أبي حل لحرارة الشقه بارك الله فيكم

مكيف صحراوي حديد صغير ربع حصان .. يكون على راكب كفرات .. يكون شغال على طول النهار .. ان قدرت تحطه خارجي فطيب .. والا عادي يصير داخل الشقه. لكن خذ جوده عاليه.

خله ينفخ على مدخل الشقه على الصاله ..

اهم شي طفه بالليل اذا نمت. احتياط

الله يكون بعونك اخوي ،،

الحل الصحيح من وجهة نظري يكون في وضع عازل حراري في السطح ثم عمل تبليط له.
انت شف كم تكلف الشغلة وكلم صاحب البيت يدفعها أو يخليها من قيمة الإيجار.

شاكر لكم جميعا
وين القى العازل وش الانواع لأن ماعندي فكره عن البناء
قريت فيه رشه عازل للحراره وين ألقاها
وبالنسبه للمكيف الصحراوي وين حنى بالشرقيه مو بالقصيم ولا الرياض

الحل الامثل زي ماقال الراية هو تركيب عازل حرارة في السطح وغالبا ماتكون عبارة عن الواح بوليثرين سماكة 5سم . بس كان المفروض صاحب العمارة يسويها مع عازل الماء على السطح مرة وحدة لانها تحتاج صبة ميول تحتها وبعدين لازم تتغطى بصبة ناعمة او بلاط بس الناس تدور الرخص.

ممكن تمر مؤسسة مثل الزامل اللي يشتغلون في عوازل الماء و الحرارة يمكن يكون عندهم حل غير مكلف

او الحل الثاني انك تغطي السطح بمظلة شينكو. صح انه بيخرب شكل العمارة بس ممكن يخفض من حرارة السطح بنسبة 70%. ممكن تغطي على الاقل السطح اللي على شقتك.

السلام عليكم اخوي فيه عند محلات العزل الواح اسفنجيه سعرها مع التركيب المتر25 ريال خذها بدون تركيب وركيها مجرد صفها بجنب بعض على السطح من ثم بعدها افرش عليها كم كيس بحص او حصاء ابيض حق الخرسانه وباذن الله تدعي لي راح يكون عندك عازل 80%
لان الاسنفنج اللي هو الواح العزل مع الخرسانه يصير عازل قوي
والميزة الاخرى والاهم انك اذا نقلت للبيت ثاني تقدر تشيل الواح الاسفنج معك من بيت لبيت اما اذا بلط عليها بلاط فيكون كذا اشتغلت لراع البيت

واذا بغيت استفسار اكثر راسلني خاص

تأكيد لحل ابو عبدالرحمن هو الصحيح والاقل تكلفة ومهم تفرش فوقها بحص علشان لا تطير الالواح

وش له التعب والخساير وانت مستاجر بس والصيف باقي فيه بالضبط شهر

الواح اسيفوم ازرق 10 سم واقرشها انت وافرش فوقها طربال ازرق ماتكلفك 800 ريال
السبركس مايوصل 25 لكن ثقيل وتركيبه تعب

الله يعينك ...

اذا انت معزم تكمل في الشقة هذه اكثر من سنة ومرتاح .. ولكن ما يضايقك الا الحرارة
تقدر تعمل ماشاروا عليك الشباب به ..
اما لو ناوي تنقل ف خلاص باقي شهر تحمله عاد .. والله يعينك

اسهل وارخص حل رد بحص كنكري ورافعه وافرش السطح 10 سنتي بحص

طبعا اذا الجدران مو معزوله حلولونا هذي الله اعلم بها

الله يجزاكم خير
بس وين المحلات في الجبيل البلد؟

فيه حل رخيص جدا بس بياخذ وقت شوي

وهو مجرب عندي والنتائج ممتازه ومنظر جدا رائع

اعمل شبكه من الحبال وتثبت في اركان السطح بحيث تكون مرتفعه عن ارض السطح حوالي المترين
وبرميل به تربه وكم شتلة لبلاب سريع النمو

مع التسميد بمخلفات الحمام شهرين فقط وتلاقي الشبكه اصبحت سجاده خضراء وتفرش علي اعلي الجدار من السقف مع ازهار رائعه الجمال

بس تحتاج تسقي يوميا والبرميل هات لك برميل بلاستيكي ازرق 200 ليتر هذا كبير

هذا الحل جدا رخيص ويحقق هدفين اولهما التظليل

ثانيا الترطيب للجو لان بخر النباتات يلطف الجو جدا

اعملها فورا وبتدعيليي لا تكاليف ولا خساير ومنظر جميل
دمت بود

اخوي اذا بتطول وبتحط كنكري او رمل مكشوف انتبه للشتاء والامطار بكره يخرخر عليك السقف مع الامطار وينعدم اثاثك وتهدم بيت الرجال وتكسب ذنبه وسلامتك

كل الحلول غير مجديه مكيف الصحراوي جيد لاكن بيرفع عليك فاتوره الكهرباء و الواح بوليثرين جيده لاكن قروشه تفرشها وبعدين تشيلها معك حجمها كبير وتاخذ مساحه وتركيبها يبيله وقت وجهد

افضل حل رشه عازل للحراره وهاذي كلفه قليه وتركيبه وقت قليل وتقدر تتفاوض معى صاحب الشقه في التكلفه ولاكن الي اعرف ان نكلفته قليله وطريقته يجي بالمكينه ويرش في وقت قصير جدا

انا مهندس وخبير في الأمور هذي :


1 جدران الشقة الخارجية لابد تكون معزولة

2 النوافذ لابد تكون من النوع العازل للحرارة

3 لابد من عزل السطح بتركيب مادة عازلة وتبليط بلاط عازل

4 يفضل التكييف يكون سبليت

5 لابد تكون المكيفات في منطقة تهوية بحيث يكون التبريد أعلى

أخى الكريم،
أنا مهندس استشارى و نصيحتى لك الا تتعب نفسك فى اصلاح مشاكل الغير.
ان لم لم يوافق المالك على الاصلاح الفورى فانتقل الى شقة اخرى.

فتكاليف الاصلاح و مدة الاصلاح اكبر من الفائده العائده عليك.

أنت الان تحاول اصلاح غلطات الغير.

ادهن السطح بويه بيضا تعكس الشمس

هل السقف المستعار ينفع؟

لا ماينفع اسالني الحل هو الاتي طبعا تمشية حال تجيب بلكاش خفيف وتجيب سطل بويه ابيض وتدهنه بفروله وتحطهن جنب بعض وكم بلكه عشان ماتطير يخففن الحراره بشكل ملحوض