البضاعه في الجمارك .. وخلافه ...

يعني المسألة ماهي سهله .. واذا بنظرك انه غالي .. تفضل تقدر تطلب البضاعه بنفسك ..

مثلاً الكوب المذكور :
وجدت ناس يبيعوه ب 60 ريال وناس ب 80 ريال وناس 120 ريال وناس 150 ريال وناس 250 ريال
طيب .... هل تقدر تطلب لنفسك كوب واحد فقط من الشركة توصله لك للسعودية .. ؟؟؟؟؟
ماتقدر ... إذن ضريبة طلب الجملة هو البيع قطاعي ... والمكسب ..



والله اعلم

سعر الكوب في الصين 20 ريال مفرق
سعر الجمله 8 ريال بشرط تاخذ 5000 كوب !!
8 * 5000 = 40 الف ريال ( غير شامل الشحن )

تبي تاخذ اقل يرفع لك السعر للحبه

محلات ابو ريالين "الحضارم"
ياخذ اسوء نوع ويطلع عليه ب 5 ريال ( شايفهم بعيني محدش قال لي :) )
ياخذ لك 5 كونتينر بضائع متنوعه
يدخلها من الجمرك ( بواسطه ) ليش بواسطه ؟ لان بضاعته غير مطابقه للمواصفات والمقاييس

الواسطه هذا ياخذ له عالكونتينر 5000 مثلا
يطلع الكوب ب 6 ريال ( كمثال طبعا )

ينزل لك اياه ب 35 ريال
ويكون جلدك بمكسب 29 ريال في الحبه
=======================
التاجر السعودي المسكين ( المواطن اللي يطبقون عليه النظام )

يسافر للصين ويخسر 15 الف تذاكر واقامه
يبحث عن منتجات ( مطابقه للمواصفات والمقاييس السعوديه )
المنتجات المطابقه للمواصفات والمقاييس اسعارها مضاعفه في الصين
كل منتج لازم يطلع عليه شهادة ساسو ب 900 دولار !!

يطلع عليه الكوب ب 25 ريال هههههه

يشحن بضاعته "لمستوطنة الجمرك السعودي"
فجأه يلقى نظام جديد طلعوه الجمرك امس : يمنع فسح اي منتج يحمل علامة تجاريه الا بتصريح من صاحب العلامه التجاريه في بلد المنشأ + تصريح من وكيل نفس العلامه التجاريه في السعوديه + ارفاق رجل نمله لها 7 اصابع وحاطه منكير + شهادة ميلاد ضفدع يتيم

يتفاجأ التاجر السعودي بالقوانين الجديده ( اللي تطبق على المواطن فقط ) ويروح يدور على رجل نمله لها 7 اصابع
في هذا الوقت يكون الكونتينر قعد في الجمرك 3 اسابيع
يلقى رجل النمله ويبدا يبحث عن شهادة ضفدع يتيم
يكون مر على الكونتينر في الجمرك شهر ويبدأ ( حساب الارضيات ) الطن ب 20 ريال لكل يوم
وزن الكونتينر 5 طن = 100 ريال كل يوم تاخير
بعد شهرين يلقى شهادة لضفدع يتيم ويرفق الشهاده مع الاوراق
يبقى تصريح صاحب العلامه التجاريه وتصريح وكيل صاحب العلامه التجاريه

يروح لوكيل كانون ( العجو ) الفلسطيني
يقدم خطاب استرحام واستعطاف للوكيل الفلسطيني باعطاءه تصريح
العجو يقول له ( هسا بدي اعطيك تصريح بسبعطشر الف وبديش تتكررها مره تانيه )
يدفع ال 17 الف

وروح ركض للجمرك مبسوط وفرحان انه استكمل الاوراق وطبق القانون
يقولون له عليك غرامه ( رسوم ارضيات لانك تاخرت ما خلصت الكونتينر )
كم رسوم الارضيات ؟
9000 ريال
يدفعها المواطن الصالح

اخر شي يطلع عليه الكوب ب 95 ريال
ينزل الكوب للسوق ب 100 ريال قنوع يبي يربح بس 5 ريال

يطلع السعودي النصاب كوبه ب 100 ريال
والحضرمي كوبه ب 35 ريال

هذه كل الحكايه

هههههههههههههههههههههههه


mmalmousa اقنعتني

والله والله والله هذا اللي يحصل والله على ما اقول شهيد يا فصوول1

أقول فيه مثل يقول مايمدح السوق إلا اللي ربح فيه
أقول لك خذ قيمته دبل أربع مرات من قيمة السوق تقول تسوق حلال
انا أقول الحمدلله إشتريتها بسعر 80 ريال موجوده عند ابوريالين 25 ريال
تخيل لو شريت بضاعة قيمتها 10000 ريال ثم بعد ذلك حصلتها
عند ابوريالين او غيره 2000 ريال وش رايك تقول هذا تجاره وتسوق
-----
ثانياً : لابد أن تفقه في العلم الشرعي فقه البيوع
حتى لاتقع في محذور شرعي
لأن السلعة تشترى بقيمة السوق وليس بقيمة السلعة
مثال : لو هناك قطعه قماش تباع في سوق العليا بقيمة ( 50 ) ريال
وتباع في سوق منفوحة بقيمة ( 10 ) ريال
لأن أجار المحل يختلف عن أجار المحل اللي في منفوحة
البيع هنا يكون صحيح لأن السلعة تشترى بقيمة السوق اللي إنت تشتريه منه
وليس بقيمة السلعة نفسها
لذلك هذا الذي يبيع الكاس لابد أن يكون أقل من الاسواق ككل
لأنه لايوجد عليه أجار محل يبيعك بالتلفون وتقابله في مكان خاص
مثل اللي يبيع تمر أو شمغ عند المساجد
لابديكون سعرة أقل من السوق ككل حتى يشترى منه
لو كان سعرة مثل السوق أو أكثر لم نشتري منه لذهبنا للسوق وشترينا
لأنه يبيع بأقل من السوق و لايوجد عليه أجار محل وغيرة من الضرائب من المحل
لذلك نشتري منه .

