مكيف كارير جديد وخربان ؟؟

ارجع للمحل اللي شريت منه
مكيف جديد و يخرب بأسبوع!!
يااما يتحمل ترجيعه او استبداله او يدلك على الوكيل
اخاف اعطاك المكيف يسمونه دمج او استوك

كم مقاس الغرفه ؟
والمكيف كم وحده ؟

عادة سبب فصل الكمروسر بالمكيف الشباك يكون من الترموستات
واحتمال تحتاج وزن او تبديل
بالنسبه لي سهل تغييرها ووزنها لكن صعب اشرح لك الطريقه

اسأل الله لك التوفيق..

الغرفه 4*5 تقريبا

المكيف 18000 وحده

كان في البدايه ممتاز وقت الظهر ما يفصل , بس في الليل يفصل كل ربع ساعه

لكن من البارح واليوم صار كل 3 دقايق يفصل وصار حار

اذا المحل بصلحونه لي ما عندي مشكله اروح لهم

لكن الضمان ما تقوع في كل مدينه فيها ضمان , لان المكتوب على ضمان المكيف ( الدمام ، الرياض ، جده )

ثبت الترموستات على رقم 7 وخل ضغط الهواء وشط وجرب

خليته على 7 من اليوم الظهر والتبريد وسط , لمدة نصف ساعه , وما تغير شي , كل 3 دقايق يفصل

غسلته وبعده بساعتين شغلته , قلت لعل وعسى يزين وضعه

ودمرته :(

صار يشتغل على المروحه فقط , مادري وش اللي اخترب فيه الحين ههههه

لازم وناخوك يكشف عليه فني صيانة
-يفحص الكمبروسر ويفحص الفريون ونا مستبعد هذا ان شاء الله مايكون منه الخلل
- يفحص البوبينة و ضيفتها تتحكم وتعطي امر للكمبروسر
- ويفحص الترموستات وان اشك فيها
جرب خل المكيف طافي و قفل الترموستات على 0
وشغل المكيف و دور الترموستات من 0-1-2-3-4 ..الى الاخير او الى ما يشتغل الكمبروسر
دورها بهدوء
جرب ورد لي خبر

انا ليه قلت لك لازم فني يفحصها لان القطع الكهربائيه والالكترونيه تعرف عملها وخللها
عن طريق القياس بالاميتر او الملتيميتر
وبالجهاز تعرف خلل او عمل القطع

سويت اليل قلت لي عليه وخليت الترموستات 0 وشغلت المكيف ودورته بشويش واشتغل الكمبرسر , لكن باقي يفصل كل 3 دقايق
والكمبرسر صار صوته عالي

المكيف خلفه جدار ؟

لا ما وراه جدار ولا اي شي

بالنسبه للكمبروسر والبوبينه ان شاء الله سليمه

اتوقع واشك كثير بالترموستات

واحياناً بالمكيفات والثلاجات اذا كانت مواصير النحاس او الرديتر مسدوده يثلج واحيان يفصل بإستمرار
وتعطل الترموستات ايضاً يسبب تثليج
وتحتاج وزن اذا كانت تفصل بإستمرار واحيان توزن اذا ثلج المكيف
لكن ان شاء الله تكون مشكلتك بسيطه
تأكد من كلامي جب مهندس للبيت واشرح له الوضع
حاول تسحبه بالكلام شف اش يقول
للعلم سعر الترموستات يختلف لكن مو غالي
من 20 الى 80 ريال
وبالنسبه لتركيبه 30 ريال مناسبه و 50 بالكثير
لان تغييره وهو بمكانه ما يحتاج تطليع المكيف من مكانه
كلها مسمارين

ليه ما تروح للمحل اللي شريت منه
المفروض عالضمان

طيب المحل بيجيبون لي فني ع طول , او بيرسلوني للوكيل وقروشه

رح لهم وشف وش يقولون
المفروض الوكيل يتحمل كل شي يرسل فني للبيت ويشيك عليه
رح للمحل اللي شريت منه اقل شيء يعطيك رقم الوكيل وتتصل بهم
ما اعطاك المحل فاتوره ؟ والمكيف يجي معه كتالوج وبطاقة الضمان تحصل ارقامهم

طيب طيب , يعطيك الف عافيه يا غالي

من يومين وانا اطارد وراهم
كل واحد يعطيني رقم , اللي ما يرد , واللي مشغول , واللي يصرفني

كانهم يقولون لي مانبي نصلحه

انا الغلطان اللي اشتري من الوكيل الجفالي - نصيحه لاحد يشتري منه

طب عندهم

و قول الان تعوضوني او تدخلوني الصيانه


ولا والله العضيم ادق على وزاره التجاره الان

و خلك حازم

ما نفع اتصل على وزاره التجاره
نص ساعه وهم عندك

مشاء الله على الوزير الجديد شاد حيله الله يوفقه
صارو يخافون من وزاره التجاره

اي والله اشوف ذا الشهر تجيني رسايل عن الغش التجاري والضمانات وووالخ

توي ادري انهم مغيرين الوزير

بكرا بهددهم , بقولهم ساعه بس اذا ما جا فني التكييف , بكلم الوزاره

كفوو

ادخل عندهم و براسك حبه ما نطحنت

انحلت المشكله او باقي ؟

معليش قطعت عن النت فتره ونسيت الموضوع ههههه

انحلت المشكله , رفعت شكوى لوزاراة التجارة عن طريق النت , وبعدها بيومين جوني الصيانه

بس ما ادري هم جوني بسبب الشكوى او عن طريق المعرض اللي شريت منه المكيف

لاني كلمت المعرض وقلت لهم اذا ماجاتني الصيانه بشتكي عليكم وعليهم

رجع اخترب
صار حاااار + قسام البروده ما يتغير , يبقى على درجة واحده

, لاحد يقرب كارير اللي اسمه ( الكمبرسر العملاق )

وانا اقول ليش الهندي اللي بالمعرض يحن علي عشان اشتريه