ونت يا
mmalmousa تقول حضارم حضارم إيه ياعم اقول الرجال ضحك علي خذ السعر
دبل ثلاث او اربع مرات غبني ونت تقول جمارك تبرر له لأن لك مصلوح في مستعمل

يا عزيزي اذا انت عندك قناعه مسبقه ليش تنشر موضوع في المنتدى ؟
يعني انت على بالك انت الذيب واللي ماسك السمكه من ذيلها وكل الناس مغفلين ؟ وجاي تبي تحذر ومسوي زحمه :)
خلاص يا عزيزي اذا انت طرحت موضوعك في المنتدى لازم تناقش جميع الاراء او تتقبل جميع الاراء
هذا اسمه منتدى يا الطيب
اما لي مصلوح في مستعمل ولا مالي مصلوح انت ما تعلم الغيب ولا تدري من انا اصلا ولو قلت هالكلام ان لي مصلوح في مستعمل لانك شايف ان عندي اعلانات وحكمت علي من خلال اعلاناتي باني قلت هالكلام لان لي مصلوح
فانا بالمثل اقول لك انت ما لك ولا اعلان وقاعد تتفلسف ومسوي انك متفقه في علم البيوع وانت اعلان واحد ما عندك ( هذا على افتراض اني بفكر نفس تفكيرك )

تكملت يا عزيزي كلام عااااام وقضيه عامه قد يكون التاجر اللي باعك منتجه يعاني من نفس هالقضيه الا وهي محاربة التاجر السعودي واجباره على رفع سعر منتجه واللي قلت لك عنه صوره من صور التضييق على التجار السعوديين

وبعدين تناقض نفسك بنفسك وجايب امثله ومتعب نفسك وتقول محل في البطحا ومحل في العليا وقيمة السوق وقيمة السلعه ،،،
ترى اكثر من نص تجار مستعمل عندهم محلات وانا واحد عندي محل ايجاره 168 الف في السنه !!
وعندي رواتب عمال شهريه 8000
تجي تشتري الكوب من عندي ب 150 ؟

وعلى فكره عشان تثبت الغبن لازم يتم تقييم منتجك من قبل لجنه في السوق + اثبات ان التاجر اللي باعك المنتج اشتراه بسعر زهيد وباعك بسعر عالي
وبكذا تثبت انك انغبنت .

اولا ليش زعلان ياخوي
مساك الله بالخير قبل كل شي
بسألك سؤال لو شريت من محل سلعة 100 ريال
ثم حصلتها عند محل في نفس الحي 10 ريال او 20 ريال
تقول هذا شريها من موزع رافع السعر عليه وهذا شاري من موزع سعر قليل
إذا الموزع ظحك عليه باعها بقيمة تختلف عن السوق كلياً
بسعر فاحش يقوم يلصق السلعه في ظهري وهي متواجده في السوق بسعر قليل
مو صحيح
قبل يشتري السلعه عليه يتأكد من السلعه هي موجوده او لا
ويشوف أسعارها كم
وثانياً تقول ماعندك إعلانات
عندي إعلانات لاكن أنتهى صلاحيتها عقارية أيضاً في الشمال ايضاً
وليس كاس أو بريق شاي
بالنسبه للمحل اللي عندك نقول الله يزيدك من فضله مانحسدك
بس انا ايضا عندي كذا محل بس ماله مصلو ح في مستعمل
لو له مصلوح وضعته اليوم قبل بكرة
وعمال عندنا خير متعبينا

ختاماً
لو معك سلعة قيمتها 150 ريال ثم جاء واحد يشتري منك ذي السلعة
قبل لايشتريها قلتله في المحل اللي خلف محلنا يبيعها بسعر
35 ريال
وش ضنك بيشتري منك الزبون
وترك السؤال إلى أعضاء مستعمل هم اللي يجاوبون على سؤالي

السلام عليكم ورحمة الله وبركاته
(: < جاي مطفي النور
شكرآ علا طرح الموضوع
اخواني : كلامكم ع العين والراس بس كل اللي تتكلمون عنه ( كماليات ) يعني اشياء مو ضروريه
وعلا قولتهم من بغا الدح ما قال اح
البلا بأساسيات الحياة من وظايف وعقار واجار وغلا فواتير ووو مرور بالمواد الغذائه برز ولحم وحليب الاطفال وأدويه < هذي يعاني منها كل بيت
بس الكاسات والساعات والخرابيط مايعاني منها الا عنده قرشين زايده مايدري وش يسوي بهاولا واحد انظحك عليه ويبي يطلع حرته ومو معنا انه انظحك عليه انه غبي لامحشوم بس ما حاول يدور ارخص ولا يدور بديل
ولا واحد حسود الله يكفينا شر الحسد
اتوقع مافيه الا سبع اشخاص بهالمنتدا عندهم هالمشكله اللي هي الكماليات
وباقي الناس يعانون من الاساسيات
وكان الله في عون الجميع
تقبل مروري ودمتم بحفظ الرحمن

اخوي احب احذرك من سمعات الاذن

تراها خطيرة على الاذن لانها تجارية